ದಾಖಲೆಗಳನ್ನು ಬರೆದು, ಒಂದೇ ಹಾಡಿನಿಂದ ಕೋಟಿಗಟ್ಟಲೆ ಗಳಿಸಿದ ಸಿನಿಮಾ!

ಯೂಟ್ಯೂಬ್‌ನಲ್ಲಿ ದಾಖಲೆಗಳು ಬರೆದ ಹಾಡು

ಟಿವಿಯಲ್ಲಿ ನಿರೂಪಣೆ ಮಾಡುತ್ತಿದ್ದ ತೆಲುಗಿನ ಪ್ರದೀಪ್ ಮಚ್ಚಿರಾಜು ಮೊದಲ ಬಾರಿ ನಾಯಕನಾಗಿ ನಟಿಸಿರುವ '30 ರೋಜುಲೋ ಪ್ರೇಮಿಂಚಡಂ ಎಲಾ' ಸಿನಿಮಾ, ತನ್ನ ಒಂದೇ ಹಾಡಿನಿಂದ ಯೂಟ್ಯೂಬ್‌ನಲ್ಲಿ ದಾಖಲೆಗಳನ್ನು ಬರೆದಿದೆ. ಅಷ್ಟೆ ಅಲ್ಲ ಕೋಟ್ಯಂತರ ಹಣವನ್ನೂ ಸಂಪಾದಿಸಿದೆ.

16.5 ಕೋಟಿಗೂ ಹೆಚ್ಚು ಬಾರಿ ವೀಕ್ಷಣೆ

'30 ರೋಜುಲೋ ಪ್ರೇಮಿಂಚಡಂ ಎಲಾ' ಸಿನಿಮಾದ 'ನೀಲಿ ನೀಲಿ ಆಕಾಶಂ' ಹಾಡು ಸಖತ್ ಹಿಟ್ ಆಗಿದೆ. ಯೂಟ್ಯೂಬ್ ಒಂದರಲ್ಲೇ ಈ ಹಾಡನ್ನು 16.5 ಕೋಟಿ (165,642,496) ಬಾರಿ ವೀಕ್ಷಣೆ ಮಾಡಲಾಗಿದೆ. ಯೂಟ್ಯೂಬ್ ಒಂದರಿಂದಲೇ ಹಾಡಿಗಾಗಿ ಸಿನಿಮಾಕ್ಕೆ ಬಂದ ಆದಾಯ 70 ಲಕ್ಷಕ್ಕೂ ಹೆಚ್ಚು.

ಕೋಟಿಗೂ ಹೆಚ್ಚು ಹಣ ಸಂಪಾದನೆ

ಇನ್ನು ಇದೇ ಹಾಡನ್ನು ಯೂಟ್ಯೂಬ್ ಹೊರತಾಗಿ ಇನ್ನೂ ಹಲವು ಸಂಗೀತದ ಆಪ್‌ಗಳಿಗೆ, ಇತರೆ ಫ್ಲ್ಯಾಟ್‌ಫಾರ್ಮ್‌ ಗಳಿಗೆ ಮಾರಾಟ ಮಾಡಲಾಗಿದೆ. ಇದರಿಂದಲೂ ಸಾಕಷ್ಟು ದೊಡ್ಡ ಮೊತ್ತವನ್ನೇ ಸಿನಿಮಾ ಪಡೆದಿದೆ. ಅಲ್ಲಿಗೆ ಬಿಡುಗಡೆ ಆಗುವ ಮುನ್ನವೇ ಕೇವಲ ಒಂದು ಹಾಡಿನಿಂದ ಕೋಟ್ಯಂತರ ಹಣ ಗಳಿಸಿದೆ ಚಿತ್ರತಂಡ.

ಲಾಕ್‌ಡೌನ್ ಕಾರಣದಿಂದ ಸಿನಿಮಾ ಬಿಡುಗಡೆ ಮುಂದಕ್ಕೆ

ಏಪ್ರಿಲ್‌ನಲ್ಲಿಯೇ ಸಿನಿಮಾದ ಬಿಡುಗಡೆ ಆಗಬೇಕಿತ್ತು, ಆದರೆ ಲಾಕ್‌ಡೌನ್ ಕಾರಣದಿಂದಾಗಿ ಸಿನಿಮಾ ಬಿಡುಗಡೆ ಮುಂದಕ್ಕೆ ಹೋಗಿದೆ. ಸಿನಿಮಾದಲ್ಲಿ ನಾಯಕನಾಗಿ ಮೊದಲ ಬಾರಿಗೆ ಆಂಕರ್ ಪ್ರದೀಪ್ ಅಭಿನಯಿಸಿದ್ದಾರೆ. ನಾಯಕಿ ಅಮೃತಾ ಐಯ್ಯರ್, ನಿರ್ದೇಶನ ಮುನ್ನಾ, ಸಂಗೀತ ನಿರ್ದೇಶನ ಅನುಪ್ ರುಬೆನ್ಸ್.