ಶನಿವಾರ ರಾತ್ರಿ ನಿಮ್ಮ ಮನೆಗೆ ಬರ್ತಿದೆ 'ಒಂದು ಮೊಟ್ಟೆಯ ಕಥೆ'

ಚಿತ್ರಮಂದಿರದಲ್ಲಿ 'ಒಂದು ಮೊಟ್ಟೆಯ ಕಥೆ' ನೋಡಲು ಮಿಸ್ ಮಾಡಿಕೊಂಡಿದ್ದವರಿಗೆ ಮತ್ತೊಂದು ಅವಕಾಶ. ಆದ್ರೆ, ಈ ಬಾರಿ ನೀವು ಥಿಯೇಟರ್ ಗೆ ಹೋಗುವ ಅವಶ್ಯಕತೆ ಇಲ್ಲ, 'ಒಂದು ಮೊಟ್ಟೆಯ ಕಥೆ'ಯೇ ನಿಮ್ಮ ಮನೆಗೆ ಬರ್ತಿದೆ.

ಹೌದು, ವರ್ಷದ ಸೂಪರ್ ಹಿಟ್ ಸಿನಿಮಾ 'ಒಂದು ಮೊಟ್ಟೆಯ ಕಥೆ' ಇದೇ ಶನಿವಾರ (ಅಕ್ಟೋಬರ್ 7) ರಾತ್ರಿ 8 ಗಂಟೆಗೆ ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದೆ.

ಜುಲೈ ತಿಂಗಳಲ್ಲಿ ತೆರೆಕಂಡಿದ್ದ 'ಒಂದು ಮೊಟ್ಟೆಯ ಕಥೆ' ವಿಭಿನ್ನ ಕಥೆ ಮತ್ತು ಚಿತ್ರಕಥೆಯ ಮೂಲಕ ಜನಮನ್ನಣೆ ಗಳಿಸಿಕೊಂಡಿತ್ತು. ಈ ಚಿತ್ರದ ನಾಯಕನ ಅಭಿನಯಕ್ಕೆ ಮೆಚ್ಚುಗೆ ವ್ಯಕ್ತವಾಗಿತ್ತು. ಅಷ್ಟೇ ಅಲ್ಲದೆ, ಕಡಿಮೆ ಬಜೆಟ್ ನಲ್ಲಿ ತಯಾರಾಗಿದ್ದ ಈ ಸಿನಿಮಾ ಬಾಕ್ಸ್ ಆಫೀಸ್ ನಲ್ಲು ಉತ್ತಮ ಗಳಿಕೆ ಕಂಡಿತ್ತು.

ರಾಜ್ ಬಿ ಶೆಟ್ಟಿ ಈ ಚಿತ್ರವನ್ನ ನಿರ್ದೇಶನ ಮಾಡಿ, ಸ್ವತಃ ನಾಯಕನಾಗಿ ನಟಿಸಿದ್ದರು. ಕೂದಲಿಲ್ಲದ ವ್ಯಕ್ತಿ ಮದುವೆಯಾಗಲು ಹುಡುಗಿ ಹುಡುಕುವ ಹಾಸ್ಯಮಯವಾದ ಕಥೆಯನ್ನ ಈ ಚಿತ್ರ ಒಳಗೊಂಡಿತ್ತು. ಉಷಾ ಭಂಡಾರಿ, ಅಮೃತಾ ನಾಯಕ್, ಮತ್ತು ದೀಪಕ್ ರೈ ಸೇರಿದಂತೆ ಹಲವರು ಅಭಿನಯಿಸಿದ್ದರು. ಮಿಥುನ್ ಮುಕಂದನ್ ಅವರು ಸಂಗೀತ ಒದಗಿಸಿದ್ದರು.