ದೊಡ್ಡ ಸ್ಟಾರ್‌ಗಳನ್ನು ಹಿಂದಿಕ್ಕಿ ಹೊಸದೊಂದು ದಾಖಲೆ ಬರೆದ ರಾಕಿಂಗ್ ಸ್ಟಾರ್ ಯಶ್

12ನೇ ಸ್ಥಾನದಲ್ಲಿ ಯಶ್

ಭಾರತದಲ್ಲಿಯೇ ಅತಿ ಹೆಚ್ಚು ಟ್ವೀಟ್‌ಗಳು ರೀಟ್ವೀಟ್ ಆಗುವ ನಟರ ಪಟ್ಟಿಯಲ್ಲಿ ಸ್ಥಾನ ಪಡೆದಿರುವ ಏಕೈಕ ಕನ್ನಡದ ನಟ ಎಂಬ ಹೆಗ್ಗಳಿಕೆಗೆ ಯಶ್ ಪಾತ್ರವಾಗಿದ್ದಾರೆ. 2020ರಲ್ಲಿ ಟ್ವೀಟ್ ಹೆಚ್ಚು ರೀಟ್ವೀಟ್ ಆದ ನಟರ ಪಟ್ಟಿಯೊಂದು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದ್ದು, ಅದರಲ್ಲಿ ಯಶ್ 12ನೇ ಸ್ಥಾನ ಪಡೆದಿದ್ದಾರೆ.

ಚಿತ್ರರಂಗದ ಹೆಮ್ಮೆ

ಈ ಖುಷಿಯ ಸಂಗತಿಯನ್ನು ಯಶ್ ಅಭಿಮಾನಿಗಳು ಶೇರ್ ಮಾಡುತ್ತಿದ್ದಾರೆ. ಈ ಪಟ್ಟಿಯಲ್ಲಿರುವ ನಮ್ಮ ಚಿತ್ರರಂಗದ ಏಕೈಕ ನಟ ಯಶ್. ನಮ್ಮ ಕನ್ನಡ ಚಿತ್ರರಂಗದ ಹೆಮ್ಮೆ, 'ನಾಮ್ ಥೋ ಯಾದ್ ಹೈ ನಾ' ಎಂದು ಹೇಳಿಕೊಂಡಿದ್ದಾರೆ.

ಜೂ. ಎನ್‌ಟಿಆರ್ ಮೊದಲ ಸ್ಥಾನ

ನಟರು ಮಾಡಿರುವ ಟ್ವೀಟ್ 2020ರಲ್ಲಿ ಸರಾಸರಿ ಎಷ್ಟು ಬಾರಿ ಟ್ವೀಟ್ ಆಗಿದೆ ಎನ್ನುವುದು ಈ ಲೆಕ್ಕಾಚಾರ. ಇದರಲ್ಲಿ ಜೂ ಎನ್‌ಟಿಆರ್ ಮೊದಲ ಸ್ಥಾನದಲ್ಲಿದ್ದು, 13,118 ಸರಾಸರಿ ರೀ ಟ್ವೀಟ್ ಪಡೆದಿದ್ದಾರೆ. ಎರಡನೆಯ ಸ್ಥಾನದಲ್ಲಿರುವ ರಜನಿಕಾಂತ್ ಅವರ ಟ್ವೀಟ್‌ಗಳು ಸರಾಸರಿ 10,362 ಬಾರಿ ರೀಟ್ವೀಟ್ ಆಗಿವೆ. ನಂತರದ ಸ್ಥಾನದಲ್ಲಿ ಸಲ್ಮಾನ್ ಖಾನ್ ಇದ್ದು, ಅವರ ಟ್ವೀಟ್‌ಗಳು 6,312 ಬಾರಿ ರೀಟ್ವೀಟ್ ಆಗಿವೆ.

ಸ್ಟಾರ್‌ಗಳನ್ನು ಹಿಂದಿಕ್ಕಿದ ಯಶ್

ಈ ಪಟ್ಟಿಯಲ್ಲಿ ಯಶ್ 12ನೇ ಸ್ಥಾನದಲ್ಲಿದ್ದಾರೆ. ಅವರ ಟ್ವೀಟ್‌ಗಳು ಸರಾಸರಿ 1496 ಬಾರಿ ರೀಟ್ವೀಟ್ ಆಗಿವೆ. ವಿಶೇಷವೆಂದರೆ ಖ್ಯಾತ ನಟರಾದ ಅಮೀರ್ ಖಾನ್, ಹೃತಿಕ್ ರೋಷನ್, ಮೋಹನ್ ಲಾಲ್, ಅನುಷ್ಕಾ ಶರ್ಮಾ, ದೀಪಿಕಾ ಪಡುಕೋಣೆ, ರಣವೀರ್ ಸಿಂಗ್, ಪ್ರಿಯಾಂಕಾ ಚೋಪ್ರಾ, ಸಮಂತಾ, ಕಾಜಲ್ ಅಗರವಾಲ್ ಮುಂತಾದವರು ಯಶ್ ನಂತರದ ಸ್ಥಾನದಲ್ಲಿದ್ದಾರೆ.

ದಕ್ಷಿಣ ಭಾರತದ 12 ನಟರು

ಸುಮಾರು 21 ಕಲಾವಿದರ ಪಟ್ಟಿಯಲ್ಲಿ 12 ಮಂದಿ ದಕ್ಷಿಣ ಭಾರತದ ನಟರೇ ಇದ್ದಾರೆ. ಯಶ್ ಅವರಿಗಿಂತ ಮೇಲೆ ಕ್ರಮವಾಗಿ ಸಲ್ಮಾನ್ ಖಾನ್, ಮಹೇಶ್ ಬಾಬು, ಸೂರ್ಯ, ಶಾರುಖ್ ಖಾನ್, ಅಕ್ಷಯ್ ಕುಮಾರ್, ಅಲ್ಲು ಅರ್ಜುನ್, ಪವನ್ ಕಲ್ಯಾಣ್, ಕಮಲ ಹಾಸನ್ ಮತ್ತು ಅಜಯ್ ದೇವಗನ್ ಇದ್ದಾರೆ.