ಮೊದಲ ದಿನವೇ ಭಾರತದಲ್ಲಿ ಧೂಳೆಬ್ಬಿಸಿದ 'ಅವತಾರ್ 2' : ಆದರೂ KGF 2 ಮುಂದೆ ಗೆಲ್ಲಲಿಲ್ಲ!

'ಅವತಾರ್ 2' ಫಸ್ಟ್ ಡೇ ಕಲೆಕ್ಷನ್ ಎಷ್ಟು?

'ಅವತಾರ್ 2' ಅಥವಾ 'ಅವತಾರ್: ದ ವೇ ಆಫ್ ವಾಟರ್' ಭಾರತದ ಬಾಕ್ಸಾಫೀಸ್‌ನಲ್ಲಿ ಸೌಂಡು ಮಾಡುತ್ತಿದೆ. ಮೊದಲ ದಿನ ಸಿನಿಮಾಗೆ ಭಾರತದಲ್ಲಿ ಅತ್ಯದ್ಭುತ ರೆಸ್ಪಾನ್ಸ್ ಸಿಕ್ಕಿದೆ. 'ಅವತಾರ್' ತೆರೆಕಂಡು 13 ವರ್ಷಗಳ ಬಳಿಕ 'ಅವತಾರ್ 2' ರಿಲೀಸ್ ಆಗುತ್ತಿರೋದ್ರಿಂದ ಸಿನಿಪ್ರಿಯರಲ್ಲಿ ಸಹಜವಾಗಿಯೇ ಸಿಕ್ಕಾಪಟ್ಟೆ ಕುತೂಹಲವಿದೆ. ಭಾರತದಾದ್ಯಂತ ಈ ಸಿನಿಮಾ ಸುಮಾರು 38.50 ಕೋಟಿ ರೂ. ನಿಂದ 40.50 ಕೋಟಿ ರೂ. ಬಿಸಿನೆಸ್ ಮಾಡಿದೆ ಎಂದು ವರದಿಯಾಗಿದೆ. ಈ ಮೂಲಕ ಭಾರತದಲ್ಲಿ ಮೊದಲ ದಿನವೇ ಅತೀ ಕಲೆಕ್ಷನ್ ಮಾಡಿದ ಎರಡನೇ ಹಾಲಿವುಡ್ ಸಿನಿಮಾ ಎಂಬ ದಾಖಲೆ ಬರೆದಿದೆ.

'ಅವೆಂಜರ್ಸ್: ಎಂಡ್ ಗೇಮ್' ಹಿಂದಿಕ್ಕಲಿಲ್ಲ

'ಅವತಾರ್ 2' ಸಿನಿಮಾಗೆ ಅತ್ಯದ್ಬುತ ರೆಸ್ಪಾನ್ಸ್ ಸಿಕ್ಕಿದೆ. ಇನ್ನು ಶನಿವಾರ ಹಾಗೂ ಭಾನುವಾರ ಎರಡೂ ದಿನವೂ ಬಾಕ್ಸಾಫೀಸ್‌ನಲ್ಲಿ ದಾಖಲೆ ಗಳಿಕೆ ಮಾಡೋದು ಕನ್ಫರ್ಮ್. ಈ ಹಿನ್ನೆಲೆಯಲ್ಲಿ 'ಅವೆಂಜರ್ಸ್: ಎಂಡ್‌ ಗೇಮ್' ದಾಖಲೆಯನ್ನು 'ಅವತಾರ್ 2' ಬ್ರೇಕ್ ಮಾಡುತ್ತೆ ಎಂದೇ ನಿರೀಕ್ಷೆ ಮಾಡಲಾಗಿತ್ತು. ಆದರೆ, ಮೊದಲ ದಿನ 'ಅವತಾರ 2' ಭಾರತದಲ್ಲಿ ಕೇವಲ 40.50 ಕೋಟಿ ರೂ. ಕಲೆ ಹಾಕಿದೆಯಷ್ಟೇ. ಅದೇ 2019ರಲ್ಲಿ ತೆರೆಕಂಡಿದ್ದ 'ಅವೆಂಜರ್ಸ್: ಎಂಡ್ ಗೇಮ್' ಭಾರತದಲ್ಲಿ ಮೊದಲ ದಿನ 53.10 ಕೋಟಿ ರೂ. ಕಲೆಕ್ಷನ್ ಮಾಡಿತ್ತು.

