ಭಾರತದಲ್ಲಿ ನೆಟ್‌ಫ್ಲಿಕ್ಸ್‌ಗಿಂತ 'ಟ್ವಿಟರ್' ದುಬಾರಿ: ನೆಟ್‌ಫ್ಲಿಕ್ಸ್‌ಗೆ ₹649.. ನೀಲಿ ಟಿಕ್‌ಗೆ ಎಷ್ಟು?

ಟ್ವಿಟರ್ ನೀಲಿ ಟಿಕ್‌ಗೆ ಎಷ್ಟು ಕೊಡಬೇಕು?

ಸೆಲೆಬ್ರೆಟಿಗಳು ಸೇರಿದಂತೆ ಗಣ್ಯ ವ್ಯಕ್ತಿಗಳು ಟ್ವಿಟರ್ ಅಕೌಂಟ್ ಅನ್ನು ಹೊಂದಿದೆ. ಟ್ವಿಟರ್ ಮೈಕ್ರೋ ಬ್ಲಾಗಿಂಗ್‌ ಸೈಟ್‌ನಲ್ಲಿ ತಮ್ಮ ಅಭಿಪ್ರಾಯಗಳನ್ನು ಹಂಚಿಕೊಳ್ಳುತ್ತಿರುತ್ತಾರೆ. ಕೆಲ ಕಿಡಿಗೇಡಿಗಳು ಇಂತಹ ಸೆಲೆಬ್ರೆಟಿಗಳ ಹೆಸರಲ್ಲಿ ಫೇಕ್ ಅಕೌಂಟ್ ತೆರೆದು ಬಳಸುತ್ತಿದ್ದರು. ಈ ಕಾರಣಕ್ಕೆ ಟ್ಟಿಟರ್ ನೀಲಿ ಟಿಕ್ ಅನ್ನು ಪರಿಚಯಿಸಿತ್ತು. ಈ ಮೂಲಕ ನೀಲಿ ಟಿಕ್ ಇರುವ ಟ್ವಿಟರ್ ಖಾತೆ ಅಧಿಕೃತ ಎಂದು ನಂಬಬಹುದಾಗಿತ್ತು. ಈಗ ಎಲಾನ್ ಮಸ್ಕ್ ಟ್ವಿಟರ್ ಕೊಂಡು ಕೊಂಡ ಬಳಿಕ ಆ ನೀಲಿ ಟಿಕ್‌ಗೆ ಬೆಲೆ ಕಟ್ಟಬೇಕಿದೆ. ಸದ್ಯ ಭಾರತದಲ್ಲಿ ಈ ನೀಲಿ ಟಿಕ್‌ನ ಬೆಲೆ ತಿಂಗಳಿಗೆ ₹719 ಎಂದು ನಿಗದಿಯಾಗಿದೆ. ಈ ಬೆಲೆನೇ ಈಗ ಭಾರತದಲ್ಲಿ ಟ್ರೋಲ್ ಆಗುತ್ತಿದೆ.

ನೆಟ್‌ಫ್ಲಿಕ್ಸ್‌ಗಿಂತ ಟಿಕ್ ದುಬಾರಿ

ಎಲಾನ್ ಮಸ್ಕ್‌ ಮೊದಲು ಟ್ವಿಟರ್ ನೀಲಿ ಟಿಕ್ ಸೇವೆಗೆ 8 ಡಾಲರ್ ನೀಡಬೇಕು ಎಂದು ಹೇಳಿದ್ದರು. ಆದ್ರೀಗ ಬೆಲೆ ಏರಿಸಿದ್ದು, ಟ್ವಿಟರ್ ನೀಲಿ ಟಿಕ್‌ಗೆ 719 ರೂಪಾಯಿ ಏರಿಕೆ ಮಾಡಲಾಗಿತ್ತು. ಇದು 8 ಡಾಲರ್‌ಗಿಂತ ಹೆಚ್ಚು ಎಂದು ಹೇಳಲಾಗಿದೆ. ಈಗ ದುಬಾರಿ ಓಟಿಟಿ ವೇದಿಕೆ ನೆಟ್‌ಫ್ಲಿಕ್ಸ್‌ಗಿಂತ ಟ್ವಿಟರ್ ನೀಲಿ ಟಿಕ್ ದುಬಾರಿ ಎಂದು ಟ್ರೋಲ್ ಮಾಡಲಾಗುತ್ತಿದೆ. ಅಸಲಿಗೆ ಭಾರತದಲ್ಲಿ ನೆಟ್‌ಫ್ಲಿಕ್ಸ್ ಸಬ್‌ಸ್ಕ್ರೈಬ್ ಆಗಲು ದುಬಾರಿ ಅಂದರೆ, 649ರೂಪಾಯಿ ಕಟ್ಟಬೇಕು. ಆದ್ರೀಗ ಟ್ಟಿಟರ್ ನೀಲಿ ಟಿಕ್ ಅದಕ್ಕಿಂತಲೂ ದುಬಾರಿ ಎಂದು ಹೇಳಲಾಗಿದೆ.

