ಕನ್ನಡ ಕಿರುತೆರೆ ಇತಿಹಾಸದಲ್ಲಿ 'ಕುರುಕ್ಷೇತ್ರ' ಐತಿಹಾಸಿಕ ದಾಖಲೆ: ದರ್ಶನ್ ಗೆ ಫುಲ್ TRP.!

ಕನ್ನಡ ಕಿರುತೆರೆ ಇತಿಹಾಸದಲ್ಲಿ ದಾಖಲೆ ಸೃಷ್ಟಿಸಿದ 'ಮುನಿರತ್ನ ಕುರುಕ್ಷೇತ್ರ'

ಇತ್ತೀಚೆಗಷ್ಟೇ ಜೀ ಕನ್ನಡ ವಾಹಿನಿಯಲ್ಲಿ ದುರ್ಯೋಧನನ ಪಾತ್ರದಲ್ಲಿ ದರ್ಶನ್ ಅಭಿನಯದ 'ಮುನಿರತ್ನ ಕುರುಕ್ಷೇತ್ರ' ಸಿನಿಮಾ ಪ್ರಸಾರ ಕಂಡಿತ್ತು. ಈಗ ಇದೇ 'ಮುನಿರತ್ನ ಕುರುಕ್ಷೇತ್ರ' ಕನ್ನಡ ಕಿರುತೆರೆಯಲ್ಲಿ ಇರುವ ಹಳೇ ದಾಖಲೆಗಳನ್ನೆಲ್ಲಾ ಪೀಸ್ ಪೀಸ್ ಮಾಡಿದೆ.

ಇಂಪ್ರೆಶನ್ ನಲ್ಲಿ ನಂಬರ್ 1

ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾದ 'ಮುನಿರತ್ನ ಕುರುಕ್ಷೇತ್ರ' ಚಿತ್ರಕ್ಕೆ 12426 ಇಂಪ್ರೆಶನ್ ಗಳು ಲಭ್ಯವಾಗಿದೆ. ಕನ್ನಡ ಕಿರುತೆರೆಯಲ್ಲಿ ಪ್ರಸಾರವಾದ ಸಿನಿಮಾಗಳ ಪೈಕಿ 'ಮುನಿರತ್ನ ಕುರುಕ್ಷೇತ್ರ' ಅತಿ ಹೆಚ್ಚು ಇಂಪ್ರೆಶನ್ ಗಳನ್ನು ಪಡೆದು ಇತಿಹಾಸ ಸೃಷ್ಟಿಸಿದೆ. ಆ ಮೂಲಕ ಇಂಪ್ರೆಶನ್ ಲೆಕ್ಕಾಚಾರದಲ್ಲಿ 'ಮುನಿರತ್ನ ಕುರುಕ್ಷೇತ್ರ' ನಂಬರ್ 1 ಸ್ಥಾನಕ್ಕೆ ಏರಿದೆ.

ಫಸ್ಟು ದರ್ಶನ್, ನೆಕ್ಸ್ಟು ಪುನೀತ್.!

ಇಂಪ್ರೆಶನ್ ಆಧಾರದಲ್ಲಿ ದರ್ಶನ್ ಅಭಿನಯದ 'ಮುನಿರತ್ನ ಕುರುಕ್ಷೇತ್ರ' 12426 ಪಡೆದುಕೊಂಡು ನಂಬರ್ 1 ಸ್ಥಾನಕ್ಕೆ ಏರಿದ್ದರೆ, ಪವರ್ ಸ್ಟಾರ್ ಪುನೀತ್ ರಾಜ್ ಕುಮಾರ್ ಅಭಿನಯದ 'ದೊಡ್ಮನೆ ಹುಡ್ಗ' ಚಿತ್ರ 12161 ಇಂಪ್ರೆಶನ್ ಗಳನ್ನು ಪಡೆದು ಎರಡನೇ ಸ್ಥಾನದಲ್ಲಿದೆ. ಇನ್ನೂ ಮೂರನೇ ಸ್ಥಾನದಲ್ಲಿ ಇರುವುದು 9260 ಇಂಪ್ರೆಶನ್ ಗಳೊಂದಿಗೆ ಪುನೀತ್ ಅಭಿನಯದ 'ರಾಜಕುಮಾರ' ಚಿತ್ರ.

ಕೇಕ್ ಮಾಡಿ ಸಂಭ್ರಮಿಸಿದ ದರ್ಶನ್

12426 ಇಂಪ್ರೆಶನ್ ಗಳನ್ನು ಪಡೆಯುವ ಮೂಲಕ ಅತಿ ಹೆಚ್ಚು ವೀಕ್ಷಣೆ ಪಡೆದ ಕನ್ನಡ ಚಿತ್ರ ಎಂಬ ಹೆಗ್ಗಳಿಕೆಗೆ 'ಮುನಿರತ್ನ ಕುರುಕ್ಷೇತ್ರ' ಪಾತ್ರವಾಗಿದೆ. ಈ ಖುಷಿಯನ್ನ ನಟ ದರ್ಶನ್, ಜೀ ಕನ್ನಡ ಬಿಸಿನೆಸ್ ಹೆಡ್ ರಾಘವೇಂದ್ರ ಹುಣಸೂರು, ನಟಿ ರಕ್ಷಿತಾ ಪ್ರೇಮ್, ನಟ ಜಗ್ಗೇಶ್ ಕೇಕ್ ಕಟ್ ಮಾಡುವ ಮೂಲಕ ಸಂಭ್ರಮಿಸಿದ್ದಾರೆ.

ಟಿ.ವಿ.ಆರ್ ನಲ್ಲಿ ಅಪ್ಪು ನಂಬರ್ 1

ಇಂಪ್ರೆಶನ್ ಆಧಾರದಲ್ಲಿ ದರ್ಶನ್ ಅಭಿನಯದ 'ಮುನಿರತ್ನ ಕುರುಕ್ಷೇತ್ರ' ನಂಬರ್ 1 ಇರಬಹುದು. ಆದ್ರೆ, ಟಿ.ವಿ.ಆರ್ (ಟೆಲಿವಿಶನ್ ರೇಟಿಂಗ್) ಆಧಾರದಲ್ಲಿ 20.7 ಪಾಯಿಂಟ್ ಗಳನ್ನು ಪಡೆದು 'ದೊಡ್ಮನೆ ಹುಡ್ಗ' ಚಿತ್ರ ಈಗಲೂ ಮೊದಲ ಸ್ಥಾನದಲ್ಲಿ ಭದ್ರವಾಗಿದೆ. ಟಿ.ವಿ.ಆರ್ ಪ್ರಕಾರ 19.5 ಪಾಯಿಂಟ್ ಗಳನ್ನು ಪಡೆದು 'ಮುನಿರತ್ನ ಕುರುಕ್ಷೇತ್ರ' ದ್ವಿತೀಯ ಸ್ಥಾನಕ್ಕೆ ಬಂದಿದೆ.