ಧನಂಜಯ್ 'ಹೆಡ್ ಬುಷ್' ಓಟಿಟಿ ಬಿಡುಗಡೆ ದಿನಾಂಕ ಪ್ರಕಟ; ಯಾವಾಗ, ಎಲ್ಲಿ? ಇಲ್ಲಿದೆ ಮಾಹಿತಿ

ಜೀ ಫೈವ್‌ನಲ್ಲಿ ಹೆಡ್ ಬುಷ್

ಡಾಲಿ ಧನಂಜಯ್ ನಟನೆಯ ಹಾಗೂ ನಿರ್ಮಾಣದ ಹೆಡ್ ಬುಷ್ ಚಿತ್ರವನ್ನು ಜೀ ಸ್ಟುಡಿಯೋಸ್ ಖರೀದಿಸಿ ಬಿಡುಗಡೆಗೊಳಿಸಿತ್ತು. ಇನ್ನು ಚಿತ್ರದ ಓಟಿಟಿ ಹಕ್ಕನ್ನೂ ಸಹ ಜೀ ಸಂಸ್ಥೆಯೇ ಖರೀದಿಸಿದ್ದು, ಚಿತ್ರವು ಜೀ ಫೈವ್ ಅಪ್ಲಿಕೇಶನ್‌ನಲ್ಲಿ ಸ್ಟ್ರೀಮ್ ಆಗಲಿದೆ. ಇದೇ ತಿಂಗಳ ಅಂದರೆ ಜನವರಿ 13ರಂದು ಹೆಡ್ ಬುಷ್ ಜೀ ಫೈವ್ ಅಪ್ಲಿಕೇಶನ್‌ನಲ್ಲಿ ಪ್ರಸಾರವಾಗಲಿದೆ.

ಆರೂ ಚಿತ್ರಗಳೂ ನಿರೀಕ್ಷೆ ಮುಟ್ಟಲಿಲ್ಲ

2022ರಲ್ಲಿ ಧನಂಜಯ್ ನಟನೆಯ ಒಟ್ಟು ಆರು ಚಿತ್ರಗಳು ಬಿಡುಗಡೆಗೊಂಡವು. ಮೊದಲಿಗೆ ಟ್ವೆಂಟಿ ಒನ್ ಅವರ್ಸ್ ಎಂಬ ಚಿತ್ರದ ಮೂಲಕ ಹೀನಾಯವಾಗಿ ಸೋತ ಧನಂಜಯ್ ನಂತರ ರಿಮೇಕ್ ಚಿತ್ರಗಳಾದ ಬೈರಾಗಿ ಹಾಗೂ ಮಾನ್ಸೂನ್ ರಾಗ ಚಿತ್ರಗಳಲ್ಲಿ ನಟಿಸಿ ಕೈ ಸುಟ್ಟುಕೊಂಡರು. ಬೈರಾಗಿ ತಮಿಳಿನ ಕಡಗು ಚಿತ್ರದ ರಿಮೇಕ್ ಆದರೆ, ಮಾನ್ಸೂನ್ ರಾಗ ತೆಲುಗಿನ ಕೇರ್ ಆಫ್ ಕಾಂಚೆರಪಾಲೆಂ ಚಿತ್ರದ ರಿಮೇಕ್. ಇನ್ನುಳಿದಂತೆ ತೋತಾಪುರಿ ಹಾಗೂ ಹೆಡ್ ಬುಷ್ ನಿರೀಕ್ಷೆ ತಲುಪುವಲ್ಲಿ ವಿಫಲವಾದರೆ, ವರ್ಷಾಂತ್ಯದಲ್ಲಿ ಬಿಡುಗಡೆಯಾದ ಒನ್ಸ್ ಅಪಾನ್ ಎ ಟೈಮ್ ಇನ್ ಜಮಾಲಿಗುಡ್ಡ ಒಳ್ಳೆಯ ವಿಮರ್ಶೆ ಪಡೆದುಕೊಂಡರೂ ಸಹ ಜನರು ದೊಡ್ಡ ಮಟ್ಟದಲ್ಲಿ ಚಿತ್ರಮಂದಿರಕ್ಕೆ ತೆರಳುತ್ತಿಲ್ಲ.

ಧನಂಜಯ್ ಮುಂದಿನ ಚಿತ್ರಗಳು

ಒಂದೆಡೆ ಜನವರಿ 13ರಂದು ಹೆಡ್ ಬುಷ್ ಓಟಿಟಿಯಲ್ಲಿ ಬಿಡುಗಡೆಯಾದರೆ ಧನಂಜಯ್ ಸಾಹಿತ್ಯ ಬರೆದಿರುವ ಆರ್ಕೆಸ್ಟ್ರಾ ಮೈಸೂರು ಚಿತ್ರ ಜನವರಿ 12ರಂದು ತೆರೆಗೆ ಬರಲಿದೆ. ಇನ್ನು ಈ ಚಿತ್ರದ ಬಳಿಕ ಡಾಲಿ ಧನಂಜಯ್ ಪೊಲೀಸ್ ಪಾತ್ರದಲ್ಲಿ ನಟಿಸಿರುವ ಹೊಯ್ಸಳ ಚಿತ್ರ ಮಾರ್ಚ್ 30ರಂದು ತೆರೆಗೆ ಬರಲಿದೆ ಹಾಗೂ ಈ ಚಿತ್ರ ಧನಂಜಯ್‌ಗೆ ಕಮ್‌ಬ್ಯಾಕ್ ಚಿತ್ರವಾಗಲಿದೆ ಎಂಬ ಅಭಿಪ್ರಾಯವನ್ನು ಸಿನಿ ರಸಿಕರು ವ್ಯಕ್ತಪಡಿಸಿದ್ದಾರೆ.