ಗಂಡು ಮಗುವಿಗೆ ಜನ್ಮ ನೀಡಿದ ವಿಜಯ್ ಸೂರ್ಯ ದಂಪತಿ

ಗಂಡು ಮಗುವಿಗೆ ಅಪ್ಪನಾದ ಸೂರ್ಯ

ವಿಜಯ್ ಸೂರ್ಯ ಮತ್ತು ಚೈತ್ರಾ ದಂಪತಿಗೆ ಗಂಡು ಮಗು ಆಗಿದೆ. ಜನವರಿ 1 ರಂದು ಮಗು ಜನನವಾಗಿದ್ದು, ಆ ಸುದ್ದಿಯನ್ನು ಪ್ರೇಮಿಗಳ ದಿನದ ಪ್ರಯುಕ್ತ ಇಂದು ಅಧಿಕೃತವಾಗಿ ಅಭಿಮಾನಿಗಳ ಮುಂದಿಟ್ಟಿದ್ದಾರೆ.

ಪ್ರೇಮಿಗಳ ದಿನದಂದೇ ವಿವಾಹವಾಗಿದ್ದ ಜೋಡಿ!

ವಿಜಯ್ ಸೂರ್ಯ ಮತ್ತು ಚೈತ್ರಾ ಜೋಡಿ ಕಳೆದ ವರ್ಷ (14-2-2019) ವಿವಾಹವಾಗಿದ್ದರು. ಈಗ ಸರಿಯಾಗಿ ಒಂದು ವರ್ಷ ತುಂಬಿದೆ. ಮೊದಲನೇ ವರ್ಷದ ವಿವಾಹ ವಾರ್ಷಿಕೋತ್ಸವದಲ್ಲಿ ಸಂಭ್ರಮದಲ್ಲಿರುವ ವಿಜಯ್ ಸೂರ್ಯ ದಂಪತಿ ಇದೇ ದಿನ ತಾವು ತಂದೆ-ತಾಯಿ ಆಗಿರುವ ವಿಷಯದ ಸಂತಸದ ಸುದ್ದಿ ಬಹಿರಂಗಪಡಿಸಿದ್ದಾರೆ.

ಮಗುವಿನ ಹೆಸರೇನು?

ವಿಜಯ್ ಸೂರ್ಯ ಅವರ ಮಗುವಿಗೆ ಸೋಹನ್ ಸೂರ್ಯ ಎಂದು ಹೆಸರಿಡಲಾಗಿದೆ. ಜನವರಿ 1 ರಂದು ಮಗು ಹುಟ್ಟಿದ್ದು, ಹಬ್ಬದ ದಿನ ವಿಷಯ ಹಂಚಿಕೊಳ್ಳಲು ನಿರ್ಧರಿಸಿದ್ದರು. ಅಂದು ಸಾಧ್ಯವಾಗಿರಲಿಲ್ಲ, ಪ್ರೇಮಿಗಳ ದಿನದಂದು ಮದುವೆ ವಾರ್ಷಿಕೋತ್ಸವ ಇತ್ತು. ಈ ವಿಶೇಷ ದಿನದಲ್ಲಿ ಈ ಸುದ್ದಿ ಹಂಚಿಕೊಂಡಿದ್ದು ಸಂಭ್ರಮಕ್ಕೆ ಮೆರುಗು ತಂದಿದ್ದಾರೆ.

ವಿಜಯ್ ಸೂರ್ಯ ಸಿನಿಮಾಗಳು

'ಅಗ್ನಿಸಾಕ್ಷಿ' ಧಾರಾವಾಹಿ ಮೂಲಕ ಜನಪ್ರಿಯತೆ ಗಳಿಸಿಕೊಂಡ ನಟ ವಿಜಯ್ ಸೂರ್ಯ, 'ಕ್ರೇಜಿಲೋಕ', 'ಇಷ್ಟಕಾಮ್ಯ', 'ಸ', ಕದ್ದುಮುಚ್ಚಿ ಎಂಬ ಚಿತ್ರಗಳಲ್ಲಿ ನಟಿಸಿದರು. ಸದ್ಯ ಲಕ್ನೌ ಟು ಮುಂಬೈ ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದು ಬಿಡುಗಡೆ ಸಜ್ಜಾಗಿದೆ.