ನಯನತಾರಾ-ವಿಘ್ನೇಶ್ ವಿವಾಹದ ದೃಶ್ಯ ನೆಟ್‌ಫಿಕ್ಸ್‌ನಲ್ಲಿ ಪ್ರಸಾರ? ಸೇಲ್ ಮಾಡಿದ ಮೊತ್ತವೆಷ್ಟು?

ಒಟಿಟಿಯಲ್ಲಿ ನಯನತಾರಾ ಮದುವೆ?

ನಯನತಾರಾ ಹಾಗೂ ವಿಘ್ನೇಶ್ ಶಿವನ್ ಮದುವೆ ಸಮಾರಂಭವನ್ನು ಒಟಿಟಿಯಲ್ಲಿ ಪ್ರಸಾರ ಆಗಲಿದೆ ಎಂಬ ಸುದ್ದಿ ಹಬ್ಬಿದೆ. ನೆಟ್‌ಫಿಕ್ಸ್ ಸಂಸ್ಥೆ ಜೊತೆ ನಯನತಾರಾ ಹಾಗೂ ವಿಘ್ನೇಶ್ ಶಿವನ್ ಒಪ್ಪಂದ ಮಾಡಿಕೊಂಡಿದ್ದಾರೆ ಎನ್ನಲಾಗಿದೆ. ಭಾರತದ ಇದೇ ಮೊದಲ ಬಾರಿಗೆ ತಾರಾ ಜೋಡಿಯೊಂದು ತಮ್ಮ ಮದುವೆಯ ಕ್ಷಣಗಳನ್ನು ಒಟಿಟಿಗೆ ಭಾರಿ ಮೊತ್ತಕ್ಕೆ ಸೇಲ್ ಮಾಡಿದೆ ಎಂದು ಹೇಳಲಾಗುತ್ತಿದೆ. ಆದರೆ, ಈ ಬಗ್ಗೆ ಇಬ್ಬರೂ ಅಧಿಕೃತವಾಗಿ ಎಲ್ಲೂ ಹೇಳಿಕೊಂಡಿಲ್ಲ.

ಈ ವಿಡಿಯೋಗೆ ಗೌತಮ್ ಮೆನನ್ ಸಾರಥ್ಯ?

ನಯನತಾರಾ ಹಾಗೂ ವಿಘ್ನೇಶ್ ಶಿವನ್ ಮದುವೆಯನ್ನು ಡಾಕ್ಯೂಮೆಂಟರಿ ಶೈಲಿಯಲ್ಲಿ ಶೂಟ್ ಮಾಡಲಾಗುತ್ತೆ. ಈ ವಿಡಿಯೋವನ್ನು ಕಾಲಿವುಡ್‌ನ ಫೇಮಸ್ ನಿರ್ದೇಶಕ ಗೌತಮ್ ಮೆನನ್ ಸೆರೆಹಿಡಿಯಲಿದ್ದಾರೆ ಎನ್ನಲಾಗಿದೆ. ಆದರೆ, ಈ ವಿಚಾರವಾಗಿ ಗೌತಮ್ ಮೆನನ್ ಆಗಲಿ, ಇಲ್ಲಾ ತಾರಾ ಜೋಡಿಯಾಗಲಿ ಯಾವುದೇ ರೀತಿಯ ಮಾಹಿತಿಯನ್ನು ನೀಡಿಲ್ಲ. ಆದರೂ, ಕಾಲಿವುಡ್‌ನಲ್ಲಿ ಈ ವಿಷಯ ಭಾರಿ ಚರ್ಚೆಯಾಗುತ್ತಿದೆ.

ಈ ಜೋಡಿ ಪಡೆದ ಮೊತ್ತ ಎಷ್ಟು?

ನಯನತಾರಾ ಹಾಗೂ ವಿಘ್ನೇಶ್ ಶಿವನ್ ಇಬ್ಬರೂ ಮಹಾಬಲಿಪುರಂನ 5 ಸ್ಟಾರ್ ಹೊಟೇಲ್ ಒಂದರಲ್ಲಿ ವೈವಾಹಿಕ ಜೀವನಕ್ಕೆ ಕಾಲಿಡಲಿದ್ದಾರೆ. ಈಗಾಗಲೇ ಇನ್ನು ಕೆಲವೇ ದಿನಗಳಲ್ಲಿ ಮದುವೆ ನಡೆಯಲಿದ್ದು ತಯಾರಿ ಜೋರಾಗಿಯೇ ನಡೆದಿದೆ ಎನ್ನಲಾಗಿದೆ. ಈ ಮಧ್ಯೆ ತಮ್ಮ ಮದುವೆ ಸಮಾರಂಭ ಕ್ಷಣಗಳನ್ನು ಪ್ರಸಾರ ಮಾಡಲು ಒಟಿಟಿಯಿಂದ ಭಾರಿ ಮೊತ್ತವನ್ನೇ ಪಡೆದಿದ್ದಾರೆ ಎಂದು ಗೆಸ್ ಮಾಡಲಾಗುತ್ತಿದೆ. ಮೂಲಗಳ ಪ್ರಕಾರ, ನಯನತಾರಾ ಒಂದು ಸಿನಿಮಾ ₹4 ರಿಂದ ₹5 ಕೋಟಿ ಪಡೆಯುತ್ತಾರೆ. ಅಷ್ಟೇ ಮೊತ್ತವನ್ನು ನೆಟ್‌ಫಿಕ್ಸ್‌ನಿಂದ ಪಡೆದಿರಬಹುದು ಎಂದು ಅಭಿಮಾನಿಗಳೇ ಊಹೆ ಮಾಡುತ್ತಿದ್ದಾರೆ.

ಒಂದು ದಿನ ಮುನ್ನ ಆರತಕ್ಷತೆ?

ಕಾಲಿವುಡ್ ಜೋಡಿ ಹಕ್ಕಿಗಳ ಮದುವೆ ಜೂನ್ 9ರ ಬೆಳಗ್ಗೆ 4 ಗಂಟೆಯಿಂದ 7 ಗಂಟೆಯೊಳಗೆ ಮುಗಿದು ಹೋಗಲಿದೆಯಂತೆ. ಇನ್ನು ಜೂನ್ 8ರಂದು ಅದೇ ಹೊಟೇಲ್‌ನಲ್ಲಿ ಆರತಕ್ಷತೆ ಕೂಡ ನಡೆಯಲಿದೆ ಎಂದು ಮೂಲಗಳು ಹೇಳುತ್ತಿವೆ. ಆದರೆ, ಇದ್ಯಾವುದನ್ನೂ ನಯನತಾರಾ ಹಾಗೂ ವಿಘ್ನೇಶ್ ಶಿವನ್ ಎಲ್ಲೂ ಹೇಳಿಕೊಂಡಿಲ್ಲ.