'ಕಾಲಾಯ ನಮಃ' ಅಂತಿರೋ ಕೋಮಲ್‌ಗೆ ಎದುರು ನಿಂತ ಬಹುಭಾಷಾ ನಟ ಪ್ರಕಾಶ್ ರೈ!

ಜನರನ್ನು ಹೊಟ್ಟೆ ಹುಣ್ಣಾಗಿಸುವಷ್ಟು ನಗಿಸಿದ್ದ ಹಾಸ್ಯ ನಟ ಕೋಮಲ್ ಕುಮಾರ್. ಕಾಮಿಡಿ ರೋಲ್‌ಗಳಲ್ಲಿ ಸಿನಿಪ್ರಿಯರನ್ನು ನಗೆಗಡಲಲ್ಲಿ ತೇಲಿಸುವಲ್ಲಿ ಯಶಸ್ವಿಯಾಗಿದ್ದರು. ಆದರೆ, ನಾಯಕರಾದ್ಮೇಲೆ ಹಾಸ್ಯದ ಜೊತೆ ಜೊತೆಗೆ ವಿಭಿನ್ನ ರೋಲ್‌ಗಳಲ್ಲಿ ಕಾಣಿಸಿಕೊಂಡಿದ್ದರು.

ಹಲವು ಸಿನಿಮಾಗಳಲ್ಲಿ ನಾಯಕ ನಟರಾಗಿ ನಟಿಸಿದ ಬಳಿಕ ಕೆಲವು ದಿನಗಳ ಕಾಲ ಬ್ರೇಕ್ ಕೊಟ್ಟಿದ್ದರು. ಒಂದೊಳ್ಳೆ ಸಿನಿಮಾ ಕೊಡುವುದಕ್ಕೆ ಕಾತುರಾಗಿದ್ದ ಕೋಮಲ್ 'ಕಾಲಾಯಾ ನಮಃ' ಸಿನಿಮಾದ ಮೂಲಕ ಮತ್ತೆ ಸ್ಯಾಂಡಲ್‌ವುಡ್‌ಗೆ ಕಮ್ ಬ್ಯಾಕ್ ಮಾಡುತ್ತಿದ್ದಾರೆ.

ಮೂರ್ನಾಲ್ಕು ವರ್ಷಗಳ ಬಳಿಕ ಕೋಮಲ್ ಕುಮಾರ್ ಮತ್ತೆ ಸಿನಿಮಾದಲ್ಲಿ ಕಾಣಿಸಿಕೊಳ್ಳುತ್ತಿರೋದು ಅವರ ಅಭಿಮಾನಿಗಳಿಗೆ ಖುಷಿಕೊಟ್ಟಿದೆ. ಕೋಮಲ್ ಲುಕ್ ನೋಡಿ ಯಾವ ಜಾನರ್ ಅಂತ ಕನ್ಫ್ಯೂಸ್ ಆಗಿರೋದಂತೂ ನಿಜ. ಅದಕ್ಕೆ ಕಾರಣ ಬಹುಭಾಷಾ ನಟ ಪ್ರಕಾಶ್ ರಾಜ್.

'ಕಾಲಾಯಾ ನಮಃ' ಸಿನಿಮಾದ ಶೂಟಿಂಗ್ ಭರ್ಜರಿಯಾಗಿ ನಡೆಯುತ್ತಿದೆ. ಈ ತಂಡಕ್ಕೆ ಬಹುಭಾಷಾ ನಟ ಪ್ರಕಾಶ್ ರಾಜ್ ಎಂಟ್ರಿ ಕೊಟ್ಟಿದ್ದಾರೆ. ಪ್ರಕಾಶ್ ರಾಜ್ ಇದ್ದಾರೆ ಅಂದ್ಮೇಲೆ ಅದು ಯಾವ ತರಹದ ಸಿನಿಮಾ ಬೇಕಿದ್ದರೂ, ಆಗಿರಬಹುದು. ಎಲ್ಲಾ ಪಾತ್ರಕ್ಕೂ ಒಗ್ಗಿಕೊಳ್ಳುವ ನಟ ಈ ಸಿನಿಮಾ ಮೇಕಿಂಗ್ ದೃಶ್ಯಗಳಲ್ಲಿ ಕೊಂಚ ಗಂಭೀರವಾಗಿ ಕಾಣಿಸಿಕೊಳ್ಳುತ್ತಾರೆ. ಈ ಕಾರಣಕ್ಕೆ ಈ ಸಿನಿಮಾದ ಕಥೆ ಗಂಭೀರವಾಗಿರುತ್ತೋ ಅಥವಾ ಹಾಸ್ಯಮಯವಾಗಿರುತ್ತೋ ಅನ್ನೋದನ್ನು ಸಿನಿಮಾ ಕಂಪ್ಲೀಟ್ ಆದ್ಮೇಲೆ ರಿವೀಲ್ ಆಗುತ್ತೆ.

ಸದ್ಯಕ್ಕೆ ಈ ಸಿನಿಮಾ ಮೈಸೂರಿನಲ್ಲಿ ಶೂಟಿಂಗ್ ನಡೆಯುತ್ತಿದೆ. ಅನುಸೂಯ ಕೋಮಲ್ ಕುಮಾರ್ ಈ ಸಿನಿಮಾವನ್ನು ನಿರ್ಮಾಣ ಮಾಡುತ್ತಿದ್ದಾರೆ. ಮತಿವಣನ್ ಈ ಚಿತ್ರಕ್ಕೆ ಆಕ್ಷನ್ ಕಟ್ ಹೇಳುತ್ತಿದ್ದು, ಎಮಿಲ್ ಸಂಗೀತ ನಿರ್ದೇಶನ ಹಾಗೂ ರಾಕೇಶ್ ಸಿ ತಿಲಕ್ ಕ್ಯಾಮರಾಮ್ಯಾನ್.

ಕೋಮಲ್ ಕುಮಾರ್ ಜೊತೆಗೆ ಆಸಿಯಾ ಫಿರ್ದೋಸ್, ಪ್ರಕಾಶ್ ರೈ, ಸುಚೀಂದ್ರ ಪ್ರಸಾದ್, ತಿಲಕ್, ಶೈನ್ ಶೆಟ್ಟಿ , ಯತಿರಾಜ್ ಜಗ್ಗೇಶ್ ಸೇರಿದಂತೆ ಕನ್ನಡ ಚಿತ್ರರಂಗದ ಹಿರಿಯ ಕಲಾವಿದರು ನಟಿಸುತ್ತಿದ್ದಾರೆ.