ಅಭಿಮನ್ಯು ವಿಮರ್ಶೆ: ಕುಟುಂಬ ಸಮೇತ ಹೋಗಿ ನೋಡಿ

ಅಭಿಮನ್ಯು ಹೋರಾಟ ಮೆಚ್ಚಬೇಕಾದ್ದೇ..!

ಇಲ್ಲಿವರೆಗೂ ದೇಶದ ಅವ್ಯವಸ್ಥೆ, ಭ್ರಷ್ಟಾಚಾರದ ವಿರುದ್ಧ ಅನೇಕ ಸಿನಿಮಾಗಳು ಬಂದುಹೋಗಿವೆ. ಆದ್ರೆ ಶಿಕ್ಷಣ ವ್ಯವಸ್ಥೆಯಲ್ಲಾಗ್ತಿರೋ 'ವ್ಯಾಪರ'ದ ವಿರುದ್ಧ ದನಿಯೆತ್ತಿರುವವರು ಬಹಳ ಕಡಿಮೆ. ಮಕ್ಕಳಿಗೆ ಉತ್ತಮ ಶಿಕ್ಷಣ ಕೊಡಿಸಬೇಕು ಅಂತ ಸಾಲದ ಶೂಲದಲ್ಲಿ ಸಿಲುಕಿ ನಲುಗುವ ಮಾಧ್ಯಮ ಹಾಗೂ ಕೆಳವರ್ಗದ ಕುಟುಂಬಗಳ ಪ್ರತಿನಿಧಿಯಾಗಿ ಅಭಿಮನ್ಯು ಹೋರಾಟ ವಾಸ್ತವಕ್ಕೂ ಅವಶ್ಯಕ ಅಂತ ಭಾಸವಾಗುತ್ತೆ.

ವಾಸ್ತವಕ್ಕೆ ತೀರಾ ಹತ್ತಿರ..!

ಅಭಿಮನ್ಯು ಚಿತ್ರದ ಕಥಾವಸ್ತು ವಾಸ್ತವಕ್ಕೆ ತೀರಾ ಹತ್ತಿರವಾಗಿದೆ. ಚಿತ್ರ ನೋಡುತ್ತಿರುವ ಅದೆಷ್ಟೋ ಕುಟುಂಬಗಳು, 'ಇದು ನಮ್ಮ ಜೀವನದಲ್ಲೂ ನಡೆದಿರೋ ಘಟನೆ' ಅನ್ನುತ್ತಲೇ ಕಣ್ಣಾಲಿಗಳನ್ನ ಒದ್ದೆ ಮಾಡಿಕೊಳ್ಳುತ್ತಾರೆ.

ಅರ್ಜುನ್ ಸರ್ಜಾ ಆಕ್ಟಿಂಗ್ ಗೆ ಅಭಿಮಾನಿಗಳು ಫಿದಾ

ಅಭಿಮನ್ಯು ಸಿನಿಮಾ ಮೂಲಕ ಅರ್ಜುನ್ ಸರ್ಜಾ ಈಸ್ ಬ್ಯಾಕ್ ಇನ್ ಆಕ್ಷನ್. ಕಟ್ಟುಮಸ್ತಾದ ಸಿಕ್ಸ್ ಪ್ಯಾಕ್ ಬಾಡಿಯಿಂದ್ಲೇ ಎಂಟ್ರಿಕೊಡೋ ಅರ್ಜುನ್ ಸರ್ಜಾ ಆಕ್ಟಿಂಗ್ ಮತ್ತು ಭರ್ಜರಿ ಆಕ್ಷನ್ ಗೆ ಅಭಿಮಾನಿಗಳು ಶಿಳ್ಳೆ ಹಾಕದೆ ಚಪ್ಪಾಳೆ ತಟ್ಟದೆ ಸುಮ್ಮನೆ ಕೂರೋಲ್ಲ.

