'ಪುಷ್ಪ' ಸಿನಿಮಾ: ಆಕಾಶ ಮುಟ್ಟಿದ ಅಲ್ಲು ಅರ್ಜುನ್ ಸಂಭಾವನೆ!

ದೊಡ್ಡ ಮೊತ್ತದ ಸಂಭಾವನೆ ಪಡೆಯುತ್ತಿರುವ ಅಲ್ಲು ಅರ್ಜುನ್

'ಪುಷ್ಪ' ಸಿನಿಮಾಕ್ಕಾಗಿ ಅಲ್ಲು ಅರ್ಜುನ್ ಬರೋಬ್ಬರಿ ಅರ್ಧ ಶತಕೋಟಿ ಸಂಭಾವನೆ ಪಡೆಯುತ್ತಿದ್ದಾರೆ. ಅಂದರೆ ಬರೋಬ್ಬರಿ 50 ಕೋಟಿ ರೂಪಾಯಿ! ಸಂಭಾವನೆ ಜೊತೆಗೆ ಸಿನಿಮಾದ ಒಟ್ಟು ಕಲೆಕ್ಷನ್‌ನ ಒಂದಿಷ್ಟು ಭಾಗವನ್ನು ಅಲ್ಲು ಅರ್ಜುನ್ ತೆಗೆದುಕೊಳ್ಳಲಿದ್ದಾರೆ. ಸಿನಿಮಾದ ಲಾಭದ ನಿರ್ದಿಷ್ಟ ಭಾಗವನ್ನು ಹೀರೋಗೆ ಕೊಡುವುದು ತೆಲುಗು ಸಿನಿರಂಗದಲ್ಲಿ ಸಾಮಾನ್ಯ. ಒಂದು ವೇಳೆ ಸಿನಿಮಾ ಫ್ಲಾಪ್ ಆದರೆ ಹೀರೋ ತನ್ನ ಸಂಭಾವನೆ ಕಡಿತಗೊಳಿಸಿಕೊಳ್ಳುತ್ತಾನೆ.

35 ಕೋಟಿ ಇದ್ದ ಅಲ್ಲು ಅರ್ಜುನ್ ಸಂಭಾವನೆ

'ಅಲಾ ವೈಕುಂಟಪುರಂಲೋ' ಸಿನಿಮಾಕ್ಕೆ ಅಲ್ಲು ಅರ್ಜುನ್ 35 ಕೋಟಿ ರು ಸಂಭಾವನೆ ಪಡೆದಿದ್ದರು. ಆ ಸಿನಿಮಾದಲ್ಲಿ ನಾಯಕಿಯಾಗಿ ನಟಿಸಿದ್ದ ಕರ್ನಾಟಕ ಮೂಲದ ನಟಿ ಪೂಜಾ ಹೆಗ್ಡೆ ಸಹ ತಮ್ಮ ಸಂಭಾವನೆಯನ್ನು ಏರಿಸಿಕೊಂಡರು. ಅಲ್ಲು ಅರ್ಜುನ್ 50 ಕೋಟಿ ಪಡೆಯುತ್ತಿರುವುದು ಒಂದು ಭಾಗಕ್ಕೆ ಮಾತ್ರ. ಪುಷ್ಪ ಸಿನಿಮಾದ ಎರಡೂ ಭಾಗಕ್ಕೆ ಒಟ್ಟು 100 ಕೋಟಿ ಪಡೆಯಲಿದ್ದಾರೆ.

ಪ್ರಭಾಸ್ ನಂತರ ಹೆಚ್ಚು ಸಂಭಾವನೆ ಪಡೆದ ತೆಲುಗು ನಟ

ದೊಡ್ಡ ಮೊತ್ತದ ಸಂಭಾವನೆ ಪಡೆವ ಮೂಲಕ ಪ್ರಭಾಸ್ ನಂತರ ಸಿನಿಮಾ ಒಂದಕ್ಕೆ ಅತಿ ಹೆಚ್ಚು ಸಂಭಾವನೆ ಪಡೆದ ತೆಲುಗಿನ ನಾಯಕ ನಟರಾಗಿದ್ದಾರೆ ಅಲ್ಲು ಅರ್ಜುನ್. ಚಿರಂಜೀವಿ, ಜೂ.ಎನ್‌ಟಿಆರ್ ಸಹ ಯಾವ ಸಿನಿಮಾಕ್ಕೂ 50 ಕೋಟಿ ಸಂಭಾವನೆ ಪಡೆದಿಲ್ಲ.

Recommended Video

ಮನೆಬಾಗಿಲಿಗೆ ಆಕ್ಸಿಜನ್ ಬರ್ಬೇಕಾ? ಹಾಗಾದ್ರೆ ಸೋನು ಸೂದ್ ಸಂಪರ್ಕಿಸಿ | Filmibeat Kannada

ರಶ್ಮಿಕಾ ನಾಯಕಿ, ಫಹಾದ್ ಫಾಸಿಲ್ ವಿಲನ್

'ಪುಷ್ಪ' ಸಿನಿಮಾದ ಚಿತ್ರೀಕರಣವು ಅಂತಿಮ ಹಂತದಲ್ಲಿದ್ದು ಕೊರೊನಾ ಕಾರಣದಿಂದ ಚಿತ್ರೀಕರಣ ನಿಂತಿದೆ. ಸಿನಿಮಾವು ಎರಡು ಭಾಗಗಳಲ್ಲಿ ಬಿಡುಗಡೆ ಆಗಲಿದೆ. ಸಿನಿಮಾದಲ್ಲಿ ರಶ್ಮಿಕಾ ಮಂದಣ್ಣ ನಾಯಕಿಯಾಗಿದ್ದು, ಸುಕುಮಾರ್ ನಿರ್ದೇಶನ ಮಾಡಿದ್ದಾರೆ. ಮಲಯಾಳಂನ ಖ್ಯಾತ ನಟ ಫಹಾದ್ ಫಾಸಿಲ್ ವಿಲನ್ ಪಾತ್ರದಲ್ಲಿ ನಟಿಸಿದ್ದಾರೆ. ಸಿನಿಮಾವನ್ನು ಮೈತ್ರಿ ಮೂವೀಸ್ ನಿರ್ಮಾಣ ಮಾಡಿದ್ದಾರೆ.