ಕೊಲೆ ಮಾಡುವ 'ಕೋಳಿ ತಲೆ': ಭಯ ಹುಟ್ಟಿಸುತ್ತಿದೆ ಹಿಟ್ ಸಿನಿಮಾ ಸೀಕ್ವೆಲ್ ಟ್ರೈಲರ್

'ಕೋಳಿ ತಲೆ' ಕೊಲೆಗಾರ!

ಟ್ರೈಲರ್‌ನಲ್ಲಿ ತೋರಿಸಲಾಗಿರುವ ಕೆಲವು ದೃಶ್ಯ ಹಾಗೂ ಸಂಭಾಷಣೆಗಳೇ ಬೆನ್ನುಮೂಳೆಯಲ್ಲಿ ಭಯ ಏಳುವಂತಿವೆ. 'ಈ ರೀತಿಯ ಕೊಲೆಗಾರರು ಬಹಳ ದಡ್ಡರಾಗಿರುತ್ತಾರೆ, ಕೋಳಿ ತಲೆಯಂಥಹಾ ಬುದ್ಧಿಮತ್ತೆ ಇವರದ್ದು, ಐದು ನಿಮಿಷದಲ್ಲಿ ಇಂಥಹವರನ್ನು ಹಿಡಿದುಬಿಡುತ್ತೀವಿ' ಎಂದು ಪೊಲೀಸ್ ಅಧಿಕಾರಿ ಪಾತ್ರಧಾರಿ ಅಡವಿಶೇಷ್ ಹೇಳಿದ್ದನ್ನು ಅವಮಾನವಾಗಿ ಪರಿಗಣಿಸುವ ಹಂತಕ ಕೊಲೆ ಮಾಡಿ 'ಕೋಳಿ ತಲೆ' (ಕೋಡಿ ಬುರ್ಲು) ಎಂದು ರಕ್ತದಲ್ಲಿ ಬರೆವ ವಿಕೃತ ಕೊಲೆಗಾರನನ್ನು ಪೊಲೀಸ್ ಬೆನ್ನಟ್ಟುವ ಕತೆಯನ್ನು ಸಿನಿಮಾ ಒಳಗೊಂಡಿದೆ.

ಪೊಲೀಸ್ ಅಧಿಕಾರಿಗೆ ಹಲವು ಆತಂಕ

ತನ್ನದೇ ಹೇಳಿಕೆಯನ್ನು ಇಟ್ಟುಕೊಂಡು ಹಗೆ ಸಾಧಿಸುತ್ತಿರುವ ಅತ್ಯಂತ ಅಮಾನುಷವಾಗಿ ಕೊಲೆಗಳನ್ನು ಮಾಡುತ್ತಿರುವ ವ್ಯಕ್ತಿಯ ಹುಡುಕಾಟಕ್ಕೆ ಅಡವಿಶೇಷ್‌ ನಿರ್ವಹಿಸಿರುವ ಪೊಲೀಸ್ ಅಧಿಕಾರಿ ಪಾತ್ರಕ್ಕೆ ಹಲವು ಅಡ್ಡಿಗಳು ಎದುರಾಗುತ್ತವೆ. ಇಲಾಖೆಯಲ್ಲಿನ ಸಮಸ್ಯೆಗಳು, ಅಧಿಕಾರದ ಮಿತಿಯ ಸಮಸ್ಯೆ, ಕೊಲೆಗಾರನ ಅದ್ಭುತ ಬುದ್ಧಿಮತ್ತೆ, ಕೊಲೆಗಾರ ತನ್ನನ್ನೇ ಗುರಿ ಮಾಡಿಕೊಳ್ಳುವ ಆತಂಕ ಎಲ್ಲವನ್ನೂ ಮೀರಿ ಪೊಲೀಸ್ ಅಧಿಕಾರಿ ಕೊಲೆಗಾರನನ್ನು ಹೇಗೆ ಹಿಡಿಯುತ್ತಾನೆಂಬುದು ಸಿನಿಮಾದ ಕತೆ.

