ಒಂದೇ ಚಿತ್ರದಲ್ಲಿ ವಿಜಯ್ - ರಕ್ಷಿತ್ ಶೆಟ್ಟಿ ನಟನೆ? 'ವಿಕ್ರಮ್' ಲೋಕೇಶ್ ಕನಕರಾಜ್ ನಿರ್ದೇಶಕ!

ಲೋಕೇಶ್ ಕನಕರಾಜ್ ಚಿತ್ರದಲ್ಲಿ ನಟನೆ!

ಮಾನಗರಂ, ಖೈದಿ, ಮಾಸ್ಟರ್ ಹಾಗೂ ವಿಕ್ರಮ್ ರೀತಿಯ ಹಿಟ್ ಚಿತ್ರಗಳನ್ನು ನಿರ್ದೇಶಿಸಿ ಸ್ಟಾರ್ ನಿರ್ದೇಶಕನ ಪಟ್ಟ ಗಿಟ್ಟಿಸಿಕೊಂಡಿರುವ ನಂಬುಗೆಯ ನಿರ್ದೇಶಕ ಲೋಕೇಶ್ ಕನಕರಾಜ್ ನಿರ್ದೇಶನದ ಮುಂದಿನ ಚಿತ್ರದಲ್ಲಿ ರಕ್ಷಿತ್ ಶೆಟ್ಟಿ ಪ್ರಮುಖ ಪಾತ್ರವೊಂದರಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎಂಬ ಸುದ್ದಿ ಹರಿದಾಡುತ್ತಿದೆ. ಈ ಚಿತ್ರದಲ್ಲಿ ದಳಪತಿ ವಿಜಯ್ ನಾಯಕ ನಟನಾಗಿ ಕಾಣಿಸಿಕೊಳ್ಳಲಿದ್ದಾರೆ. ಇನ್ನು ಈ ಸುದ್ದಿಯನ್ನು ಸಿನಿಮಾ ಪರಿಣಿತರು ಹಂಚಿಕೊಂಡಿದ್ದು, ಚಿತ್ರತಂಡ ಈ ಬಗ್ಗೆ ಇನ್ನೂ ಅಧಿಕೃತ ಮಾಹಿತಿಯನ್ನು ಹಂಚಿಕೊಂಡಿಲ್ಲ.

ಚಿತ್ರದಲ್ಲಿ ಇರಲಿದ್ದಾರೆ ಬೇರೆ ಚಿತ್ರರಂಗದ ನಟರು

ಇನ್ನು ಮೊದಲೇ ಹೇಳಿದಂತೆ ಇಂಡಸ್ಟ್ರಿಯ ಬೇಲಿಯನ್ನು ದಾಟಿ ನಟರು ಬೇರೆ ಭಾಷೆಯ ಚಿತ್ರಗಳಲ್ಲಿ ನಟಿಸುತ್ತಿದ್ದು, ವಿಜಯ್ ಹಾಗೂ ಲೋಕೇಶ್ ಕನಕರಾಜ್ ಕಾಂಬಿನೇಶನ್‌ನ ಈ ಚಿತ್ರದಲ್ಲೂ ಸಹ ವಿವಿಧ ಚಿತ್ರರಂಗದ ಸ್ಟಾರ್ ನಟರು ನಟಿಸಲಿದ್ದಾರೆ. ಕನ್ನಡದ ರಕ್ಷಿತ್ ಶೆಟ್ಟಿ ನಟಿಸಲಿದ್ದಾರೆ ಎನ್ನಲಾಗುತ್ತಿದ್ದು, ಮಲಯಾಳಂನ ನಿವಿನ್ ಪೌಲಿ, ಪೃಥ್ವಿರಾಜ್ ಸುಕುಮಾರನ್ ಹಾಗೂ ಬಾಲಿವುಡ್‌ನ ಸಂಜಯ್ ದತ್ ಸಹ ಚಿತ್ರದಲ್ಲಿ ನಟಿಸಲಿದ್ದಾರೆ ಎಂಬ ಸುದ್ದಿ ಇದೆ. ಇನ್ನು ನಾಯಕಿಯರಾಗಿ ತ್ರಿಶಾ ಕೃಷ್ಣನ್ ಹಾಗೂ ಕೀರ್ತಿ ಸುರೇಶ್ ನಟಿಸಲಿದ್ದಾರೆ.

ಜನವರಿ 22ರಂದು ಅಪ್‌ಡೇಟ್

ಇನ್ನು ಸಂದರ್ಶನವೊಂದರಲ್ಲಿ ಈ ಚಿತ್ರದ ಕುರಿತಾಗಿ ಮಾತನಾಡಿದ್ದ ನಿರ್ದೇಶಕ ಲೋಕೇಶ್ ಕನಕರಾಜ್ ಜನವರಿ 22ರಂದು ಚಿತ್ರದ ಅಪ್‌ಡೇಟ್ ಸಿಗಲಿವೆ ಎಂದಿದ್ದರು. ಚಿತ್ರವನ್ನು ಚೆನ್ನೈ ಹಾಗೂ ಕಾಶ್ಮೀರದಲ್ಲಿ ಹೆಚ್ಚಾಗಿ ಚಿತ್ರೀಕರಿಸಲಾಗುವುದು. ಕಳೆದ ವರ್ಷ ವಿಕ್ರಮ್ ಮೂಲಕ ಮೋಡಿ ಮಾಡಿದ್ದ ಲೋಕೇಶ್ ಕನಕರಾಜ್ ತಮ್ಮದೇ ಆದ ಸಿನಿಮಾ ಯೂನಿವರ್ಸ್ ಸೃಷ್ಟಿಸಲಿದ್ದು, ಯಾವ ಯಾವ ನಟರನ್ನು ಇದರಲ್ಲಿ ಸೇರಿಸಿಕೊಳ್ಳಲಿದ್ದಾರೆ ಎಂಬ ಕುತೂಹಲ ಮೂಡಿದೆ. ಹಾಗೂ ಇನ್ನುಮುಂದೆ ತಾನು ಮಾಡುವ ಚಿತ್ರಗಳೆಲ್ಲಾ ಸಂಪೂರ್ಣವಾಗಿ ತನ್ನ ಶೈಲಿಯಲ್ಲೇ ಇರಲಿದೆ, ಯಾವುದಕ್ಕೂ ರಾಜಿಯಾಗುವುದಿಲ್ಲ ಎಂದು ಲೋಕೇಶ್ ತಿಳಿಸಿದ್ದರು. ಈ ಮೂಲಕ ಈ ಬಾರಿ ವಿಜಯ್ ಹೊಸ ರೀತಿಯ ಪಾತ್ರ ನಿಭಾಯಿಸುವುದಂತೂ ಪಕ್ಕಾ ಎನ್ನಬಹುದು.