8 ವರ್ಷಗಳ ಬಳಿಕ ನಟ ಉದಯ್ ಕಿರಣ್ ಆತ್ಮಹತ್ಯೆಗೆ ಟ್ವಿಸ್ಟ್; ನನಗೆಲ್ಲಾ ಕಾರಣ ಗೊತ್ತಿದೆ ಎಂದ ನಿರ್ದೇಶಕ ತೇಜಾ!

ನಾನು ಸಾಯುವ ಮುನ್ನ ಉದಯ್ ಕಿರಣ್ ಸಾವಿನ ಕಾರಣ ಬಿಚ್ಚಿಡುತ್ತೇನೆ

'ಸಾಲು ಸಾಲು ಹಿಟ್ ಕಂಡ ಉದಯ್ ಕಿರಣ್‌ಗೆ ಸ್ಟಾರ್‌ಡಂ ತಡೆದುಕೊಳ್ಳಲಾಗಲಿಲ್ಲ ಹಾಗೂ ಸೋಲು ಕಂಡ ನಂತರ ಕೆಳಗೆ ಬಿದ್ದದ್ದನ್ನೂ ಸಹ ಸಹಿಸಿಕೊಳ್ಳಲಾಗಲಿಲ್ಲ, ಆತ ಎರಡನ್ನೂ ಸಮನಾಗಿ ತೆಗೆದುಕೊಳ್ಳುವಲ್ಲಿ ವಿಫಲವಾಗಿದ್ದ. ಆತನ ಸಾವಿಗೆ ಕಾರಣವಾಗುವಂತೆ ನಡೆದದ್ದೇನು ಎಂಬುದು ನನಗೆ ಗೊತ್ತಿದೆ. ಆತ ತನ್ನನ್ನು ಕಾಡುತ್ತಿದ್ದ ವಿಷಯಗಳ ಬಗ್ಗೆ ನನ್ನ ಬಳಿ ಹೇಳಿಕೊಂಡಿದ್ದ. ಆದರೆ ಅದನ್ನು ನಾನು ಈಗ ಹೇಳುವುದಿಲ್ಲ, ನಾನು ಸಾಯುವ ಮುನ್ನ ಅದನ್ನು ಬಿಚ್ಚಿಡುತ್ತೇನೆ' ಎಂದು ನಿರ್ದೇಶಕ ತೇಜಾ ಇತ್ತೀಚೆಗೆ ನಡೆದ ಖಾಸಗಿ ವಾಹಿನಿಯ ಸಂದರ್ಶನವೊಂದರಲ್ಲಿ ತಿಳಿಸಿದರು.

ಸಾವಿನ ಹಿಂದೆ ಯಾರಾದರೂ ಪ್ರಭಾವಿ ವ್ಯಕ್ತಿ ಇದ್ದಾರಾ?

ಉದಯ್ ಕಿರಣ್ ಸಾವಿನ ರಹಸ್ಯ ಬಿಚ್ಚಿಡುತ್ತೇನೆ ಎಂಬ ಹೇಳಿಕೆಯನ್ನು ನಿರ್ದೇಶಕ ತೇಜಾ ಹೇಳಿದ ಬೆನ್ನಲ್ಲೇ ಸಂದರ್ಶಕರು ಈ ಸಾವಿನ ಹಿಂದೆ ಯಾರಾದರೂ ಪ್ರಭಾವಿ ವ್ಯಕ್ತಿಗಳ ಕೈವಾಡವಿದೆಯಾ ಎಂಬ ಪ್ರಶ್ನೆಯನ್ನು ಇಟ್ಟರು. ಆದರೆ ಈ ಪ್ರಶ್ನೆಗೆ 'ನೋ ಕಾಮೆಂಟ್ಸ್' ಎಂದು ಹೇಳಿದ ತೇಜಾ ವಿಷಯದ ಬಗ್ಗೆ ಹೆಚ್ಚು ಮಾತನಾಡಲು ಇಚ್ಛಿಸಲಿಲ್ಲ. ಆದರೆ ಇಲ್ಲಿ ಯಾವ ಪ್ರಭಾವ ವ್ಯಕ್ತಿಗಳ ಕೈವಾಡವೂ ಇಲ್ಲ ಎಂದು ತೇಜಾ ಹೇಳದೇ ಇರುವುದು ಸಾವಿನ ಸುತ್ತ ಇದ್ದ ಅನುಮಾನಗಳಿಗೆ ಪುಷ್ಟಿ ನೀಡಿದಂತಾಗಿದೆ.