ಟ್ರೈಲರ್ ಅದ್ಭುತವಾಗಿದೆ

'ಹಿಟ್ 2' ಸಿನಿಮಾದ ಟ್ರೈಲರ್, ಇಡೀಯ ಸಿನಿಮಾದ ಸೂಕ್ಷ್ಮ ದರ್ಶನವನ್ನು ಮಾಡಿಸುತ್ತದೆ. ಕತೆ ಹೇಗೆ ಆರಂಭವಾಗುವ ಬಗ್ಗೆ ಒಂದು ಸುಳಿವು, ಕೊಲೆಗಾರ ಎಂಥಹವರನ್ನು ಗುರಿ ಮಾಡಿಕೊಳ್ಳುತ್ತಾನೆ ಎಂಬುದಕ್ಕೊಂದು ಸುಳಿವು, ಕೊಲೆಗಾರ ಎಷ್ಟು ಭೀಕರವಾಗಿ ಕೊಲೆ ಮಾಡುತ್ತಿದ್ದಾನೆ ಎಂಬುದರ ಬಗ್ಗೆ ಒಂದು ದೃಶ್ಯ, ಪೊಲೀಸ್ ತನಿಖಾಧಿಕಾರಿಗೆ ಎದುರಾಗುವ ಅಡ್ಡಿಗಳ ಬಗ್ಗೆ ಒಂದು ದೃಶ್ಯ, ಕೊಲೆಗಾರನ ಬಗ್ಗೆ ಪೊಲೀಸರಿಗೆ ಸಿಕ್ಕ ಸುಳಿವಿನ ಬಗ್ಗೆ ಒಂದು ದೃಶ್ಯ ಹೀಗೆ ಹಲವು ಸಣ್ಣ ಸಣ್ಣ ದೃಶ್ಯಗಳನ್ನು ಸೇರಿಸಿ ಒಟ್ಟಾರೆ ಸಿನಿಮಾದ ಬಗ್ಗೆ ದೊಡ್ಡ ಕುತೂಹಲವನ್ನು ಹುಟ್ಟುಹಾಕಲು ಟ್ರೈಲರ್ ಯಶಸ್ವಿಯಾಗಿದೆ.

ಸೈಲೇಶ್ ಕೋಲನು ನಿರ್ದೇಶನ

'ಹಿಟ್' ಮೊದಲ ಸಿನಿಮಾ ನಿರ್ದೇಶಿಸಿದ್ದ ಸೈಲೇಶ್ ಕೊಲನು ಅವರೇ ಎರಡನೇ ಭಾಗವನ್ನೂ ನಿರ್ದೇಶನ ಮಾಡುತ್ತಿದ್ದಾರೆ. ಸಿನಿಮಾವನ್ನು ಪ್ರಶಾಂತ್ ತಿಪ್ಪರಿನೇನಿ ಹಾಗೂ ಸ್ಟಾರ್ ನಟ ನಾನಿ ನಿರ್ಮಾಣ ಮಾಡಿದ್ದಾರೆ. ಸಿನಿಮಾದಲ್ಲಿ ಅಡವಿಶೇಷ್ ಜೊತೆಗೆ ಮೀನಾಕ್ಷಿ ಚೌಧರಿ, ರಾವ್ ರಮೇಶ್, ತನಿಕೇಳ ಭರಣಿ, ಪೋಸಾನಿ ಕೃಷ್ಣ ಮುರಳಿ ನಟಿಸಿದ್ದಾರೆ. ಸಂಗೀತ ಎಂಎಂ ಶ್ರೀಲೇಖ, ಸುರೇಶ್ ಬೊಬ್ಬಿಲಿ ಹಾಗೂ ಜಾನ್ ಸ್ಟಿವರ್ಟ್ ಎಡ್ವೀರಿ ನೀಡಿದ್ದಾರೆ. ಸಿನಿಮಾಕ್ಕೆ ಕ್ಯಾಮೆರಾ ಹಿಡಿದಿರುವುದು ಮಣಿ ಕಂಧನ್. ಈ ಸಿನಿಮಾವು ಡಿಸೆಂಬರ್ 02 ರಂದು ತೆರೆಗೆ ಬರಲಿದೆ.