ಬಿಗ್ ಬಾಸ್ ಸಂಭಾವನೆ ಬಗ್ಗೆ ಕೇಳಿದ್ದಕ್ಕೆ ಸುದೀಪ್ ಏನಂದ್ರು?

Recommended Video

ಬಿಗ್ ಬಾಸ್ ಕನ್ನಡ 7ನೇ ಆವೃತ್ತಿಯಲ್ಲಿ ಯಾರೆಲ್ಲಾ ಭಾಗವಹಿಸಲಿದ್ದಾರೆ ಎನ್ನುವುದರ ಜೊತೆಗೆ ಸುದೀಪ್ ಬಿಗ್ ಬಾಸ್ ಕಾರ್ಯಕ್ರಮ ನಿರೂಪಣೆ ಮಾಡಲು ಎಷ್ಟು ಸಂಭಾವನೆ ಪಡೆಯುತ್ತಾರೆ ಎನ್ನುವುದು ದೊಡ್ಡ ಪ್ರಶ್ನೆಯಾಗಿತ್ತು.

ಇಂದು ಬೆಂಗಳೂರಿನ ಖಾಸಗಿ ಹೋಟೆಲ್ ನಲ್ಲಿ ಸುದೀಪ್ ಮತ್ತು ಬಿಗ್ ಬಾಸ್ ಡೈರೆಕ್ಟರ್ ಪರಮೇಶ್ವರ್ ಗುಂಡ್ಕಲ್ ಸುದ್ದಿಗೋಷ್ಠಿ ಮಾಡಿದರು. ಈ ವೇಳೆ ಸುದೀಪ್ ಸಂಭಾವನೆ ಕುರಿತು ಪ್ರಶ್ನಿಸಲಾಯಿತು. ಇದಕ್ಕೆ ಸುದೀಪ್ ಕೂಡ ಉತ್ತರಿಸಿದರು.

ಕಿಚ್ಚ ಸುದೀಪ್ ಅವರು ಐದು ವರ್ಷಕ್ಕೆ 20 ಕೋಟಿ ಸಂಭಾವನೆ ಪಡೆದುಕೊಂಡಿದ್ದಾರೆ ಎನ್ನಲಾಗಿದೆ. ಈ ಬಗ್ಗೆ ಸುದೀಪ್ ಪ್ರತಿಕ್ರಿಯಿಸಿದ್ದು, ''ಸಂಭಾವನೆ ವಿಚಾರವಾಗಿ ನನಗೂ ಮತ್ತು ಆಯೋಜಕರ ನಡುವೆ ಒಳ್ಳೆಯ ಸಂಬಂಧವಿದೆ. ಅವರಿಗೂ ನಾನು ಕಷ್ಟ ಕೊಟ್ಟಿಲ್ಲ, ನನಗೂ ಅವರ ನಿರಾಸೆ ಮಾಡಿಲ್ಲ. ಒಳ್ಳೆಯ ಸಂಭಾವನೆ ಸಿಕ್ಕಿದೆ'' ಎಂದರು.

ಮಾತು ಮುಂದುವರಿಸಿದ ಸುದೀಪ್ ''ಬಿಗ್ ಬಾಸ್ ಗಿಂತ ನನ್ನ ದುಡಿಮೆ ಇರೋದು ಸಿನಿಮಾಗಳಲ್ಲಿ. ಅಲ್ಲಿ ನಿರ್ಮಾಪಕರಿಗೂ ನಷ್ಟವಾಗದಂತೆ ಎಲ್ಲವೂ ಚೆನ್ನಾಗಿ ಹೋಗುತ್ತೆ. ಕೆಲವು ಕಡೆ ನಾನೇ ಸಂಭಾವನೆ ಬಿಟ್ಟಿರುವ ಉದಾಹರಣೆಯೂ ಇದೆ. ಸರಿಯಾದ ಅಂಕಿ ಅಂಶ ನಾನು ಹೇಳಬೇಕಿರುವುದು ನನ್ನ ಪತ್ನಿಗೆ ಮಾತ್ರ. ಅದು ಅವರಿಗೆ ಗೊತ್ತಿದೆ ಸಾಕು ಬಿಡಿ. ನೀವು ತಿಳಿದುಕೊಂಡು ಏನು ಮಾಡ್ತೀರಾ. ನಿಮಗೇನೂ ನಾನು ಕೊಡಲ್ಲ ಅಲ್ವಾ'' ಎಂದು ಕಾಲೆಳೆದರು.

2015ನೇ ಆವೃತ್ತಿಯಲ್ಲಿ ಸುದೀಪ್ ಮತ್ತು ಬಿಗ್ ಬಾಸ್ ಆಯೋಜಕರ ನಡುವೆ ಒಪ್ಪಂದ ಆಗಿದ್ದು, 2020ಕ್ಕೆ ಮುಗಿಯಲಿದೆ. ಆ ಬಳಿಕ ಸುದೀಪ್ ಸಂಭಾವನೆ ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆ ಇದೆ ಎನ್ನಲಾಗಿದೆ.

ಇನ್ನುಳಿದಂತೆ ಅಕ್ಟೋಬರ್ 13 ರಂದು ಬಿಗ್ ಬಾಸ್ ಕನ್ನಡ 7ನೇ ಸೀಸನ್ ಅಧಿಕೃತವಾಗಿ ಆರಂಭವಾಗಲಿದ್ದು, ಒಟ್ಟು 17 ಸ್ಪರ್ಧಿಗಳು ದೊಡ್ಮನೆ ಪ್ರವೇಶ ಮಾಡಲಿದ್ದಾರೆ. ಕಲರ್ಸ್ ಕನ್ನಡದಲ್ಲಿ ಪ್ರತಿ ದಿನ ರಾತ್ರಿ 9.30ಕ್ಕೆ ಪ್ರಸಾರವಾಗಲಿದೆ.