'ಪದವಿ ಪೂರ್ವ' ಇಷ್ಟ ಆಗದೆ ಇದ್ದರೆ ದುಪ್ಪಟ್ಟು ಹಣ ವಾಪಸ್: ವಿಡಿಯೋ ಬಿಟ್ಟ ಚಿತ್ರತಂಡ!

'ಪದವಿ ಪೂರ್ವ' ನಿರ್ದೇಶಕನ ವಿಡಿಯೋ

ಸ್ಯಾಂಡಲ್‌ವುಡ್‌ನಲ್ಲಿ ಬಹುತೇಕ ಹೊಸಬರ ಸಿನಿಮಾ 'ಪದವಿಪೂರ್ವ'ಗೆ ಮೆಚ್ಚುಗೆ ವ್ಯಕ್ತವಾಗಿತ್ತು. ಕಥೆ, ಚಿತ್ರಕಥೆ, ನಿರ್ದೇಶನ ಎಲ್ಲವೂ ಪ್ರೇಕ್ಷಕರ ಮನಸ್ಸನ್ನು ಮನಸೂರೆಗೊಳಿಸಿತ್ತು. ಆದರೂ, ಜನರು ಹೊಸಬರನ್ನು ನೋಡಲು ಥಿಯೇಟರ್‌ಗೆ ಬರುತ್ತಿಲ್ಲ. ಹೀಗಾಗಿ ನಿರ್ದೇಶಕ ಹರಿಪ್ರಸಾದ್ ಜಯಣ್ಣ ತಮ್ಮ ತಂಡದೊಂದಿಗೆ ಪ್ರೇಕ್ಷಕರಲ್ಲಿ ಮನವಿ ಮಾಡಿಕೊಂಡಿದ್ದಾರೆ. ಥಿಯೇಟರ್‌ ಬಂದು ಸಿನಿಮಾ ನೋಡಿ, ಇಷ್ಟ ಆಗದೇ ಇದ್ದಲ್ಲಿ ಟಿಕೆಟ್‌ನ ದುಪ್ಪಟ್ಟ ಹಣವನ್ನು ಹಿಂತಿರುಗಿಸುವುದಾಗಿ ಹೇಳಿಕೊಂಡಿದ್ದಾರೆ.

'ದುಪ್ಪಟ್ಟು ಹಣ ವಾಪಾಸ್ ಕೊಡುತ್ತೇವೆ'

" ಹೊಸತಂಡ ಹೊಸ ಪ್ರಯತ್ನವನ್ನು ಮಾಡಿದ್ದೀವಿ. ಎಲ್ಲರಿಂದ ಪ್ರಶಂಸೆಗಳು ಸಿಗುತ್ತಿವೆ. ಸಿನಿಮಾ ಥಿಯೇಟರ್‌ಗೋಸ್ಕರ ಮಾಡೋದು. ಟಿವಿ, ಓಟಿಟಿ ಎಲ್ಲಾ ಆಮೇಲೆ. ಥಿಯೇಟರ್‌ಗೆ ಬಂದು ದಯವಿಟ್ಟು ಸಿನಿಮಾ ನೋಡಿ. ನಿಮಗೆ ಯಾವುದೇ ರೀತಿಯಲ್ಲಿ ಮೋಸ ಆಗಲ್ಲ. ಒಂದು ವೇಳೆ ನಿರಾಸೆ ಆಯ್ತು ಅಂದರೆ, ಮೊದಲೇ ಹೇಳಿದ ಹಾಗೆ ಹಣವನ್ನು ವಾಪಾಸ್ ಕೊಡುತ್ತೇವೆ. ಒಂದು ವೇಳೆ ಇಷ್ಟ ಆಯ್ತು ಅಂದರೆ, ಒಂದು ಮೆಸೇಜ್ ಹಾಕಿ. ನೀವು ಪ್ರೋತ್ಸಾಹ ಕೊಟ್ಟಷ್ಟು, ಪ್ರಶಂಸೆ ನೀಡಿದಷ್ಟು ಒಳ್ಳೆ ಸಿನಿಮಾ ಕೊಡುತ್ತೇವೆ." ಎಂದು ನಿರ್ದೇಶಕ ಹರಿಪ್ರಸಾದ್ ವಿಡಿಯೋದಲ್ಲಿ ಹೇಳಿದ್ದಾರೆ.

'ಖಂಡಿತಾ ನಾವು ಕೆಟ್ಟ ಸಿನಿಮಾ ಮಾಡಿಲ್ಲ'

"ಜನರು ಯಾರು ಯಾರು ಸಿನಿಮಾ ನೋಡಿಲ್ಲ. ಮೂರು ದಿನ ಆದ್ಮೇಲೆ ಸಿನಿಮಾ ನೋಡಬೇಕು ಅಂದುಕೊಂಡಿದ್ದೀರ ಅವರು ಇವತ್ತೇ ಬಂದು ನೋಡಿ. ಖಂಡಿತಾ ನಾವು ಕೆಟ್ಟ ಸಿನಿಮಾ ಅಂತೂ ಮಾಡಿಲ್ಲ. ಒಳ್ಳೆ ಪ್ರಯತ್ನವೇ ಮಾಡಿದ್ದೇವೆ. ಆಮೇಲೆ ನಮ್ಮ ಪ್ರಡ್ಯೂಸರ್‌ಗೆ ಥ್ಯಾಂಕ್ಸ್ ಹೇಳಬೇಕು. ಎಷ್ಟೇ ಕಷ್ಟ ಆಗಿದ್ದರೂ, ನಮ್ಮ ಜೊತೆ ಇದ್ದಾರೆ." ಎಂದು ನಿರ್ದೇಶಕ ಹರಿಪ್ರಸಾದ್ ಜಯಣ್ಣ ಮನವಿ ಮಾಡಿಕೊಂಡಿದ್ದಾರೆ.

ಪದವಿಪೂರ್ವಗೆ ಯೋಗರಾಜ್ ಭಟ್ ನಿರ್ಮಾಪಕ

ನಿರ್ದೇಶಕ ಯೋಗರಾಜ್‌ ಭಟ್ ಈ ಯೂತ್‌ಫುಲ್ ಸಿನಿಮಾವನ್ನು ನಿರ್ಮಾಣ ಮಾಡಿದ್ದಾರೆ. ಇದೂವರೆಗೂ ಇಂತಹ ಜಾನರ್ ಸಿನಿಮಾ ಇತ್ತೀಚೆಗೆ ಯಾವುದೂ ಬಂದಿರಲಿಲ್ಲ. ಹೀಗಾಗಿ 'ಪದವಿ ಪೂರ್ವ' ಸಿನಿಮಾ ಬಾಕ್ಸಾಫೀಸ್‌ನಲ್ಲಿ ಅಬ್ಬರಿಸಬಹುದು. ಪ್ರೇಕ್ಷಕರ ಮನಗೆಲ್ಲಬಹುದು ಎಂದೇ ನಿರೀಕ್ಷೆ ಮಾಡಲಾಗಿತ್ತು. ಅಲ್ಲದೆ, ಸಿನಿಮಾ ಪಾಸಿಟಿವ್ ರಿಸಲ್ಟ್ ಸಿಕ್ಕಿರೋದ್ರಿಂದ ಸಿನಿಮಾ ಗೆಲ್ಲಿಸಲು ಚಿತ್ರತಂಡ ಇಂತಹ ಪ್ರಯತ್ನಕ್ಕೆ ಮುಂದಾಗಿದೆ.