ಸೀರಿಯಲ್ ನಟಿ ಸುಷ್ಮಾ ಶೇಖರ್ ಬಗ್ಗೆ ಸಂಪೂರ್ಣ ಮಾಹಿತಿ ಇಲ್ಲಿದೆ!

ಸುಷ್ಮಾ ಹುಟ್ಟಿದ್ದು ಬೆಳೆದಿದ್ದೆಲ್ಲಾ ಬೆಂಗಳೂರಲ್ಲಿ!

ಸುಷ್ಮಾ ಶೇಖರ್ ಹುಟ್ಟಿದ್ದು, ಬೆಳೆದ್ದು ಎಲ್ಲವೂ ಬೆಂಗಳೂರಿನಲ್ಲೇ. ಅಪ್ಪ ಶೇಖರ್, ಅಮ್ಮ ಭಾಗೀರಥಿ. ಓದುತ್ತಿರುವಾಗಲೇ ಸುಷ್ಮಾಗೆ ನಟಿಸುವ ಅವಕಾಶ ಒದಗಿ ಬಂತು. ಸುಷ್ಮಾ ಅಕ್ಕ ಅಂಕಿತಾ ನಯನಾ ಎಂಬುವರು ಧಾರಾವಾಹಿಗಳಲ್ಲಿ ನಟಿಸುತ್ತಿದ್ದರು. 'ಮಕ್ಕಳ ಲೋಕ' ಎಂಬ ಧಾರಾವಾಹಿಯಲ್ಲಿ ಅಂಕಿತಾ ನಯನಾ ನಟಿಸಬೇಕಿತ್ತು. ಆದರೆ ಅವರಿಗೆ ಪರೀಕ್ಷೆ ಇದ್ದಿದ್ದರಿಂದ ಸುಷ್ಮಾ ಆ ಧಾರಾವಾಹಿಯಲ್ಲಿ ನಟಿಸಬೇಕಾಗ ಬಂತು. ಇದಾದ ಬಳಿಕ ಸುಷ್ಮಾ ಒಂದೊಂದೇ ಸೀರಿಯಲ್‌ನಲ್ಲಿ ನಟಿಸಲು ಪ್ರಾರಂಭಿಸಿದರು.

'ಲಕುಮಿ'ಯ ಸೀರಿಯಲ್ ಜರ್ನಿ!

ನಟನೆಯ ಬಗ್ಗೆ ಗಂಧ-ಗಾಳಿ ಗೊತ್ತಿರದ ಸುಷ್ಮಾಗೆ 'ಮಕ್ಕಳ ಲೋಕ' ಧಾರಾವಾಹಿಯಲ್ಲಿ ನಟಿಸಿದ ಮೇಲೆ ಅಭಿನಯಿಸುವ ಮನಸಾಯಿತು. ಹೀಗಾಗಿ ಓದಿನ ಜೊತೆ ಜೊತೆಗೆ ನಟನೆ ಮಾಡಲು ಶುರು ಮಾಡಿದರು. 'ಮಕ್ಕಳ ಲೋಕ'ಧಾರಾವಾಹಿಯ ಬಳಿಕ 'ವೆಂಕಟೇಶ ಕಲ್ಯಾಣ' ಧಾರಾವಾಹಿಯಲ್ಲಿ ನಟಿಸಿದರು. ಈ ಧಾರಾವಾಹಿ ಕನ್ನಡ ಹಾಗೂ ತೆಲುಗು ಎರಡರಲ್ಲೂ ಪ್ರಸಾರವಾಗಿತ್ತು. ಸುಷ್ಮಾ ಶೇಖರ್ ಈ ಮೂಲಕ ತೆಲುಗು ಹಾಗೂ ಕನ್ನಡದಲ್ಲೂ ಅಭಿಮಾನಿಗಳನ್ನು ಹೊಂದಿದ್ದಾರೆ.