ನೀಲಿ ಟಿಕ್ ಬೆಲೆ ಏಕೆ ದುಬಾರಿ?

ನೆಟ್‌ಫ್ಲಿಕ್ಸ್ ಪ್ರಿಮಿಯಮ್‌ ₹649 ಪ್ಲ್ಯಾನ್‌ನಲ್ಲಿ ಸಾಕಷ್ಟು ಸವಲತ್ತುಗಳನ್ನು ನೀಡಿದೆ. 4ಕೆ ರೆಸಲ್ಯೂಷನ್‌ನಲ್ಲಿ ಸಿನಿಮಾ ಹಾಗೂ ವೆಬ್‌ ಸೀರಿಸ್‌ ಅನ್ನು ನೋಡಬಹುದು. ಅಲ್ಲದೆ ಒಂದು ಅಕೌಂಟ್‌ನಿಂದ ನಾಲ್ಕು ಮಂದಿಗೆ ಕಂಟೆಂಟ್ ನೋಡಲು ನೀಡಬಹುದು. ಹೆಚ್‌ಡಿಯಲ್ಲಿ ಸಿನಿಮಾ ಹಾಗೂ ವೆಬ್‌ ಸೀರಿಸ್‌ ಅನ್ನು ನೋಡಬಹುದು. ಇಷ್ಟೆಲ್ಲಾ ಆಫರ್ ಕೊಟ್ಟು 649 ರೂಪಾಯಿ ಚಾರ್ಜ್ ಮಾಡುತ್ತಿದೆ. ಅದೇ ಕೇವಲ ನೀಲಿ ಟಿಕ್‌ಗೆ 719 ರೂಪಾಯಿ ಚಾರ್ಜ್ ಮಾಡಿದ್ದು, ಕೆಲವರ ಕಣ್ಣು ಕೆಂಪಾಗುವಂತೆ ಮಾಡಿದೆ.

ಸೆಲೆಬ್ರೆಟಿಗಳ ನಿರ್ಧಾರವೇನು?

ಈಗಾಗಲೇ ಅಧಿಕೃತವಾಗಿ ನೀಲಿ ಟಿಕ್ ಹೊಂದಿರೋ ಸೆಲೆಬ್ರೆಟಿಗಳು ಏನು ಮಾಡುತ್ತಾರೆ? ಪ್ರತಿ ತಿಂಗಳು ₹719 ಕೊಟ್ಟು ನೀಲಿ ಟಿಕ್ ಅನ್ನು ಉಳಿಸಿಕೊಳ್ಳುತ್ತಾರಾ? ಅನ್ನೋ ಅನುಮಾನವಂತೂ ಇದೆ. ಆದರೆ, ಟ್ವಿಟರ್‌ನಲ್ಲಿ ಉಳಿಯಬೇಕು ಅಂದರೆ, ವಿಧಿಯಿಲ್ಲದೆ ನೀಲಿ ಟಿಕ್‌ ಅನ್ನು ಉಳಿಸಿಕೊಳ್ಳಲೇಬೇಕಿದೆ. ಇಲ್ಲದೆ ಹೋದರೆ, ಬೇರೆಯವರೂ ಕೂಡ ನಕಲಿ ಖಾತೆಯನ್ನು ಬಳಸಿ ಇಮೇಜ್ ಡ್ಯಾಮೇಜ್ ಮಾಡಬಹುದು. ಹೀಗಾಗಿ ಸೆಲೆಬ್ರೆಟಿಗಳು ಯಾವ ನಿರ್ಧಾರ ಕೈಗೊಳ್ಳುತ್ತಾರೆ ಅನ್ನೋ ಆತಂಕವಿದೆ.