ಮಹೇಶ್ ಬಾಬು-ರಾಜಮೌಳಿ ಸಿನಿಮಾ: ಒಂದಲ್ಲ ಎರಡು!

ಎರಡು ಭಾಗಗಳಲ್ಲಿ ಸಿನಿಮಾ

ಹೌದು, ರಾಜಮೌಳಿಯ ತಂದೆ, ರಾಜಮೌಳಿಯ ಬಹುತೇಕ ಸಿನಿಮಾಗಳಿಗೆ ಕತೆ ಬರೆದಿರುವ ವಿಜಯೇಂದ್ರ ಪ್ರಸಾದ್ ಅವರು ಈ ವಿಷಯವನ್ನು ಬಹಿರಂಗಗೊಳಿಸಿದ್ದು, ಮಹೇಶ್ ಬಾಬು-ರಾಜಮೌಳಿ ಜೊತೆಗಿನ ಸಿನಿಮಾವು ಸಾಹಸಮಯ ಸಿನಿಮಾ ಆಗಿರಲಿದೆ. ಅಲ್ಲದೆ ಈ ಸಿನಿಮಾವು ಎರಡು ಭಾಗಗಳಲ್ಲಿ ತೆರೆಗೆ ಬರಲಿದೆ ಎಂದು ಸಹ ಹೇಳಿದ್ದಾರೆ. ಈ ವಿಷಯವನ್ನು ನೀವು ಪತ್ರಿಕೆಗಳಲ್ಲಿ ಬರೆದುಕೊಳ್ಳಬಹುದು ಎಂದು ವಿಜಯೇಂದ್ರ ಪ್ರಸಾದ್ ಹೇಳಿದ್ದಾರೆ.

ಬಾಹುಬಲಿಯ ಸೀಕ್ವೆಲ್ ಮಾಡಿದ್ದ ರಾಜಮೌಳಿ

ಈ ಹಿಂದೆ ರಾಜಮೌಳಿ 'ಬಾಹುಬಲಿ' ಸಿನಿಮಾವನ್ನು ಎರಡು ಭಾಗಗಳಲ್ಲಿ ನಿರ್ಮಿಸಿದ್ದರು. ಅದು ಟ್ರೆಂಡ್ ಸೆಟ್ ಮಾಡಿತ್ತು. 'ಬಾಹುಬಲಿ' ಸಿನಿಮಾದ ಹಾದಿಯನ್ನೇ ತುಳಿದು ಹಲವಾರು ಸಿನಿಮಾಗಳು ಎರಡು ಭಾಗಗಳಲ್ಲಿ ಬಿಡುಗಡೆ ಆದವು. ಸೀಕ್ವೆಲ್ ಸಿನಿಮಾಗಳ ಹೊಸ ಟ್ರೆಂಡ್ ಅನ್ನೇ ರಾಜಮೌಳಿ ತಮ್ಮ 'ಬಾಹುಬಲಿ' ಸಿನಿಮಾದ ಮೂಲಕ ಸೃಷ್ಟಿಸಿದರು. ಇದೀಗ ಮತ್ತೊಮ್ಮೆ ಸೀಕ್ವೆಲ್‌ ಸಿನಿಮಾಕ್ಕೆ ರಾಜಮೌಳಿ ಕೈ ಹಾಕಿದ್ದು, ಈ ಬಾರಿಯೂ ಸಿನಿಮಾ ದೊಡ್ಡ ಮಟ್ಟದಲ್ಲಿ ಹಿಟ್ ಆಗುವ ಸಾಧ್ಯತೆ ಇದೆ.

'RRR' ಸಿನಿಮಾಕ್ಕೂ ಸೀಕ್ವೆಲ್

'RRR' ಸಿನಿಮಾವನ್ನು ಸಹ ಸೀಕ್ವೆಲ್ ಅನ್ನಾಗಿ ಪರಿವರ್ತಿಸಬಹುದು ಎಂದು ವಿಜಯೇಂದ್ರ ಪ್ರಸಾದ್ ಹೇಳಿದ್ದರು. 'RRR' ಸಿನಿಮಾ ದೊಡ್ಡ ಹಿಟ್ ಆದ ಬಳಿಕ ಈ ಬಗ್ಗೆ ಮಾಧ್ಯಮಗಳೊಟ್ಟಿಗೆ ಮಾತನಾಡಿದ್ದ ವಿಜಯೇಂದ್ರ ಪ್ರಸಾದ್, ಖಂಡಿತವಾಗಿಯೂ 'RRR' ಸಿನಿಮಾವನ್ನು ಸೀಕ್ವೆಲ್‌ ಅನ್ನಾಗಿ ಮಾಡಬಹುದು. ಇಬ್ಬರು ನಾಯಕರು ವಿದೇಶಕ್ಕೆ ತೆರಳಿ ಅಲ್ಲಿ ಸಾಹಸವೊಂದರಲ್ಲಿ ಪಾಲ್ಗೊಳ್ಳುವಂತೆ ಕತೆಯನ್ನು ಕಟ್ಟಬಹುದು ಎಂದಿದ್ದಾರೆ. ಸ್ವತಃ ರಾಜಮೌಳಿ ಸಹ 'RRR' ಸಿನಿಮಾ ಸೀಕ್ವೆಲ್ ಬಗ್ಗೆ ನಾವು ಯೋಚಿಸುತ್ತಿದ್ದೇವೆ ಎಂದು ಹೇಳಿದ್ದರು.

ನವೀನ ತಂತ್ರಜ್ಞಾನ ಬಳಕೆ

ಮಹೇಶ್ ಬಾಬು ಹಾಗೂ ರಾಜಮೌಳಿ ಕಾಂಬಿನೇಷನ್‌ನ ಸಿನಿಮಾ ಈ ವರ್ಷ ಆಗಸ್ಟ್ ವೇಳೆಗೆ ಶುರುವಾಗಲಿದೆ. ಸಿನಿಮಾದ ಚಿತ್ರೀಕರಣವು ಅಮೆಜಾನ್ ಕಾಡುಗಳಲ್ಲಿ ನಡೆಯಲಿದೆ. ಜೊತೆಗೆ ಹಲವು ವಿದೇಶಿ ಲೊಕೇಶನ್‌ಗಳಲ್ಲಿಯೂ ಚಿತ್ರೀಕರಣ ನಡೆಯಲಿದೆ. ಈ ಸಿನಿಮಾವು 'ಇಂಡಿಯಾನಾ ಜೋನ್ಸ್' ಮಾದರಿಯ ಸಾಹಸ ಕತೆ ಆಗಿರಲಿದೆ ಎಂದು ರಾಜಮೌಳಿ ಈ ಹಿಂದೆಯೇ ಹೇಳಿದ್ದಾರೆ. ಸಿನಿಮಾಕ್ಕಾಗಿ ಈಗಾಗಲೇ ರಾಜಮೌಳಿ ತಯಾರಿ ಆರಂಭಿಸಿದ್ದು, ಹಲವು ವಿನೂತನ ತಂತ್ರಜ್ಞಾನಗಳನ್ನು ಈ ಸಿನಿಮಾಕ್ಕೆ ರಾಜಮೌಳಿ ಬಳಸಿಕೊಳ್ಳಲಿದ್ದಾರೆ. ಇದಕ್ಕಾಗಿ ಹಲವು ವಿದೇಶಿ ಸಂಸ್ಥೆಗಳೊಟ್ಟಿಗೆ ಚರ್ಚೆ, ಒಪ್ಪಂದಗಳನ್ನು ರಾಜಮೌಳಿ ಮಾಡಿಕೊಂಡಿದ್ದಾರೆ.