ಕಿಲ್ಲಿಂಗ್ ವೀರಪ್ಪನ್ Vs ಅಟ್ಟಹಾಸ: ಯಾವುದು ನಿಜವಾದ ಇತಿಹಾಸ?

ವೀರಪ್ಪನ್ ಕ್ರೂರತೆ ಮತ್ತು ಆತನ ಕಾಲಘಟ್ಟದ ಪ್ರಮುಖ ವಿದ್ಯಮಾನವಾದ ರಾಜ್ ಬಿಡುಗಡೆಯ ವಿಚಾರದಲ್ಲಿ ಹಸ್ತಾಂತರವಾದ ಹಣಕಾಸು ವಹಿವಾಟಿನಲ್ಲಿ ಕರಾರುವಕ್ಕಾದ ಮಾಹಿತಿ ಎರಡು ರಾಜ್ಯಗಳ ಪೊಲೀಸರು, ಸರಕಾರೀ ಅಧಿಕಾರಿಗಳು, ಕೆಲ ರಾಜಕಾರಣಿಗಳು, ಇತರ ಪ್ರಮುಖರು ಮತ್ತು ರಾಜ್ ಕುಟುಂಬಕ್ಕೆ ಹೊರತಾಗಿ ಇನ್ಯಾರಿಗೂ ತಿಳಿದಿಲ್ಲ. ಹಾಗಾಗಿ, ಎರಡೂ ಚಿತ್ರದ ನಿರ್ದೇಶಕರು ಈ ಬಗ್ಗೆ ಹೆಚ್ಚು ತಲೆಕೆಡಿಸಿಕೊಂಡಿಲ್ಲ.

ಅಟ್ಟಹಾಸ ಚಿತ್ರದಲ್ಲಿ ರಾಜ್ ಅಪಹರಣದ (ಸುರೇಶ್ ಒಬೆರಾಯ್ ರಾಜ್ ಪಾತ್ರದಲ್ಲಿ ನಟಿಸಿದ್ದರು) ಮತ್ತು ಬಿಡುಗಡೆಯ ದೃಶ್ಯಗಳಿದ್ದರೆ, ಕಿಲ್ಲಿಂಗ್ ವೀರಪ್ಪನ್ ಚಿತ್ರದಲ್ಲಿ ರಾಜ್ ಅಪಹರಣದ ಬಗ್ಗೆ ಎರಡೋ ಮೂರೋ ಡೈಲಾಗುಗಳು ಮಾತ್ರ ಇವೆ. ಅದರಲ್ಲಿ ರಾಜ್ ಬಿಡುಗಡೆಗೆ ಬಂದ ದುಡ್ಡಿನಲ್ಲಿ ತಮಿಳು ಟೆರರಿಸ್ಟ್ ಗ್ರೂಪ್ ನವರು ಹೆಚ್ಚು ದುಡ್ಡು ತೆಗೆದುಕೊಂಡು ನನಗೆ ಮೋಸ ಮಾಡಿದರು ಎಂದು ವೀರಪ್ಪನ್ ಹೇಳುವ ಡೈಲಾಗ್ ಇದೆ.

ಇನ್ನು ಅಟ್ಟಹಾಸ ಚಿತ್ರದಲ್ಲಿ ತಮಿಳುನಾಡಿನ ಎಸ್ಟಿಎಫ್ ಅಧಿಕಾರಿ ( ಅರ್ಜುನ್ ಸರ್ಜಾ) ನೇತೃತ್ವದ ಪಡೆಗಳು ವೀರಪ್ಪನ್ ನನ್ನು ಸದೆಬಡೆದಿದ್ದು ಎಂದು ತೋರಿಸಲಾಗಿತ್ತು. ಮತ್ತು ಈ ಬಗ್ಗೆ ತಮಿಳುನಾಡಿನ ಮುಖ್ಯಮಂತ್ರಿ ಕಚೇರಿಯ ಆದೇಶದ ಬಗ್ಗೆಯೂ ತೋರಿಸಲಾಗಿತ್ತು.

ಆದರೆ ಕಿಲ್ಲಿಂಗ್ ವೀರಪ್ಪನ್ ಚಿತ್ರದಲ್ಲಿ ಕಾರ್ಯಾಚರಣೆಯ ಎಸ್ಟಿಎಫ್ ಅಧಿಕಾರಿ ಎರಡು ರಾಜ್ಯಗಳ ಜಂಟಿ ಕಾರ್ಯಾಚರಣೆಯ ನೇತೃತ್ವ ವಹಿಸಿದ್ದರೋ ಅಥವಾ ಒಂದು ರಾಜ್ಯವನ್ನು ಪ್ರತಿನಿಧಿಸಿ ಕಾರ್ಯಾಚರಣೆಗೆ ಇಳಿದಿದ್ದರೋ ಎನ್ನುವ ಬಗ್ಗೆ ಪ್ರೇಕ್ಷಕರಿಗೆ ಕೊಂಚ ಗೊಂದಲ ಉಂಟಾಗುತ್ತದೆ. ಆದರೆ, ವೀರಪ್ಪನ್ ವಿರುದ್ದ ಕಾರ್ಯಾಚರಣೆಯ 'ಆಪರೇಷನ್ ಕುಕೂನ್' ಮಾಸ್ಟರ್ ಮೈಂಡ್ ಪಾತ್ರ ನಿರ್ವಹಿಸಿರುವುದು ಶಿವಣ್ಣ. ತಮಿಳುನಾಡು ಅಧಿಕಾರಿಗಳ ಸಾಧನೆ ಕರ್ನಾಟಕದಲ್ಲಿ ವಿಜೃಂಭಿಸಿ ವಿವಾದಕ್ಕೆ ಕಾರಣವಾಗಬಾರದು ಎನ್ನುವ ಕಾರಣಕ್ಕೆ ನಿರ್ದೇಶಕರು ಹಿರಿಯ ಇಬ್ಬರೂ ಅಧಿಕಾರಿಗಳ ಹೆಸರನ್ನೂ ಚಿತ್ರದಲ್ಲಿ ಉಲ್ಲೇಖಿಸದೇ ಇದ್ದಿರಬಹುದು. ಸೋ, ಶಿವಣ್ಣನ ಪಾತ್ರದ ಹೆಸರಾಗಲಿ, ಮತ್ತು ಆಪರೇಷನ್ ಕುಕೂನ್ ಕಾರ್ಯಾಚರಣೆಯಲ್ಲಿದ್ದ ಹಿರಿಯ ಅಧಿಕಾರಿಗಳ ಹೆಸರನ್ನ ಚಿತ್ರದಲ್ಲಿ ಎಲ್ಲೂ ಉಲ್ಲೇಖಿಸಿಲ್ಲ.

