'ಕಾಂತಾರ 2' ನೋಡಿದ ಹಾಗಾಯ್ತು; 'ವೇದ' ಚಿತ್ರಕ್ಕೆ ತಮಿಳು ಪ್ರೇಕ್ಷಕರ ಜೈಕಾರ!

ಕನ್ನಡದಿಂದ ಒಳ್ಳೊಳ್ಳೆ ಚಿತ್ರ ಬರುತ್ತಿವೆ

ಚಿತ್ರವನ್ನು ವೀಕ್ಷಿಸಿದ ನಂತರ ಕ್ಯಾಮೆರಾ ಮುಂದೆ ಬಂದು ಮಾತನಾಡಿದ ಪ್ರತಿಯೊಬ್ಬರೂ ಸಹ ಕನ್ನಡ ಚಿತ್ರರಂಗದಿಂದ ಇತ್ತೀಚೆಗೆ ಬರುತ್ತಿರುವ ಚಿತ್ರಗಳು ನಿಜಕ್ಕೂ ಅದ್ಭುತ ಎಂಬ ಅಭಿಪ್ರಾಯವನ್ನೇ ವ್ಯಕ್ತಪಡಿಸಿದರು. ಅದರಲ್ಲಿಯೂ ಈ ವರ್ಷ ಕೆಜಿಎಫ್ ಚಾಪ್ಟರ್ 2 ಹಾಗೂ ಕಾಂತಾರ ನೀಡಿದ್ದ ಕನ್ನಡ ಚಿತ್ರರಂಗ ಇದೀಗ ವೇದ ಎಂಬ ಅದ್ಭುತ ಚಿತ್ರವನ್ನು ನೀಡಿ ಮತ್ತೆ ಗೆದ್ದಿದೆ ಎಂದು ಹೊಗಳಿದರು.

ಕಾಂತಾರ ರೀತಿಯೇ ಇಷ್ಟವಾಯಿತು, ಇದು ಕಾಂತಾರ 2!

ಇದೇ ಆಡಿಯನ್ಸ್ ರೆಸ್ಪಾನ್ಸ್ ವಿಡಿಯೊದಲ್ಲಿ ಪ್ರೇಕ್ಷಕನೋರ್ವ ವೇದ ಚಿತ್ರವನ್ನು ಕಾಂತಾರ ಚಿತ್ರಕ್ಕೆ ಹೋಲಿಕೆ ಮಾಡಿದ್ದಾರೆ. ವೇದ ಚಿತ್ರವನ್ನು ನೋಡುತ್ತಿರಬೇಕಾದರೆ ನನಗೆ ಕಾಂತಾರ ಚಿತ್ರವನ್ನು ನೋಡಿದ ಅನುಭವವಾಯಿತು, ಇದನ್ನು ಕಾಂತಾರ ಎರಡನೇ ಭಾಗ ಎಂದುಕೊಂಡೇ ನೋಡಿದೆ, ಅಷ್ಟು ಅಚ್ಚುಕಟ್ಟಾಗಿ, ಮಾಸ್ ಆಗಿ ನಿರ್ಮಿಸಿದ್ದಾರೆ ಎಂದು ಹೇಳಿದರು.

ಈಗ ಕನ್ನಡ ಚಿತ್ರಗಳು ತಮಿಳು ಸಮಕ್ಕೆ ಬಂದಿವೆ

ಈಗ ಬಿಡಿ ಕನ್ನಡ ಚಿತ್ರಗಳು ನಮ್ಮ ತಮಿಳು ಸಮಕ್ಕೆ ಬಂದು ನಿಂತಿವೆ ಎಂದು ತಮಿಳಿನ ಸಿನಿ ಪ್ರೇಕ್ಷಕ ಕನ್ನಡ ಚಿತ್ರರಂಗದ ಬೆಳವಣಿಗೆಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ ಹಾಗೂ ಇಂತಹ ಉತ್ತಮ ಚಿತ್ರಗಳನ್ನು ಡಬ್ ಮಾಡಿ ಬಿಡುಗಡೆ ಮಾಡಿದರೆ ನೋಡುತ್ತೇವೆ, ಇಲ್ಲಿಯವರೆಗೆ ಹೇಗೆ ಪ್ರೋತ್ಸಹಿಸಿದೆವೋ ಅದಕ್ಕಿಂತ ಹೆಚ್ಚಿನ ಪ್ರೋತ್ಸಾಹ ನೀಡುತ್ತೇವೆ ಎಂದು ಹೇಳಿಕೆ ನೀಡಿದ್ದಾರೆ.

ಕಾಂತಾರ ರೀತಿಯೇ ನಿಧಾನಕ್ಕೆ ಅಬ್ಬರಿಸಲಿದೆ ವೇದ

ಇನ್ನು ಕಾಂತಾರ ಚಿತ್ರ ಹೇಗೆ ಆರಂಭದಲ್ಲಿ ಸಣ್ಣದಾಗಿ ಬಿಡುಗಡೆಗೊಂಡು ನಂತರದ ದಿನಗಳಲ್ಲಿ ಬೆಂಕಿಯಂತೆ ಪಸರಿಸಿ ಅಬ್ಬರಿಸಿತೋ ಅದೇ ರೀತಿ ವೇದ ಕೂಡ ನಿಧಾನವಾಗಿ ಅಬ್ಬರಿಸುವುದು ಖಚಿತ ಎಂದು ಮತ್ತೋರ್ವ ತಮಿಳು ಪ್ರೇಕ್ಷಕ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಇನ್ನು ಚಿತ್ರದ ಮೇಕಿಂಗ್, ನಟ ನಟಿಯರ ನಟನೆ ಹಾಗೂ ಚಿತ್ರದ ಸಂದೇಶದ ಕುರಿತು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.