ಡಬ್ಬಿಂಗ್ ಹೋರಾಟಕ್ಕೆ ಮತ್ತೊಂದು ಜಯ: ಕನ್ನಡದಲ್ಲಿ 'ಮಹಾಭಾರತ' ಪ್ರಸಾರ ಖಚಿತ

ಸೋಮವಾರದಿಂದ ಪ್ರಸಾರ

ಲಾಕ್ ಡೌನ್ ಅವಧಿಯಲ್ಲಿ ದೂರದರ್ಶನದಲ್ಲಿ ಪ್ರಸಾರವಾದ 'ಮಹಾಭಾರತ' ಮತ್ತು 'ರಾಮಾಯಣ' ಧಾರಾವಾಹಿಗಳು ಅತಿ ಹೆಚ್ಚಿನ ಪ್ರಮಾಣದಲ್ಲಿ ವೀಕ್ಷಕರನ್ನು ಸೆಳೆದಿದ್ದವು. ಅದೇ ರೀತಿ ಪೌರಾಣಿಕ ಧಾರಾವಾಹಿಗಳು ಕನ್ನಡದಲ್ಲಿಯೂ ಪ್ರಸಾರವಾಗಬೇಕು ಎಂಬ ಒತ್ತಾಯ ಕೇಳಿಬಂದಿತ್ತು. ಮೇ 11ರಿಂದ ರಾತ್ರಿ 8 ಗಂಟೆಗೆ 'ಮಹಾಭಾರತ' ಬಿತ್ತರವಾಗಲಿದೆ.

ಏಪ್ರಿಲ್‌ನಲ್ಲಿಯೇ ಪ್ರಸಾರವಾಗಬೇಕಿತ್ತು

ಇದಕ್ಕೂ ಮುನ್ನ 'ಮಹಾಭಾರತ'ದ ಕನ್ನಡ ಅವತರಣಿಕೆ ಏಪ್ರಿಲ್‌ನಲ್ಲಿ ಪ್ರಸಾರ ಮಾಡಲಾಗುವುದು ಎಂದು ತಿಳಿಸಲಾಗಿತ್ತು. ಉದ್ದೇಶದಂತೆ ನಡೆದಿದ್ದರೆ ಏ. 13ರಿಂದ ರಾತ್ರಿ 9 ಗಂಟೆಗೆ 'ಮಹಾಭಾರತ' ಧಾರಾವಾಹಿ ಕನ್ನಡಿಗರನ್ನು ತಲುಪುತ್ತಿತ್ತು.

ಟ್ವಿಟ್ಟರ್‌ನಲ್ಲಿ ಆಂದೋಲನ

ಡಬ್ಬಿಂಗ್ ವಿರೋಧಿ ಬಣದ ಒತ್ತಡಕ್ಕೆ ಮಣಿದು 'ಮಹಾಭಾರತ' ಪ್ರಸಾರದಿಂದ ವಾಹಿನಿ ಹಿಂದೆ ಸರಿದಿತ್ತು. ಇದು ಡಬ್ಬಿಂಗ್ ಪರ ಹೋರಾಟಗಾರರ ಕೆಂಗಣ್ಣಿಗೆ ಗುರಿಯಾಗಿತ್ತು. ನಮ್ಮ ಭಾಷೆಯಲ್ಲಿ ಕಾರ್ಯಕ್ರಮ ವೀಕ್ಷಿಸುವುದು ನಮ್ಮ ಹಕ್ಕು. ಇದನ್ನು ಯಾರೂ ಕಸಿದುಕೊಳ್ಳುವಂತಿಲ್ಲ ಎಂದು, ಕನ್ನಡದಲ್ಲಿ ಮಹಾಭಾರತ ಪ್ರಸಾರಕ್ಕೆ ಟ್ವಿಟ್ಟರ್‌ನಲ್ಲಿ ಆಂದೋಲನ ನಡೆಸಲಾಗಿತ್ತು.

ಧೈರ್ಯವಾಗಿ ಪ್ರಸಾರ ಮಾಡಿ

ಕನ್ನಡದಲ್ಲಿ ಮಹಾಭಾರತ ಪ್ರಸಾರ ಮಾಡಬೇಡಿ ಎನ್ನುವವರು ಕನ್ನಡ ವಿರೋಧಿಗಳು, ಧೈರ್ಯವಾಗಿ ಪ್ರಸಾರ ಮಾಡಿ ನಿಮ್ಮ ಜೊತೆ ಕರವೇ ಇದೆ. 6.5 ಕೋಟಿ ಕನ್ನಡಿಗರ ಆಸೆಯೂ ಸಹ ಕನ್ನಡದಲ್ಲಿ ಬರಬೇಕು ಎಂಬುದು ಎಂದು ಕರವೇ ರಾಜ್ಯ ಉಪಾಧ್ಯಕ್ಷ ಡಾ. ಪಿ. ಆಂಜನಪ್ಪ ಇತ್ತೀಚೆಗೆ ಟ್ವೀಟ್ ಮಾಡಿದ್ದರು.