ಕಿಲ್ಲಿಂಗ್ ವೀರಪ್ಪನ್ ಚಿತ್ರದಲ್ಲಿ ಸೂಪರ್ ಸ್ಟಾರ್ ರಾಜ್ ಕುಮಾರ್ ಕಿಡ್ನ್ಯಾಪ್ ಆದ ನಂತರ ಬೇಸತ್ತ ಎಸ್.ಟಿ.ಎಫ್ ಅಧಿಕಾರಿ ಶಿವರಾಜ್ ಕುಮಾರ್, ವೀರಪ್ಪನ್ ನನ್ನು ಕೊಲ್ಲಲು ನಿರ್ಧರಿಸುತ್ತಾರೆ. ಅಟ್ಟಹಾಸ ಚಿತ್ರದಲ್ಲಿ ವೀರಪ್ಪನ್ ಕ್ರೌರ್ಯತೆ ಬಗ್ಗೆ ಹೆಚ್ಚಿನ ದೃಶ್ಯಗಳಿವೆ. ಹಾಗಂತ ಕಿಲ್ಲಿಂಗ್ ವೀರಪ್ಪನ್ ಚಿತ್ರದಲ್ಲಿ ಆತನ ಕ್ರೌರ್ಯತೆ ಇಲ್ಲಾಂತ ಅಲ್ಲ, ಸಿನಿಮಾ ಶುರುವಾಗುವುದೇ ಪೊಲೀಸ್ ಅಧಿಕಾರಿಗಳನ್ನ ವೀರಪ್ಪನ್ ಸಾಯಿಸುವ ಮೂಲಕ. ಎರಡೂ ಚಿತ್ರಗಳಲ್ಲಿ ನೈಜಘಟನೆಯನ್ನಾಧಾರಿಸಿ, ಸ್ಟಡಿ ಮಾಡಿ, ಗೊತ್ತಿಲ್ಲದ ಹಲವು ವಿಚಾರಗಳನ್ನು ತೆರೆಮೇಲೆ ತರಲಾಗಿದೆ ಎಂದು ನಿರ್ದೇಶಕರು ಹೇಳಿಕೊಂಡಿದ್ದಾರೆ.

ವೀರಪ್ಪನನ್ನು ಎನ್ಕೌಂಟರ್ ಮಾಡುವ ದೃಶ್ಯವೂ ಎರಡೂ ಚಿತ್ರದಲ್ಲಿ ವಿಭಿನ್ನವಾಗಿದೆ. ಕಿಲ್ಲಿಂಗ್ ವೀರಪ್ಪನ್ ಚಿತ್ರದಲ್ಲಿ ನರಹಂತಕ ಎಲ್ಟಿಟಿಇ ಪ್ರಮುಖ ವಿ ಪ್ರಭಾಕರನ್ ನನ್ನು ಭೇಟಿಯಾಗಲು ಅಂಬುಲೆನ್ಸ್ ಮೂಲಕ ಸಾಗುವಾಗ ಅಧಿಕಾರಿಗಳು ಹೊಡೆದುರುಳಿಸಿದರೆ, ಅಟ್ಟಹಾಸ ಚಿತ್ರದಲ್ಲಿ ವೀರಪ್ಪನ್ ತನ್ನ ಕಣ್ಣಿನ ಶಸ್ತ್ರಚಿಕಿತ್ಸೆಗೆ ಅಂಬುಲೆನ್ಸ್ ಮೂಲಕ ಬರುತ್ತಿರುವಾಗ ಎನ್ಕೌಂಟರ್ ಅಗಿದ್ದು ಎಂದು ತೋರಿಸಲಾಗಿದೆ. ಅಟ್ಟಹಾಸ ಚಿತ್ರದಲ್ಲೂ ಶಸ್ತ್ರಚಿಕಿತ್ಸೆಯ ನಂತರ ಶ್ರೀಲಂಕಾಕ್ಕೆ ಹೋಗುವ ಪ್ಲಾನ್ ವೀರಪ್ಪನ್ ಹಾಕಿಕೊಂಡಿರುತ್ತಾನೆ.