ಸಾವಿನ ಹಿಂದೆ ದೊಡ್ಡವರ ಕೈವಾಡವಿದೆ ಎಂಬ ಗಂಭೀರ ಆರೋಪ

ಇನ್ನು ತೆಲುಗು ಚಿತ್ರರಂಗದಲ್ಲಿ ಫ್ಯಾಮಿಲಿ ಬ್ಯಾಕ್‌ಗ್ರೌಂಡ್ ಇಲ್ಲದ ನಟರನ್ನು ಬೆಳೆಯಲು ಬಿಡುವುದಿಲ್ಲ ಎಂಬ ದೊಡ್ಡ ಆರೋಪ ಈ ಹಿಂದಿನಿಂದಲೂ ಇದೆ. ಕೇವಲ ಆರೋಪ ಮಾತ್ರವಲ್ಲ ಇದನ್ನು ಪರೀಕ್ಷಿಸಿ ನೋಡಿದರೆ ಈ ಹೇಳಿಕೆ ನಿಜ ಬಿಡಿ ಎನಿಸಿಬಿಡುತ್ತೆ. ಏಕೆಂದರೆ ಫ್ಯಾಮಿಲಿ ಬ್ಯಾಕ್‌ಗ್ರೌಂಡ್ ಇಲ್ಲದೇ ತೆಲುಗಿನಲ್ಲಿ ಗೆದ್ದ ನಟರು ಇತ್ತೀಚೆಗೆ ಇದ್ದಾರೆಯೋ ಹೊರತು ಈ ಹಿಂದೆ ಯಾರೂ ಇರಲಿಲ್ಲ. ಉದಯ್ ಕಿರಣ್ ಆತ್ಮಹತ್ಯೆ ಆದಾಗಲೂ ಇದೇ ವಿಚಾರ ಕೇಳಿಬಂದಿತ್ತು. ಬ್ಯಾಕ್‌ಗ್ರೌಂಡ್ ಇಲ್ಲದೇ ಬಂದ ನಟನನ್ನು ಬೆಳೆಯಲು ಬಿಡಲಿಲ್ಲ, ಈ ಸಾವಿನ ಹಿಂದೆ ಹಲವು ದೊಡ್ಡವರ ಕೈವಾಡವಿದೆ ಎಂದರು.

ಹಣಕಾಸಿನ ಸಮಸ್ಯೆಯಿಂದ ಸಾವು ಎನ್ನಲಾಗಿತ್ತು

ಸಾವಿನ ಹಿಂದೆ ಕೆಲ ಪ್ರಭಾವಿ ವ್ಯಕ್ತಿಗಳ ಕೈವಾಡವಿದೆ ಎಂಬ ಅಭಿಪ್ರಾಯ ಹೆಚ್ಚಾಗಿ ವ್ಯಕ್ತವಾಗತೊಡಗಿದ ಬೆನ್ನಲ್ಲೇ ಉದಯ್ ಕಿರಣ್ ಹಣಕಾಸಿ ತೊಂದರೆ ಎದುರಿಸಿ ಖಿನ್ನತೆಗೊಳಗಾಗಿದ್ದರು, ಈ ಕಾರಣದಿಂದಲೇ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎಂದು ಬಂಜಾರಾ ಹಿಲ್ಸ್ ಪೊಲೀಸರು ತಿಳಿಸಿದ್ದರು. ಸದ್ಯ ನಿಜ ಕಾರಣವನ್ನು ತಿಳಿಸುತ್ತೇನೆ ಎಂದು ತೇಜಾ ನೀಡಿದ ಹೇಳಿಕೆ ಪೊಲೀಸರು ನೀಡಿದ್ದ ಕಾರಣ ಸುಳ್ಳು ಎಂಬುದನ್ನು ಪರೋಕ್ಷವಾಗಿ ಹೇಳುತ್ತಿದೆ.