'ಪುಷ್ಪ 2' ಸಿನಿಮಾದಿಂದ ಹೊರ ನಡೆದ ಫಹಾದ್ ಫಾಸಿಲ್: ವಿಜಯ್ ಸೇತುಪತಿ ಕಾರಣ?

'ಪುಷ್ಪ 2' ಸಿನಿಮಾದಿಂದ ಫಹಾದ್ ಫಾಸಿಲ್ ಔಟ್

'ಪುಷ್ಪ' ಸಿನಿಮಾ ನೋಡಿದವರಿಗೆ ಮಲಯಾಳಂ ನಟ ಫಹಾದ್ ಫಾಸಿಲ್ ಯಾರು ಅಂತ ಹೇಳಬೇಕಿಲ್ಲ. ಇನ್ನು ಮಲಯಾಳಂ ಸಿನಿಮಾ ಪ್ರಿಯರಿಗೂ ಫಹಾಸ್ ಫಾಸಿಲ್ ಚಿರಪರಿಚಿತ. 'ಪುಷ್ಪ' ಮೊದಲ ಪಾರ್ಟ್‌ನಲ್ಲಿ ಭನ್ವರ್ ಸಿಂಗ್ ಶೇಕಾವತ್ ಪಾತ್ರದಲ್ಲಿ ಫಹಾದ್ ಫಾಸಿಲ್ ಮಿಂಚಿದ್ದರು. ಈ ಕಾರಣಕ್ಕೆ ಫಹಾದ್ ಹಾಗೂ ಅಲ್ಲು ಅರ್ಜುನ್ ಫೈಟ್ ಅನ್ನು 'ಪುಷ್ಪ 2'ನಲ್ಲಿ ನೋಡಲು ಕಾದು ಕೂತಿದ್ದರು. ಟಾಲಿವುಡ್‌ನಲ್ಲಿ ಕಳೆದೆರೆಡು ದಿನಗಳಿಂದ ಹರಿದಾಡುತ್ತಿದ್ದ ಸುದ್ದಿಯ ಪ್ರಕಾರ ಫಹಾದ್ ಫಾಸಿಲ್ ಈ ಸಿನಿಮಾದಿಂದ ಹೊರಬಂದಿದ್ದಾರೆ ಎನ್ನಲಾಗಿದೆ.

'ಪುಷ್ಪ 2' ಹೊರಬರಲು ಏನು ಕಾರಣ?

'ಪುಷ್ಪ 2' ಸಿನಿಮಾದಿಂದ ಫಹಾದ್ ಫಾಸಿಲ್ ಹೊರಬಂದಿದ್ದಾರೆ ಎಂಬ ಸುದ್ದಿ ಟಾಲಿವುಡ್‌ನಲ್ಲಿ ಸಿಕ್ಕಾ ಪಟ್ಟೆ ಸಂಚಲನ ಸೃಷ್ಟಿಸುತ್ತಿದೆ. ಇತ್ತೀಚೆಗೆ 'ಪುಷ್ಪ 2' ತಂಡ ದಕ್ಷಿಣ ಭಾರತದ ಮತ್ತೊಬ್ಬ ನಟ ವಿಜಯ್ ಸೇತುಪತಿಯನ್ನು ಪ್ರಮುಖ ಪಾತ್ರಕ್ಕಾಗಿ ಕರೆದುಕೊಂಡು ಬಂದಿದೆ. ಈ ಸುದ್ದಿ ಹೊರಬೀಳುತ್ತಿದ್ದಂತೆ ಫಹಾದ್ ಫಾಸಿಲ್ 'ಪುಷ್ಪ 2' ಸಿನಿಮಾದಿಂದ ಹೊರಬಂದಿದ್ದಾರೆ ಎಂದು ಹೇಳಲಾಗುತ್ತಿದೆ.

