ವಿಮರ್ಶೆ : ಬಾಡೂಟದ ಜೊತೆ 'ನೀರ್ ದೋಸೆ' ಸವಿದಂತೆ ಇದೇ ಜಗ್ಗೇಶ.!

ಪೋಲಿಗಳ ಕಥೆ ಇದು!

ಲೋಕೋಪಯೋಗಿ ಇಲಾಖೆಯಲ್ಲಿ ಕೆಲಸ ನಿರ್ವಹಿಸಿ ನಿವೃತ್ತಿ ಪಡೆದಿರುವ ದತ್ತು (ದತ್ತಣ್ಣ)ಗೆ 'ಆಟ' ಆಡುವ ತವಕ. ಆಗಾಗ 'ಔಟ್ ಡೋರ್ ಗೇಮ್' ಆಡಿ ಅಭ್ಯಾಸ ಇರುವ ಹೆಣ ಸಾಗಿಸುವ ವ್ಯಾನ್ ಡ್ರೈವರ್ ಜಗ್ಗು (ಜಗ್ಗೇಶ್ ಕುಮಾರ್) ಕೂಡ ದತ್ತು ಜೊತೆ ಸೇರಿಕೊಳ್ತಾನೆ. ಆಗ ಇಬ್ಬರ ಕಣ್ಣಿಗೆ ಕ್ಲಬ್ ನಲ್ಲಿ ಕಾಣಿಸಿಕೊಳ್ಳುವುದು 'ನಡು ತಿರುಗಿಸುವ ನೀರೆ' ಕುಮುದಾ (ಹರಿಪ್ರಿಯಾ).

ಆಟವಾಡಲು ಕುಮುದಾ ಒಪ್ಪುತ್ತಾಳಾ?

ಆಟವಾಡಲು ಹ್ಯಾಂಡ್ ಲೋನ್ ಪಡೆದು ಬಂದಿರುವ ಜಗ್ಗು ಮತ್ತು ದತ್ತು ಬಯಕೆಯನ್ನ ಕುಮುದಾ (ಹರಿಪ್ರಿಯಾ) ಈಡೇರಿಸುತ್ತಾಳಾ ಎಂಬುದೇ ಮುಂದಿನ ಭಾಗ.

'ನೀರ್ ದೋಸೆ' ಟೈಟಲ್ ಯಾಕೆ?

ಕುಮುದಾ, ದತ್ತು ಅಕ್ಕ ಹಾಗೂ ಜಗ್ಗು ಅಪ್ಪನಿಗೂ 'ನೀರ್ ದೋಸೆ'ಗೂ ಒಂದು ನಂಟಿದೆ. ಆ ನಂಟಿನ ಗುಟ್ಟು ತಿಳಿಯಲು ಸಿನಿಮಾ ನೋಡಿ....

ಹರಿಪ್ರಿಯಾ ನಟನೆ ಹೇಗಿದೆ?

ನಟಿ ಹರಿಪ್ರಿಯಾ ಇಲ್ಲಿ ಗ್ಲಾಮರ್ ಗೊಂಬೆ. ಬಿಂಕ ಬಿಟ್ಟು ಬೋಲ್ಡ್ ಆಗಿ ಮಿಂಚಿರುವ ಹರಿಪ್ರಿಯಾ, ಪಡ್ಡೆ ಹುಡುಗರಿಗೆ ಇಷ್ಟವಾಗಬಹುದು. ಅವರ ಮೇಕ್ ಓವರ್ ಬೊಂಬಾಟ್. ಆದ್ರೆ, ಹರಿಪ್ರಿಯಾ ಕಷ್ಟಪಟ್ಟು ಬೆಲ್ಲಿ ಡ್ಯಾನ್ಸ್ ಮಾಡಿದಂತಿದೆ. ಕಟ್ಸ್ ನಲ್ಲಿ ಫಿನಿಶಿಂಗ್ ಬಂದಿಲ್ಲ.

ಜಗ್ಗೇಶ್ ಬಗ್ಗೆ ನೋ ಕಾಮೆಂಟ್ಸ್!

ಜಗ್ಗೇಶ್ ನಟನೆ ಬಗ್ಗೆ ತುಟಿ ಎರಡು ಮಾಡುವ ಹಾಗಿಲ್ಲ. ಅವರ ಹಾವ-ಭಾಗ, ಕಾಮಿಡಿ ಟೈಮಿಂಗ್ ಸೂಪರ್.

ದತ್ತಣ ಮ್ಯಾಜಿಕ್

ಹಿರಿಯ ನಟ ದತ್ತಣ್ಣ ಕೂಡ ತಮ್ಮ ಪಾತ್ರವನ್ನ ಅಚ್ಚುಕಟ್ಟಾಗಿ ನಿಭಾಯಿಸಿದ್ದಾರೆ.

ಸುಮನ್ ರಂಗನಾಥ್ ಗೆ ಏನು ಕೆಲಸ?

