Shaakuntalam trailer : ಭೂಮಿ ಮೇಲೆ ಅಪ್ಪ ಅಮ್ಮನಿಗೆ ಬೇಡವಾದ ಮೊದಲ ಮಗುವಿನ ನೋವು ನಲಿವಿನ ಕಥೆ

'ಶಾಕುಂತಲಂ' ಟ್ರೈಲರ್ ಹೇಗಿದೆ?

ಮಹಾಭಾರತದ ದುಷ್ಯಂತ, ಶಕುಂತಲ ಪ್ರೇಮಕಾವ್ಯದ ಕಥೆಯನ್ನು ಕೇಂದ್ರವಾಗಿಟ್ಟಿಕೊಂಡು ಯಾವುದೇ ಸಿನಿಮಾ ಬಂದಿರಲಿಲ್ಲ. ಇದೇ ಮೊದಲ ಬಾರಿಗೆ ಅಂತಹ ಪ್ರಯತ್ನ ನಡೆದಿದೆ. ಶಕುಂಲತ ಜನನದಿಂದ ಸಿನಿಮಾ ಕಥೆ ಆರಂಭ ಆಗುತ್ತದೆ ಎನ್ನುವುದು ಟ್ರೈಲರ್‌ನಲ್ಲಿ ಗೊತ್ತಾಗ್ತಿದೆ. ಶಾಕುಂತಲೆ ಜನನ, ಯವ್ವನದಲ್ಲಿ ಪ್ರೀತಿ ಪ್ರೇಮ, ನಂತರ ಎದುರಾಗುವ ಸಮಸ್ಯೆಗಳು, ಹೀಗೆ ಎಮೋಷನಲ್ ಜರ್ನಿಯನ್ನು ತೋರಿಸಲಾಗಿದೆ. ಭೂಮಿ ಮೇಲೆ ಅಪ್ಪ ಅಮ್ಮನಿಗೆ ಬೇಡವಾದ ಮೊದಲ ಮಗು, ವಿಶ್ವಾಮಿತ್ರಾ- ಮೇನಕೆಯ ಪ್ರೀತಿಯ ಸಂಕೇತವಾಗಿ ಜನಿಸಿದ ಮಗು ಎನ್ನುತ್ತಾ ಟ್ರೈಲರ್ ಆರಂಭವಾಗುತ್ತದೆ.

ಶಾಕುಂಲತೆಯಾಗಿ ಸಮಂತಾ ಮೋಡಿ

ಟೈಟಲ್‌ ರೋಲ್‌ನಲ್ಲಿ ಸಮಂತಾ ನಟಿಸಿದ್ದು, ತಮ್ಮ ಸೌಂದರ್ಯ ಹಾಗೂ ಅಭಿನಯದಿಂದ ಮೋಡಿ ಮಾಡಿದ್ದಾರೆ. ಅರಣ್ಯದಲ್ಲಿ ತನ್ನ ಸ್ನೇಹಿತೆಯರ ಜೊತೆ ನಲಿಯುತ್ತಾ ಇರುವ ಶಾಕುಂತಲೆಯನ್ನು ತೋರಿಸಿದ್ದಾರೆ. ದುಷ್ಯಂತ ಮಹಾರಾಜ ಆಕೆಯನ್ನು ನೋಡುವುದು, ಪ್ರೀತಿಸುವುದನ್ನು ನೋಡಬಹುದು. ಮುಂದೆ ಎದುರಾಗುವ ಕಷ್ಟಗಳು, ಆಕೆಯ ಕರ್ಮಫಲ, ದುರ್ವಾಸ ಮುನಿಗಳ ಶಾಪದಿಂದ ಏನೆಲ್ಲಾ ನೋವು ಅನುಭವಿಸಬೇಕಾಗುತ್ತದೆ ಎನ್ನುವುದನ್ನು ಕಟ್ಟಿಕೊಡಲಾಗಿದೆ. ಪ್ರಕಾಶ್‌ ರಾಜ್, ಮೋಹನ್‌ ಬಾಬುರಂತಹ ಘಟಾನುಘಟಿ ಕಲಾವಿದರ ಸಾಥ್ ಸಿಕ್ಕಿದೆ.