'ಪುಷ್ಪ' ಸಿನಿಮಾದಲ್ಲಿ ನಟಿಸಬೇಕಿತ್ತು ವಿಜಯ್

ಅಲ್ಲು ಅರ್ಜುನ್ ಮೊದಲ ಪ್ಯಾನ್ ಇಂಡಿಯಾ ಸಿನಿಮಾ 'ಪುಷ್ಪ'ದಲ್ಲಿ ನಟಿಸುವಂತೆ ವಿಜಯ್ ಸೇತುಪತಿಗೆ ಆಹ್ವಾನ ನೀಡಲಾಗಿತ್ತು. ಫಹಾದ್ ಫಾಸಿಲ್ ಪಾತ್ರದಲ್ಲಿಯೇ ವಿಜಯ್ ಸೇತುಪತಿ ನಟಿಬೇಕಿತ್ತು. ಆದರೆ, ಅಂದು ವಿಜಯ್ ಈ ಪಾತ್ರವನ್ನು ತಿರಸ್ಕರಿಸಿದ್ದರು. ಈಗ ಮತ್ತೆ ಪ್ರಮುಖ ವಿಲನ್ ಆಗಿ 'ಪುಷ್ಪ 2' ಸಿನಿಮಾದಲ್ಲಿ ಕಾಣಿಸಿಕೊಳ್ಳಲಿದ್ದಾರಂತೆ. ಇತ್ತೀಚೆಗೆ ತೆರೆಕಂಡ 'ವಿಕ್ರಂ' ಸಿನಿಮಾದಲ್ಲೂ ಫಹಾದ್ ಫಾಸಿಲ್ ಹಾಗೂ ವಿಜಯ್ ಸೇತುಪತಿ ಇಬ್ಬರೂ ಒಟ್ಟಿಗೆ ನಟಿಸಿದ್ದರು. ಆದ್ರೀಗ ಯಾಕೆ ದೂರ ಆಗುತ್ತಿದ್ದಾರೆ ಎಂಬುವುದು ಅಲ್ಲು ಫ್ಯಾನ್ಸ್ ತಲೆಕೆಡಿಸಿದೆ.

ಡಾಲಿ ಪಾತ್ರದ ಕಥೆಯೇನು?

ಕೆಲವು ದಿನಗಳ ಹಿಂದ ನಿರ್ದೇಶಕ ಸುಕುಮಾರ್ ನಟಿ ರಶ್ಮಿಕಾ ಮಂದಣ್ಣ ಪಾತ್ರಕ್ಕೂ ಕತ್ತರಿ ಹಾಕಿದ್ದಾರೆ ಎಂಬ ಸುದ್ದಿ ಹರಿದಾಡಿತ್ತು. ಈಗ ಫಹಾದ್ ಫಾಸಿಲ್ 'ಪುಷ್ಪ 2'ದಿಂದ ಹೊರ ಬಂದಿದ್ದಾರೆ ಎನ್ನಲಾಗುತ್ತಿದೆ. ಇನ್ನು ಉಳಿದುಕೊಂಡಿರೋದು ಡಾಲಿ ಧನಂಜಯ್ ಪಾತ್ರ. ಇದಕ್ಕೂ ಸುಕುಮಾರ್ ಕತ್ತರಿ ಹಾಕುತ್ತಾರಾ? ಈ ನಿರ್ಧಾರ ಮಾಡುತ್ತಿರುವುದು ಯಾಕೆ? ಅನ್ನೋ ಕುತೂಹಲ ಕೆರಳಿಸಿರುವುದಂತೂ ನಿಜ. ಆದರೆ, ಈಗ ಹರಿದಾಡುತ್ತಿರುವ ಸುದ್ದಿ ಬಗ್ಗೆ 'ಪುಷ್ಪ 2' ತಂಡ ಇನ್ನೂ ಅಧಿಕೃತ ಮಾಹಿತಿಯನ್ನು ನೀಡಿಲ್ಲ.