2 ಸಿನಿಮಾ ಸೋತ್ರೂ ಪ್ರಭಾಸ್‌ಗೆ ಕಮ್ಮಿಯಾಗಿಲ್ಲ ಡಿಮ್ಯಾಂಡ್: 'ಪ್ರಾಜೆಕ್ಟ್ ಕೆ'ಗೆ ಬೆಂಕಿ ಬೆಲೆ!

'ಪ್ರಾಜೆಕ್ಟ್‌ ಕೆ'ಗೆ ಮಸ್ತ್ ಡಿಮ್ಯಾಂಡ್

ಪ್ರಭಾಸ್ ನಟಿಸುತ್ತಿರುವ 'ಪ್ರಾಜೆಕ್ಟ್ ಕೆ' ಸಿನಿಮಾಗೆ ಭಾರಿ ಡಿಮ್ಯಾಂಡ್ ಬಂದಿದೆಯಂತೆ. ನಿಜಾಂ ಏರಿಯಾದಲ್ಲಿ ಈ ಸಿನಿಮಾ ರಿಲೀಸ್ ಮಾಡುವುದಕ್ಕೆ ವಿತರಕರು ತುದಿಗಾಲಲ್ಲಿ ನಿಂತಿದ್ದಾರಂತೆ. ಹೀಗೊಂದು ಸುದ್ದಿ ಟಾಲಿವುಡ್‌ ಮಾಧ್ಯಮಗಳಲ್ಲಿ ಸುದ್ದಿಯಾಗಿದೆ. ನಿಜಾಂ ಜೊತೆ ಆಂಧ್ರ ಹಾಗೂ ಸೀಡೆಡ್‌ಗಳಲ್ಲೂ ಬೇಡಿಕೆ ಹೆಚ್ಚಿದೆಯಂತೆ. ಪ್ರಭಾಸ್ ಅಭಿನಯದ ಎರಡು ಸಿನಿಮಾಗಳು ಹೀನಾಯವಾಗಿ ಸೋತರೂ ವಿತರಕರು ಸಿನಿಮಾ ಕೊಂಡು ಕೊಳ್ಳುವುದಕ್ಕೆ ತುದಿಗಾಲಲ್ಲಿ ನಿಂತಿದ್ದಾರೆ ಎನ್ನಲಾಗುತ್ತಿದೆ.

ವಿತರಕರು ಇಟ್ಟ ಬೇಡಿಕೆ ಎಷ್ಟು?

ನಿಜಾಂ ಏರಿಯಾ ಒಂದರಲ್ಲಿಯೇ 'ಪ್ರಾಜೆಕ್ಟ್‌ ಕೆ' ಸಿನಿಮಾವನ್ನು ವಿತರಣೆ ಮಾಡುವುದಕ್ಕೆ 70 ರಿಂದ 80 ಕೋಟಿ ರೂ. ಕೊಡೋಕೆ ರೆಡಿಯಾಗಿದ್ದಾರೆ ಅನ್ನೋದು ಸುದ್ದಿ. ಆದರೆ, ನಿರ್ಮಾಪಕರು 80 ಕೋಟಿ ರೂ. ಡಿಮ್ಯಾಂಡ್ ಇಟ್ಟಿದ್ದಾರಂತೆ. ಈ ವಿಷಯಕ್ಕೆ ಸಂಬಂಧಿಸಿದಂತೆ ವಿತರಕರು ಹಾಗೂ ನಿರ್ಮಾಪಕರ ನಡುವೆ ಮಾತುಕತೆ ನಡೆಯುತ್ತಿದೆಯಂತೆ. ಮೂಲಗಳ ಪ್ರಕಾರ, ವಿತರಖ ಸುನಿಲ್ ನಾರಂಗ್ ನಿಜಾಂನಲ್ಲಿ 'ಪ್ರಾಜೆಕ್ಟ್ ಕೆ' ಅನ್ನು ರಿಲೀಸ್ ಮಾಡಬಹುದು ಎನ್ನಲಾಗುತ್ತಿದೆ.

ಆಂಧ್ರ–ತೆಲಂಗಾಣದಲ್ಲಿ ಹೇಗಿದೆ ಡಿಮ್ಯಾಂಡ್

ನಿಜಾಂ ಅಷ್ಟೇ ಅಲ್ಲ. ಆಂಧ್ರ ಹಾಗೂ ಸೀಡೆಡ್ ಎರಡೂ ಏರಿಯಾಗಳಲ್ಲೂ ಥಿಯೇಟರ್‌ ಹಕ್ಕುಗಳಿಗೆ ಭಾರೀ ಬೇಡಿಕೆ ಇದೆಯಂತೆ. ಮೂಲಗಳ ಪ್ರಕಾರ, ಆಂಧ್ರ ಹಾಗೂ ಸೀಡೆಡ್‌ನಿಂದ 'ಪ್ರಾಜೆಕ್ಟ್ ಕೆ' ಬ್ಯುಸಿನೆಸ್ 100 ಕೋಟಿ ರೂ. ದಾಟಬಹುದು ಎನ್ನಲಾಗಿದೆ. ಅಲ್ಲದೆ ಕೇವಲ ತೆಲುಗು ರಾಜ್ಯಗಳಿಂದಲೇ ಸುಮಾರು 170 ರಿಂದ 180 ಕೋಟಿ ರೂ. ಬ್ಯುಸಿನೆಸ್ ಆಗಬಹುದು ಎಂದು ಅಂದಾಜಿಸಲಾಗಿದೆ. 'RRR' ಹಾಗೂ 'ಬಾಹುಬಲಿ' ಸಿನಿಮಾಗಳಿಗಿಂತ ದೊಡ್ಡ ಮೊತ್ತಕ್ಕೆ ಸೇಲ್ ಆಗಲಿದೆ ಎಂದು ಟ್ರೇಡ್ ಅನಲಿಸ್ಟ್‌ಗಳು ಲೆಕ್ಕಾಚಾರ ಹಾಕಿದ್ದಾರೆ.

ದಕ್ಷಿಣದ ಭಾಷೆಗಳಲ್ಲೂ 'ಪ್ರಾಜೆಕ್ಟ್‌ ಕೆ'ಗೆ ಬೇಡಿಕೆ

400 ಕೋಟಿ ವೆಚ್ಚದಲ್ಲಿ 'ಪ್ರಾಜೆಕ್ಟ್ ಕೆ' ಸಿನಿಮಾ ನಿರ್ಮಾಣ ಆಗುತ್ತಿದೆ. ಹೀಗಾಗಿ ದೊಡ್ಡ ಮೊತ್ತದ ಬ್ಯುಸಿನೆಸ್ ಮಾಡಲೇಬೇಕಿದೆ. ತಮಿಳು, ಕನ್ನಡ ಹಾಗೂ ಮಲಯಾಳಂನಲ್ಲೂ ಬ್ಯುಸಿನೆಸ್‌ ಜೋರಾಗಿಯೇ ಇರುತ್ತೆ ಎಂದು ಅಂದಾಜಿಸಲಾಗಿದೆ. ಅಲ್ಲದೆ ಹಿಂದಿ ಭಾಷೆಯಲ್ಲಿ ಭಾರೀ ಮೊತ್ತಕ್ಕೆ ಸೋಲ್ಡ್ ಔಟ್ ಆಗುವ ಸಾಧ್ಯತೆಯಿದೆ ಎನ್ನಲಾಗಿದೆ.