ನಟಿಸುತ್ತಲೇ ಅಭಿನಯ ಕಲಿತ ಬೆಳ್ಳಿ!

ನಂತರ ಒಂದೇ ಒಂದು ಧಾರಾವಾಹಿಯಲ್ಲಿ ನಟಿಸುವ ಅವಕಾಶಗಳು ಒದಗಿ ಬಂತು. 'ಕುಸುಮಾಂಜಲಿ', 'ಅಮೃತವಾಣಿ', 'ಪುಣ್ಯಕೋಟಿ', 'ಕನಕ' ಸೇರಿದಂತೆ ಹಲವು ಧಾರಾವಾಹಿಗಳಲ್ಲಿ ನಟಿಸಿದರು. ಆದರೆ ಸುಷ್ಮಾಗೆ ಹೆಸರು ತಂದ ಧಾರಾವಾಹಿ ಸ್ಟಾರ್ ಸುವರ್ಣದಲ್ಲಿ ಮೂಡಿ ಬಂದ 'ಲಕುಮಿ' ಹಾಗೂ ಜೀ ಕನ್ನಡದಲ್ಲಿ ಪ್ರಸಾರವಾದ 'ಯಾರೇ ನೀ ಮೋಹಿನಿ' ಧಾರಾವಾಹಿ. ಈಗಲೂ ಸುಷ್ಮಾ ಅವರನ್ನು 'ಲಕುಮಿ' ಹಾಗೂ 'ಬೆಳ್ಳಿ' ಎಂಬ ಹೆಸರಿನಲ್ಲೇ ಗುರುತಿಸುತ್ತಾರೆ. 'ಯಾರೇ ನೀ ಮೋಹಿನಿ' ಧಾರಾವಾಹಿಯಲ್ಲಿ ಮಾಮಾ ಮಾಮಾ ಎಂದು ಮುದ್ದಾಗಿ ಕರೆಯುತ್ತಲೇ ಸುಷ್ಮಾ ಪ್ರೇಕ್ಷಕರ ಮನಗೆದ್ದಿದ್ದರು.

ಡ್ಯಾನ್ಸ್ ಅಂದರೆ ಹುಚ್ಚು ಪ್ರೀತಿ!

ನಟಿಸುತ್ತಲೇ ಓದು ಮುಗಿಸಿದ ಸುಷ್ಮಾಗೆ ಸಿಎ ಮಾಡುವ ಆಸೆ ಇದೆಯಂತೆ. ಇದರೊಂದಿಗೆ ಸುಷ್ಮಾಗೆ ಡ್ಯಾನ್ಸ್ ಎಂದರೆ ತುಂಬಾ ಇಷ್ಟವಂತೆ. ಆಗಾಗ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ಆಕ್ಟಿವ್ ಆಗಿರುವ ಸುಷ್ಮಾ ಆಗಾಗ ರೀಲ್ಸ್ ಮಾಡುತ್ತಿರುತ್ತಾರೆ. ಭರತನಾಟ್ಯ ಕಲಿತಿರುವ ಸುಷ್ಮಾಗೆ ಡ್ಯಾನ್ಸ್ ಎಂದರೆ ಬಹಳ ಇಷ್ಟ. ಇನ್ನು ಸುಷ್ಮಾ ನಟನೆಗೆ ಅವರ ತಂದೆ-ತಾಯಿಯ ಫುಲ್ ಸಪೋರ್ಟ್ ಇದ್ಯಂತೆ. ಸದ್ಯಕ್ಕೆ ನಟನೆಯಿಂದ ಬ್ರೇಕ್ ಪಡೆದಿರುವ ಸುಷ್ಮಾರನ್ನು ನೋಡಲು ಅಭಿಮಾನಿಗಳು ಸೋಶಿಯಲ್ ಮೀಡಿಯಾ ಮೊರೆ ಹೋಗಿದ್ದಾರೆ.