'ಕೆಜಿಎಫ್ 2' ದಾಖಲೆ ಮುರಿಯಲಿಲ್ಲ 'ಅವತಾರ್ 2'

ದುಬಾರಿ ವೆಚ್ಚದ 'ಅವತಾರ್ 2' ಈ ವರ್ಷ ಭಾರತದಲ್ಲಿ ಸದ್ದು ಮಾಡಿದ್ದ ಎಲ್ಲಾ ಸಿನಿಮಾಗಳ ದಾಖಲೆಗಳನ್ನು ಉಡೀಸ್ ಮಾಡುತ್ತೆ ಎಂದು ನಿರೀಕ್ಷೆ ಮಾಡಲಾಗಿತ್ತು. 2022ರಲ್ಲಿ ಭಾರತದ ಬಾಕ್ಸಾಫೀಸ್‌ನಲ್ಲಿ ಅತೀ ಹೆಚ್ಚು ಗಳಿಕೆ ಕಂಡಿರೋ 'ಕೆಜಿಎಫ್ 2' ದಾಖಲೆ ಅಳಿಸು ಹಾಕುತ್ತೆ ಎಂದು ಊಹಿಸಲಾಗಿತ್ತು. 'ಕೆಜಿಎಫ್ 2' ಮೊದಲ ದಿನ ಭಾರತದಾದ್ಯಂತ 54 ಕೋಟಿ ರೂ. ಗಳಿಸಿತ್ತು. ಆ ದಾಖಲೆಯನ್ನೂ 'ಅವತಾರ್ 2' ಬ್ರೇಕ್ ಮಾಡಿಲ್ಲ. ಆದರೆ, ಸಿನಿಮಾ ಬಗ್ಗೆ ಉತ್ತಮ ಪ್ರತಿಕ್ರಿಯೆ ಇರೋದ್ರಿಂದ ಮುಂದಿನ ದಿನಗಳಲ್ಲಿ ಆಗೋ ಕಲೆಕ್ಷನ್ ಮೇಲೆ ಯಾವ್ಯಾವ ದಾಖಲೆ ಉಡೀಸ್ ಆಗುತ್ತೆ ಅನ್ನೋದು ಗೊತ್ತಾಗಲಿದೆ.

ದಕ್ಷಿಣದಲ್ಲಿ 'ಅವತಾರ್ 2' ಕಲೆಕ್ಷನ್ ಹೆಚ್ಚು

ಜೇಮ್ಸ್ ಕ್ಯಾಮರೂನ್ ನಿರ್ದೇಶಿಸಿದ 'ಅವತಾರ್ 2' ಮೊದಲ ದಿನ ದಕ್ಷಿಣ ಭಾರತದಲ್ಲೇ ಅತೀ ಹೆಚ್ಚು ಗಳಿಕೆ ಕಂಡಿದೆ. ಆಂಧ್ರ ಪ್ರದೇಶ, ತಮಿಳುನಾಡು, ಕೇರಳ ಹಾಗೂ ಕರ್ನಾಟಕದಿಂದಲೇ ಸುಮಾರು 22 ಕೋಟಿ ರೂ. ಕಲೆಕ್ಷನ್ ಆಗಿದೆ. ಉಳಿದ ಭಾಗಗಳಲ್ಲಿ ಸುಮಾರು 18 ಕೋಟಿ ರೂ. ಕಲೆಕ್ಷನ್ ಆಗಿದೆ. 'ಅವತಾರ್ 2' ಕಲೆಕ್ಷನ್‌ನಲ್ಲೂ ದಕ್ಷಿಣ ಭಾರತದಲ್ಲೇ ಅತೀ ಹೆಚ್ಚು ಗಳಿಕೆ ಮಾಡಿದೆ.