ವಯಸ್ಸು 30 ದಾಟಿದ್ರೂ, ಸಕ್ಕರೆ ಖಾಯಿಲೆ ಬಂದಿದ್ದರೂ, ಮದುವೆಯಾಗದ ಜಗ್ಗು ಬಾಳಿನ ಸಂಸಾರ ದೋಣಿ ನಡೆಸಲು ಮುಂದೆ ಬರುವುದು ಶಾರದಾ ಮಣಿ (ಸುಮನ್ ರಂಗನಾಥ್). ಮಧ್ಯಮ ವರ್ಗದ ಕುಟುಂಬದ ಹೆಣ್ಣು ಮಗಳಾಗಿ ಸುಮನ್ ರಂಗನಾಥ್ ನಟನೆ ಇಷ್ಟವಾಗುತ್ತೆ.

ಕಥೆಗಿಂತ ಮಾತೇ ಎಲ್ಲ.!

'ನೀರ್ ದೋಸೆ' ಚಿತ್ರದಲ್ಲಿ ಮಾತೇ ಬಂಡವಾಳ. ನಿರ್ದೇಶಕ ವಿಜಯ್ ಪ್ರಸಾದ್ ಕಥೆಗಿಂತ ಸಂಭಾಷಣೆ ಬಗ್ಗೆ ಹೆಚ್ಚು ತಲೆ ಕೆಡಿಸಿಕೊಂಡಂತಿದೆ. ಡೈಲಾಗ್ ಗಳಲ್ಲಿ ಅರ್ಥ, ಒಳಾರ್ಥ, ಅಪಾರ್ಥ, ಅಪಾರ ಅರ್ಥಗಳು ಸಾಕಷ್ಟಿವೆ.

ಬಾಡೂಟದ ಮಾತು ಹೆಚ್ಚು!

ನೀರ್ ದೋಸೆ ಮತ್ತು ಫಿಶ್ ಕರಿ ಕಾಂಬಿನೇಷನ್ ಇದ್ದ ಹಾಗೆ, 'ನೀರ್ ದೋಸೆ' ಚಿತ್ರದಲ್ಲಿ ನಾನ್ ವೆಜ್ ಜೋಕ್ ಗಳೇ ಫುಲ್ ಮೀಲ್ಸ್.

ಅಲ್ಲಲ್ಲಿ ಸಂದೇಶ ಕೂಡ ಇದೆ

'ನೀರ್ ದೋಸೆ' ಚಿತ್ರದಲ್ಲಿ ಆಮ್ಲೆಟ್ ಡೈಲಾಗ್ ಗಳ ಜೊತೆಗೆ ಮಾನವೀಯತೆಯ ಮೌಲ್ಯಗಳು ಕೂಡ ಇವೆ.

ಸಂಗೀತ ಚೆನ್ನಾಗಿದೆ

ಅನೂಪ್ ಸೀಳಿನ್ ಸಂಗೀತ ನಿರ್ದೇಶನದ ಎರಡು ಹಾಡುಗಳು ಚೆನ್ನಾಗಿವೆ.

ಫ್ಯಾಮಿಲಿ ಆಡಿಯನ್ಸ್ ಗೆ ಕಷ್ಟ ಕಷ್ಟ.!

ಗಂಡ, ಹೆಂಡತಿ, ಮಕ್ಕಳು, ಅಜ್ಜಿ, ತಾತಾ...ಹೀಗೆ ಇಡೀ ಕುಟುಂಬ ಕೂತು 'ನೀರ್ ದೋಸೆ' ಸವಿಯಲು ಕಷ್ಟ. ಹೇಳಿ ಕೇಳಿ ಇದು A ಸರ್ಟಿಫಿಕೇಟ್ ಸಿನಿಮಾ ಅನ್ನೋದು ನೆನಪಿರಲಿ.

ಫೈನಲ್ ಸ್ಟೇಟ್ ಮೆಂಟ್

'ನೀರ್ ದೋಸೆ' ಚಿತ್ರದಲ್ಲಿ ಮನರಂಜನೆ ಗ್ಯಾರೆಂಟಿ. ಎಲ್ಲೂ ಬೋರ್ ಆಗಲ್ಲ. ಪಡ್ಡೆ ಹುಡುಗ್ರಿಗೆ ಟೈಮ್ ಪಾಸ್ ಸಿನಿಮಾ. ಡಬಲ್ ಮೀನಿಂಗ್ ಮಾತುಗಳನ್ನ ಎಂಜಾಯ್ ಮಾಡುವವರು 'ನೀರ್ ದೋಸೆ' ಸಿನಿಮಾ ನೋಡಿ ಮಜಾ ಮಾಡಬಹುದು. ಆದ್ರೆ, ನೀವು ಯಾರ ಜೊತೆ ಸಿನಿಮಾ ನೋಡ್ತೀರಾ ಎಂಬುದರ ಬಗ್ಗೆ ಎಚ್ಚರ ವಹಿಸಿ. ಬಾಡೂಟ ಕಂಡ್ರೆ ಮೂಗು ಮುಚ್ಚಿಕೊಳ್ಳುವ ಹಾಗಿದ್ರೆ, ನಿಮಗೆ 'ನೀರ್ ದೋಸೆ' ಬ್ಯಾಡ್ ಚಾಯ್ಸ್.