'ಕೆಜಿಎಫ್ 2' ಯಶಸ್ಸಿನ ಬಳಿಕ ಮಾಧ್ಯಮಗಳಿಂದ ದೂರ ಉಳಿದಿದ್ದೇಕೆ ಯಶ್?

ಮಾಧ್ಯಮಗಳ ಮುಂದೆ ಬರಲಿಲ್ಲ ಯಶ್ ಏಕೆ?

ಇದಕ್ಕೆ ತಮ್ಮದೇ ಸ್ಟೈಲ್‌ನಲ್ಲಿ ಉತ್ತರಿಸಿರುವ ಯಶ್, ''ನನ್ನ ಬಗ್ಗೆ ನಾನು ಹೇಳಿಕೊಳ್ಳುವುದರಲ್ಲಿ ಅರ್ಥವಿಲ್ಲ. ಆ ರೀತಿಯ ವ್ಯಕ್ತಿ ನಾನಲ್ಲ. 'ನಾನು ರಾಜ ಎಂದು ಹೇಳುವ ವ್ಯಕ್ತಿ ನಿಜವಾಗಿಯೂ ರಾಜನಾಗಿರುವುದಿಲ್ಲ. ನೀವು ನಿಜವಾಗಿಯೂ ಯಶಸ್ವಿಯಾಗಿದ್ದರೆ ಅದನ್ನು ಜನರಿಗೆ ಹೇಳುವ ಅವಶ್ಯಕತೆ ಇಲ್ಲ. ಜನಕ್ಕೆ ತಾನಾಗಿಯೇ ವಿಷಯ ತಿಳಿಯುತ್ತದೆ. ಅದರ ಪ್ರಚಾರ ಬೇಕಿಲ್ಲ. ನಾವು ಒಳ್ಳೆಯ ಕಾರ್ಯ ಮಾಡುತ್ತಿರಬೇಕು ಅಷ್ಟೆ'' ಎಂದಿದ್ದಾರೆ ಯಶ್.

ಸುಮ್ಮನೆ ಕೂರುವ ವ್ಯಕ್ತಿ ನಾನಲ್ಲ: ಯಶ್

'ಕೆಜಿಎಫ್' ಸಿನಿಮಾ ಬಿಟ್ಟು ಬೇರೆ ಸಿನಿಮಾ ಮಾಡಿದರೆ ಜನ ಒಪ್ಪಿಕೊಳ್ಳುತ್ತಾರಾ ಎಂಬ ಭಯ, ಅನುಮಾನ ಇದೆಯಾ ಎಂಬ ಬಗ್ಗೆ ಉತ್ತರಿಸಿರುವ ಯಶ್, ''ನಾನು ಬಂದೆ, ನಾನು ಅದನ್ನು ಮಾಡುತ್ತಿದ್ದೇನೆ ಎಂದೆಲ್ಲ ಹೇಳುವ ವ್ಯಕ್ತಿ ನಾನಲ್ಲ. ಸುಮ್ಮನೆ ಕೂರುವ ವ್ಯಕ್ತಿ ಸಹ ನಾನಲ್ಲ. ನನ್ನ ಕನಸುಗಳು ಬಹಳ ದೊಡ್ಡದಿವೆ. ಕನಸು ಹೇಗಿರಬೇಕೆಂದರೆ ಕನಸನ್ನು ಯಾರ ಮುಂದಾದರೂ ಹೇಳಿದರೆ ಅವರು ಭಯಪಡಬೇಕು. ನಾನೂ ಸಹ ಹಾಗೆಯೇ. ನನ್ನ ಕನಸುಗಳು ಬಹಳ ದೊಡ್ಡವು'' ಎಂದಿದ್ದಾರೆ ಯಶ್.

ಹುಟ್ಟುಹಬ್ಬದಂದು ಸಿನಿಮಾ ಘೋಷಿಸಲಿದ್ದಾರೆ ಯಶ್

ಯಶ್ ತಮ್ಮ ಮುಂದಿನ ಸಿನಿಮಾಕ್ಕೆ ತಯಾರಾಗುತ್ತಿದ್ದಾರೆ. ಯಶ್‌ರ ಮುಂದಿನ ಸಿನಿಮಾ ಭಾರಿ ಬಜೆಟ್‌ನದ್ದಾಗಿರಲಿದ್ದು, ವಿದೇಶಿ ನಟರು, ತಂತ್ರಜ್ಞರು ಸಹ ಸಿನಿಮಾದಲ್ಲಿರಲಿದ್ದಾರೆ. ಯಶ್‌ರ ಮುಂದಿನ ಸಿನಿಮಾವನ್ನು ಸ್ವತಃ ಯಶ್‌ ನಿರ್ಮಾಣ ಮಾಡಲಿದ್ದಾರೆ. ಅವರೇ ನಿರ್ದೇಶನ ಸಹ ಮಾಡಲಿದ್ದಾರೆ ಎನ್ನಲಾಗುತ್ತಿದೆ. ಯಶ್‌ರ ಮುಂದಿನ ಹುಟ್ಟುಹಬ್ಬದ ದಿನದಂದು ತಮ್ಮ ಹೊಸ ಸಿನಿಮಾದ ಘೋಷಣೆ ಮಾಡಲಿದ್ದಾರೆ. ಯಶ್‌ರ ಹುಟ್ಟುಹಬ್ಬ ಇದೇ ಜನವರಿ 08 ರಂದು.

ಭಾರಿ ಕಲೆಕ್ಷನ್ ಮಾಡಿದ್ದ 'ಕೆಜಿಎಫ್ 2'

ಯಶ್‌ ನಟನೆಯ 'ಕೆಜಿಎಫ್ 2' ಸಿನಿಮಾ ಇದೇ ವರ್ಷದ ಏಪ್ರಿಲ್ 14 ರಂದು ಬಿಡುಗಡೆ ಆಗಿ ಸೂಪರ್ ಡೂಪರ್ ಹಿಟ್ ಆಯಿತು. ಈ ವರ್ಷ ಅತಿ ಹೆಚ್ಚು ಹಣ ಗಳಿಸಿದ ಸಿನಿಮಾ ಎಂಬ ಖ್ಯಾತಿಯನ್ನು ಸಿನಿಮಾ ಗಳಿಸಿತು. 'ಕೆಜಿಎಫ್ 2' ಸಿನಿಮಾ ಸುಮಾರು 1500 ಕೋಟಿ ರುಪಾಯಿ ಹಣ ಗಳಿಸಿತು. ಮೊದಲ 'ಕೆಜಿಎಫ್' ಸಿನಿಮಾ ಸುಮಾರು 200 ಕೋಟಿ ಗಳಿಸಿತ್ತು. ಅಂದಹಾಗೆ 'ಕೆಜಿಎಫ್' ಹಾಗೂ 'ಕೆಜಿಎಫ್ 2' ಸಿನಿಮಾಕ್ಕೆ ಹೊಂಬಾಳೆಯ ಜೊತೆಗೆ ಯಶ್ ಸಹ ಬಂಡವಾಳ ಹೂಡಿದ್ದರಂತೆ.