ಜಪಾನ್‌ನಲ್ಲಿ RRR ಬಾಕ್ಸಾಫೀಸ್‌ ಕಲೆಕ್ಷನ್ ಎಷ್ಟು? 'ಕೆಜಿಎಫ್ 2' ದಾಖಲೆ ಅಳಿಸಿ ಹಾಕುತ್ತಾ?

RRR ಜಪಾನ್‌ನಲ್ಲಿ ರಿಲೀಸ್‌

ರಾಜಮೌಳಿ ನಿರ್ದೇಶಿಸಿದ ಸಿನಿಮಾ RRR ವಿದೇಶದಲ್ಲಿಯೂ ಜನಪ್ರಿಯತೆ ಗಳಿಸಿದೆ. ಅಮೆರಿಕಾ ಸೇರಿದಂತೆ ಹಲವೆಡೆ ಈ ಸಿನಿಮಾ ನೋಡಿ ಮೆಚ್ಚುಗೆ ಸೂಚಿಸಿದ್ದಾರೆ. ಅಲ್ಲದೆ ಭಾರತದ ಸಿನಿಮಾಗಳಿಗೆ ಜಪಾನ್‌ನಲ್ಲಿ ಫ್ಯಾನ್ಸ್ ಇದ್ದಾರೆ. ಹೀಗಾಗಿ RRR ಸಿನಿಮಾವನ್ನು ಅಕ್ಟೋಬರ್ 21ರಂದು ಜಪಾನ್‌ನಲ್ಲಿ ಬಿಡುಗಡೆ ಮಾಡಲಾಗಿದೆ. ಇಂದಿಗೆ (ಅಕ್ಟೋಬರ್ 25) ಸಿನಿಮಾ ಬಿಡುಗಡೆಯಾಗಿ ಐದು ದಿನಗಳಾಗಿವೆ. ಕಳೆದ ನಾಲ್ಕು ದಿನಗಳಲ್ಲಿ RRR ಸಿನಿಮಾ ಕಲೆಕ್ಷನ್ ಆಶಾದಾಯಕವಾಗಿವೆ.

RRRಗೆ ಜಪಾನ್‌ನಲ್ಲಿ ಪ್ರತಿಕ್ರಿಯೆ ಹೇಗಿದೆ?

ರಾಜಮೌಳಿ ನಿರ್ದೇಶನದ RRR ಸಿನಿಮಾ ಜಪಾನ್‌ನಲ್ಲಿ ಉತ್ತಮ ಪಾಸಿಟಿವ್ ರೆಸ್ಪಾನ್ಸ್ ಸಿಕ್ಕಿದೆ. ಜಪಾನ್‌ನಲ್ಲಿ ಈ ಸಿನಿಮಾವನ್ನು ದೊಡ್ಡ ಮಟ್ಟದಲ್ಲಿಯೇ ಬಿಡುಗಡೆ ಮಾಡಿದ್ದಾರೆ. ಜಪಾನ್‌ನ ಸುಮಾರು 210ಕ್ಕೂ ಹೆಚ್ಚು ಸ್ಥಳಗಳಲ್ಲಿ ಸಿನಿಮಾ ರಿಲೀಸ್ ಆಗಿದೆ. ಬಹುತೇಕ ಕಡೆಗಳಲ್ಲಿ ಈ ಸಿನಿಮಾಗೆ ಅದ್ಭುತ ಪ್ರತಿಕ್ರಿಯೆ ಸಿಕ್ಕಿದೆ. ಮೊದಲ ನಾಲ್ಕು ದಿನಗಳಲ್ಲಿ ಸುಮಾರು 3 ಕೋಟಿ 61 ಲಕ್ಷ ರೂಪಾಯಿ ಕಲೆಕ್ಷನ್ ಆಗಿದೆ ಎನ್ನಲಾಗಿದೆ. ಮೊದಲ ದಿನ 1 ಕೋಟಿ 06 ಲಕ್ಷ ರೂಪಾಯಿ ಗಳಿಕೆ ಕಂಡಿದೆ.

'ಸಾಹೋ' ಹಿಂದಿಕ್ಕಿದ RRR

ಜಪಾನ್‌ನಲ್ಲಿ RRR ಸಿನಿಮಾ ಮೊದಲ ದಿನವೇ ಪ್ರಭಾಸ್ ಸಿನಿಮಾದ ದಾಖಲೆಯನ್ನು ಮುರಿದಿದೆ. ಯಂಗ್ ರೆಬೆಲ್ ಸ್ಟಾರ್ ಅಭಿನಯದ 'ಸಾಹೋ' ಸಿನಿಮಾ ಜಪಾನ್‌ನಲ್ಲಿ ಮೊದಲ ದಿನ 90 ಲಕ್ಷ ರೂಪಾಯಿಯನ್ನು ಕಲೆ ಹಾಕಿತ್ತು. ಆ ದಾಖಲೆಯನ್ನು RRR ಹಿಂದಕ್ಕೆ ಹಾಕಿದ್ದು, ಫಸ್ಟ್ ಡೇನೇ 1.06 ಕೋಟಿ ರೂಪಾಯಿ ಕಲೆ ಹಾಕಿದೆ. ಈ ಮೂಲಕ ಜಪಾನ್‌ನಲ್ಲಿ ಮೊದಲ ದಿನವೇ ಅತೀ ಹೆಚ್ಚು ಗಳಿಕೆ ಕಂಡ ಭಾರತದ ಸಿನಿಮಾ ಎಂಬ ರೆಕಾರ್ಡ್ ಮಾಡಿದೆ.

'ಕೆಜಿಎಫ್ 2' ದಾಖಲೆ ಮುರಿಯುತ್ತಾ?

ರಾಕಿಂಗ್ ಸ್ಟಾರ್ ಯಶ್ ಹಾಗೂ ಪ್ರಶಾಂತ್ ನೀಲ್ ಕಾಂಬಿನೇಷನ್‌ ಸಿನಿಮಾ 'ಕೆಜಿಎಫ್ 2' ಇದೂವರೆಗೂ 1250 ಕೋಟಿ ರೂ. ಕಲೆಕ್ಷನ್ ಮಾಡಿದೆ. ಅದೇ ಜೂ.ಎನ್‌ಟಿಆರ್ ಹಾಗೂ ರಾಮ್‌ ಚರಣ್‌ ಸಿನಿಮಾ RRR 1150 ಕೋಟಿ ಗಳಿಕೆ ಎಂದು ವರದಿಯಾಗಿತ್ತು. ಗಳಿಕೆಯಲ್ಲಿ 100 ಕೋಟಿ ರೂಪಾಯಿಯಷ್ಟು ಹಿಂದಿರುವ RRR ಜಪಾನ್‌ ಬಾಕ್ಸಾಫೀಸ್‌ನಲ್ಲಿ ದಾಖಲೆ ಬರೆಯುತ್ತಾ? 100 ಕೋಟಿ ಕಲೆಕ್ಷನ್ ಮಾಡಿದ್ರೆ, 'ಕೆಜಿಎಫ್ 2' ದಾಖಲೆಯನ್ನು ಹಿಂದಿಕ್ಕೆ ಹಾಕಬಹುದು. ಆದರೆ, ಜಪಾನ್‌ನಲ್ಲಿ ಆರಂಭದಲ್ಲಿ ಭರ್ಜರಿ ಗಳಿಕೆ ಕಾಣದೆ ಇರೋದ್ರಿಂದ 'ಕೆಜೆಎಫ್ 2' ದಾಖಲೆ ಮುರಿಯುತ್ತಾ? ಅನ್ನೋ ಅನುಮಾನವಿದೆ.