"ಯಶ್ ಬದಲು ಬೇರೆ ಹೀರೊ 'ರಾಕಿ ಭಾಯ್' ಆಗಬಹುದು" –ವಿಜಯ್ ಕಿರಗಂದೂರು

ಬೇರೆ ಹೀರೊ ರಾಕಿ ಭಾಯ್‌ ಆಗ್ತಾರಾ?

ಇತ್ತೀಚೆಗೆ 'ಕೆಜಿಎಫ್' ಸಿನಿಮಾದ ನಿರ್ಮಾಪಕ ವಿಜಯ್ ಕಿರಗಂದೂರು ಹಿಂದಿ ಮಾಧ್ಯಮವೊಂದಕ್ಕೆ ಸಂದರ್ಶನ ನೀಡಿದ್ದರು. ಈ ವೇಳೆ 'ಕೆಜಿಎಫ್' ಮುಂದಿನ ಸರಣಿಯಲ್ಲಿ ರಾಇ ಭಾಯ್ ಪಾತ್ರವನ್ನು ಬೇರೆ ಹೀರೊನೂ ಮಾಡಬಹುದು ಎಂದು ಹೇಳಿಕೆ ಕೊಟ್ಟಿದ್ದಾರೆ. " ಕೆಜಿಎಫ್ 5ನೇ ಫ್ರಾಂಚೈಸಿ ಬಳಿಕ ರಾಕಿ ಭಾಯ್ ಪಾತ್ರವನ್ನು ಬೇರೆ ಹೀರೊ ಮಾಡುವ ಸಾಧ್ಯತೆ ಇದೆ. ಜೇಮ್ಸ್ ಬಾಂಡ್ ಸಿರೀಸ್‌ನಂತೆ ಹೀರೊಗಳು ಬದಲಾಗುತ್ತಾ ಇರುತ್ತಾರೆ." ಎಂದು ಹೇಳಿದ್ದಾರೆ.

ರಾಕಿ ಭಾಯ್ ಪಾತ್ರಕ್ಕೆ ಬೇರೆ ಹೀರೊ ಬರಬಹುದು ಎಂದಿದ್ದೇಕೆ?

'ಕೆಜಿಎಫ್ ಚಾಪ್ಟರ್ 3'ಗೆ ಈ ಸರಣಿ ನಿಲ್ಲಲ್ಲ. ಐದನೇ ಚಾಪ್ಟರ್ ವರೆಗೂ ಈ ಸರಣಿ ಮುಂದುವರೆಯುತ್ತಲೇ ಇರುತ್ತೆ ಎಂದು ವಿಜಯ್ ಕಿರಗಂದೂರು ಅವರೇ ಹೇಳಿದ್ದಾರೆ. ಹೀಗಾಗಿ ಐದು ಸರಣಿಯನ್ನು ದಾಟಿ ಮುಂದಕ್ಕೆ ಹೋದರೇ ಆಗ ರಾಕಿ ಭಾಯ್ ಪಾತ್ರವನ್ನು ಯಶ್ ಬದಲು ಬೇರೆ ಹೀರೊ ಮಾಡಬಹುದು ಎಂದು ಹೇಳಿದ್ದಾರೆ. ಆದರೆ, 'ಕೆಜಿಎಫ್ 3' ರಿಲೀಸ್ ಆಗೋದೇ ಮೂರು ವರ್ಷಗಳ ಬಳಿಕ. ಹೀಗಾಗಿ 'ಕೆಜಿಎಫ್ 4', 'ಕೆಜಿಎಫ್ 5' ರಿಲೀಸ್ ವೇಳೆಗೆ ಎಷ್ಟು ಸಮಯ ಹಿಡಿಯುತ್ತೆ. ಈ ಕಾರಣಕ್ಕೆ ವಿಜಯ್ ಕಿರಗಂದೂರು ಹೀರೊ ಬದಲಾಗಬಹುದು ಎಂದು ಹೇಳಿಕೆ ನೀಡಿದ್ದಾರೆ.

'ಕೆಜಿಎಫ್ 3' ಯಾವಾಗ?

'ಕೆಜಿಎಫ್ 2 ಬ್ಲಾಕ್‌ ಬಸ್ಟರ್ ಲಿಸ್ಟ್ ಸೇರುತ್ತಿದ್ದಂತೆ 'ಕೆಜಿಎಫ್ 3' ಬೇಕು ಅಂತ ಅಭಿಮಾನಿಗಳು ಪಟ್ಟು ಹಿಡಿದಿದ್ದರು. ನಿರ್ಮಾಣ ಸಂಸ್ಥೆ ಕೂಡ 'ಕೆಜಿಎಫ್ ಚಾಪ್ಟರ್ 3' ಸೆಟ್ಟೇರಿಸುವುದಕ್ಕೆ ತುದಿಗಾಲಲ್ಲಿ ನಿಂತಿದೆ. ಆದರೆ, ಪ್ರಶಾಂತ್ ನೀಲ್ 'ಸಲಾರ್' ಸೇರಿದಂತೆ ಬೇರೆ ಬೇರೆ ಸಿನಿಮಾಗಳಲ್ಲಿ ಬ್ಯುಸಿಯಾಗಿರೋದ್ರಿಂದ 2025ಕ್ಕೆ ಸೆಟ್ಟೇರಬಹುದು. ಹಾಗೇ 2026ಕ್ಕೆ ರಿಲೀಸ್ ಆಗಬಹುದು ಎಂದು ಸುಳಿವು ನೀಡಿದ್ದಾರೆ.

'ಕೆಜಿಎಫ್‌'ನಿಂದ ಭರ್ಜರಿ ಸಕ್ಸಸ್

2018ರಲ್ಲಿ 'ಕೆಜಿಎಫ್ ಚಾಪ್ಟರ್ 1' ತೆರೆಕಂಡಾಗ ಈ ಮಟ್ಟಿಗೆ ಸಕ್ಸಸ್ ಆಗುತ್ತೆ ಅನ್ನೋದು ಯಾರೂ ಊಹಿಸಿರಲಿಲ್ಲ. ಚಾಪ್ಟರ್ 1 ಸೂಪರ್ ಹಿಟ್ ಆಗಿತ್ತು. ಈ ಬೆನ್ನಲ್ಲೇ 'ಕೆಜಿಎಫ್ ಚಾಪ್ಟರ್ 2' ಬಾಕ್ಸಾಫೀಸ್‌ನಲ್ಲಿ ಸುಮಾರು 1200 ಕೋಟಿ ರೂ.ಗೂ ಅಧಿಕ ಗಳಿಕೆ ಕಂಡಿತ್ತು. ಹೀಗಾಗಿ ಈ ಫ್ರಾಂಚೈಸಿಯನ್ನು ಮುಂದುವರೆಸಿಕೊಂಡು ಹೋಗುವುದಕ್ಕೆ ಚಿತ್ರತಂಡ ನಿರ್ಧರಿಸಿದೆ. ಖುಷಿ ವಿಷಯ ಏನಂದ್ರೆ, 5ನೇ ಪಾರ್ಟ್ ವರೆಗೂ 'ಕೆಜಿಎಫ್' ಸರಣಿಯನ್ನೇ ಮುಂದುವರೆಸಲಿದೆ. ಅಲ್ಲದೆ, 5ನೇ ಚಾಪ್ಟರ್‌ವರೆಗೂ ಯಶ್ ರಾಕಿ ಭಾಯ್ ಅವತಾರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.