ನಾಟಕೀಯ ಅನಿಸದ ಫೈಟುಗಳು

ಹೇಳಿಕೇಳಿ ಅರ್ಜುನ್ ಸರ್ಜಾ ಆಕ್ಷನ್ ಕಿಂಗ್ ಅಂತ್ಲೇ ಜನಪ್ರಿಯ. ಹೀಗಾಗಿ ಭರ್ಜರಿ ಆಕ್ಷನ್ ಚಿತ್ರದಲ್ಲಿದೆ. ಆದ್ರೆ ಯಾವ ಫೈಟೂ ತೀರಾ ನಾಟಕೀಯ, ಅವಾಸ್ತವಿಕ ಅಂತ ಅನಿಸೋಲ್ಲ. ಎಂದಿನ ಅರ್ಜುನ್ ಸ್ಟೈಲ್ ನಲ್ಲೇ ಕರಾಟೆ ಕಿಕ್ ಜೋರಾಗಿದೆ.

ಜಹಾಂಗೀರ್ ಕಾಮಿಡಿ ಕಿಕ್

ಸೆಂಟಿಮೆಂಟ್ ಮತ್ತು ಆಕ್ಷನ್ ಮಧ್ಯೆ ಪ್ರೇಕ್ಷಕರಿಗೆ ಜಹಾಂಗೀರ್ ಕಾಮಿಡಿ ಕೊಂಚ ರಿಲೀಫ್ ಕೊಡುತ್ತೆ. ನಾಯಕಿ ಸುರ್ವೀನ್ ಚಾವ್ಲಾ ಮತ್ತು ಶಾರ್ಲೆಟ್ ಕ್ಲೇರ್ ತೆರೆ ಮೇಲೆ ದಂತದ ಗೊಂಬೆಗಳಷ್ಟೇ ಹೊರತು ನಟನೆಗೆ ಅಷ್ಟು ಅವಕಾಶ ಸಿಕ್ಕಿಲ್ಲ.

ಕಮಾಲ್ ಮಾಡದ ಅರ್ಜುನ್ ಜನ್ಯ ಮ್ಯೂಸಿಕ್

ಮಸ್ತ್ ಮಸ್ತ್ ಹಾಡುಗಳಿಂದ ಇಲ್ಲಿವರೆಗೂ ಸದ್ದು ಮಾಡಿದ್ದ ಅರ್ಜುನ್ ಜನ್ಯ, ಅಭಿಮನ್ಯು ಚಿತ್ರದಲ್ಲಿ ಕೊಂಚ ಮಂಕಾಗಿದ್ದಾರೆ. ಇದಕ್ಕೆ ಅಭಿಮನ್ಯು ಚಿತ್ರ ಮ್ಯೂಸಿಕಲ್ ಸಿನಿಮಾ ಅಲ್ಲದೇ ಇರೋದು ಕಾರಣವಾಗಿರಬಹುದು. ಆದ್ರೆ, ಅಮರ್ ಮೋಹಿಲೆ ಹಿನ್ನಲೆ ಸಂಗೀತ ಮನಮುಟ್ಟುವಂತಿದೆ.

ವೇಣು ಕ್ಯಾಮರಾ ಕೈಚಳಕ

ಎಚ್.ಸಿ.ವೇಣುಗೋಪಾಲ್ ಕ್ಯಾಮರಾ ವರ್ಕ್ ಪ್ರೇಕ್ಷಕರ ಕಣ್ಣಿಗೆ ಹಬ್ಬ. ಇನ್ನೂ ಕೆ.ಕೆ ಸಂಕಲನ ಚುರುಕಾಗಿದೆ.

ಉತ್ತಮ ಸಂದೇಶ

ಫ್ಲ್ಯಾಶ್ ಬ್ಯಾಕ್ ನರೇಷನ್ ಇರೋ ಅಭಿಮನ್ಯು ಚಿತ್ರ ಕಡೆವರೆಗೂ ಪ್ರೇಕ್ಷಕರನ್ನ ಹಿಡಿದಿಡುವಲ್ಲಿ ಯಶಸ್ವಿಯಾಗುತ್ತೆ. ಹಳೇ ಲವ್ ಸ್ಟೋರಿ ಮತ್ತು ಲಾಂಗು ಮಚ್ಚುಗಳ ಅಬ್ಬರದ ನಡುವೆ ಮಕ್ಕಳ ಶಿಕ್ಷಣ ಹಕ್ಕುಗಳ ಬಗ್ಗೆ ಸಂದೇಶ ಸಾರುವ 'ಅಭಿಮನ್ಯು' ಇಡೀ ಫ್ಯಾಮಿಲಿ ಕೂತು ನೋಡಲೇಬೇಕಾದ ಸಿನಿಮಾ.