ಸಿನಿಮಾ ಗ್ರಾಫಿಕ್ಸ್ ಬಗ್ಗೆ ಚರ್ಚೆ

ಪವರ್‌ಫುಲ್ ಡೈಲಾಗ್ಸ್ ಜೊತೆಗೆ ಟ್ರೈಲರ್‌ನ ಚೆಂದಗಾಣಿಸುವ ಪ್ರಯತ್ನ ನಡೆದಿದೆ. ಗ್ರಾಫಿಕ್ಸ್‌ ಗುಣಮಟ್ಟ ಅಷ್ಟೇನು ಚೆನ್ನಾಗಿಲ್ಲ, ಹಿಂದಿ ಕಿರುತೆರೆ ಧಾರಾವಾಹಿಗಳನ್ನು ನೆನಪಿಸುವಂತೆ ಕಾಣುತ್ತಿದೆ ಎಂದು ಕೆಲವರು ಕಾಮೆಂಟ್ ಮಾಡುತ್ತಿದ್ದಾರೆ. ಆದರೆ ಕೆಲವರು ಮಾತ್ರ ಪ್ರಭಾಸ್ 'ಆದಿಪುರುಷ್' ಸಿನಿಮಾ ಗ್ರಾಫಿಕ್ಸ್‌ಗಿಂತ ಇದೇ ಚೆನ್ನಾಗಿದೆ ಎಂದು ಹೇಳುತ್ತಿದ್ದಾರೆ. ನಿರ್ದೇಶಕ ಗುಣಶೇಖರ್ ತಾವೇ ಸಿನಿಮಾ ನಿರ್ಮಾಣ ಕೂಡ ಮಾಡುತ್ತಿದ್ದಾರೆ.

ಭರತನಾಗಿ ಅಲ್ಲು ಅರ್ಹಾ

ಇನ್ನು 'ಶಾಕುಂತಲಂ' ಚಿತ್ರದಲ್ಲಿ ಸ್ಟೈಲಿಶ್ ಸ್ಟಾರ್ ಅಲ್ಲು ಅರ್ಜುನ್ ಪುತ್ರಿ ಅಲ್ಲು ಅರ್ಹಾ ಕೂಡ ಬಣ್ಣ ಹಚ್ಚಿದ್ದಾರೆ. ಟ್ರೈಲರ್ ಕೊನೆಯಲ್ಲಿ ಬಾಲ ಭರತನ ಪಾತ್ರದಲ್ಲಿ ಅಲ್ಲು ಅರ್ಹಾ ಸಿಂಹ ಏರಿ ಬರುವುದನ್ನು ನೋಡಬಹುದು. ಫೆಬ್ರವರಿ 17ಕ್ಕೆ 'ಶಾಕುಂತಲಂ' ಚಿತ್ರವನ್ನು ಅದ್ಧೂರಿಯಾಗಿ ಬಿಡುಗಡೆ ಮಾಡಲಾಗ್ತಿದೆ. ಕನ್ನಡದಲ್ಲೀ ಟ್ರೈಲರ್ ರಿಲೀಸ್ ಆಗಿದೆ. ಮಯೋಸೈಟಿಸ್ ಕಾಯಿಲೆಯಿಂದ ಚೇತರಿಸಿಕೊಳ್ಳುತ್ತಿರುವ ಸಮಂತಾ ಸಿನಿಮಾ ಪ್ರಚಾರ ಕಾರ್ಯಕ್ರಮಗಳಲ್ಲಿ ಭಾಗಿ ಆಗಲಿದ್ದಾರೆ.