ಅಪ್ಪು ಹುಟ್ಟುಹಬ್ಬದಂದು 'ಜೇಮ್ಸ್' ಜಾತ್ರೆಗೆ ಸಜ್ಜಾದ ಮಂಡ್ಯ ಅಭಿಮಾನಿಗಳು

ಬೆಳ್ಳಿರಥದಲ್ಲಿ ಅಪ್ಪು ಭಾವಚಿತ್ರ

ಮಂಡ್ಯದಲ್ಲಿ ಅಪ್ಪು ಅಭಿಮಾನಿಗಳ ಸಂಭ್ರಮ ಮಧ್ಯರಾತ್ರಿಯಿಂದಲೇ ಆರಂಭಗೊಂಡರೂ, ಬೆಳಗ್ಗೆ 7 ಗಂಟೆಗೆ ಬೆಳ್ಳಿರಥದಲ್ಲಿ ಜೇಮ್ಸ್ ಮೆರವಣಿಗೆ ಆರಂಭಿಸಲಿದ್ದಾರೆ. ಮಂಡ್ಯದ ಕಾಳಮ್ಮ ದೇವಸ್ಥಾನಕ್ಕೆ ಪೂಜೆ ಸಲ್ಲಿಸಿ, ಪುನೀತ್ ರಾಜ್‌ಕುಮಾರ್ ಭಾವ ಚಿತ್ರ ಹಿಡಿದು ಚಿತ್ರಮಂದಿರಗಳಿಗೆ ಮೆರವಣಿಗೆ ಹೊರಡಲಿದ್ದಾರೆ. ಅಪ್ಪು ಕಟೌಟ್‌ಗೆ ಲೈಟಿಂಗ್ ವ್ಯವಸ್ಥೆಯನ್ನು ಮಾಡಲಿದ್ದಾರೆ. ಈ ಮೆರವಣಿಗೆಯಲ್ಲಿ ಡೊಳ್ಳುಕುಣಿತ, ತಮಟೆ, ಪೂಜಾ ಕುಣಿತ ಕೂಡ ಇರಲಿದೆ ಎಂದು ಅಭಿಮಾನಿಗಳು ಹೇಳಿದ್ದಾರೆ.

ಪ್ರತಿ ಪ್ರದರ್ಶನಕ್ಕೂ ಸಿಡಿಮದ್ದು

ಸೂಪರ್‌ಸ್ಟಾರ್ ಸಿನಿಮಾ ಬಿಡುಗಡೆಯಾದಾಗ ಅವರ ಅಭಿಮಾನಿಗಳು ಸಹಜವಾಗಿಯೇ ಥಿಯೇಟರ್ ಮುಂದೆ ಸಂಭ್ರಮಿಸುತ್ತಾರೆ. ಫಸ್ಟ್ ಶೋ ಮುಗಿದ ಕೂಡಲೇ ಫ್ಯಾನ್ಸ್ ಚಿತ್ರಮಂದಿರದ ಮುಂದೆ ಪಟಾಕಿ ಸಿಡಿಸುತ್ತಾರೆ. ಒಂದು ಶೋಗೆ ಹೀಗೆ ಪಟಾಕಿ ಸಿಡಿಸುವುದು ಸಹಜ. ಆದರೆ, ಮಂಡ್ಯದ ಅಭಿಮಾನಿಗಳು 'ಜೇಮ್ಸ್' ಸಿನಿಮಾ ರಿಲೀಸ್ ಆದ ದಿನ ಪ್ರತಿ ಶೋಗೂ ಪಟಾಕಿಗಳನ್ನು ಸಿಡಿಸಿ ಸಂಭ್ರಮಿಸಲಿದ್ದಾರೆ. ಪುನೀತ್ ಕಟೌಟ್‌ಗೆ ಹಾಲಿನ ಅಭಿಷೇಕ, ಪುಷ್ಪಾರ್ಚನೆ ಕೂಡ ನಡೆಯಲಿದೆ.

ಮಧ್ಯಾಹ್ನ ಬಿರಿಯಾನಿ, ಸಂಜೆ ಡಿಜೆ

ಪ್ರಮುಖ ಚಿತ್ರಮಂದಿರದ ಮುಂದೆ ಅನ್ನದಾಸೋಹ ಕಾರ್ಯಕ್ರಮವನ್ನು ಮಂಡ್ಯದ ಅಪ್ಪು ಅಡ್ಡ ತಂಡ ಹಮ್ಮಿಕೊಂಡಿದೆ. ಇದೇ ವೇಳೆ ಆಟೋ ರಿಕ್ಷಾ ಮೆರವಣೆಗೆ ಕೂಡ ನಡೆಯಲಿದೆ. ಸ್ಕ್ರೀನ್ ಮುಂದೆನೇ ಅಭಿಮಾನಿಗಳಿಂದ ಸೆಲೆಬ್ರೆಷನ್ ನಡೆಯಲಿದೆ. ಮಾರನೇ ದಿನ ಅಂದರೆ, ಮಾರ್ಚ್ 18 ರಂದು ಡಾ. ರಾಜ್ ಅಭಿಮಾನಿ ಬಳಗದಿಂದ ಮಧ್ಯಾಹ್ನ 1 ಗಂಟೆಗೆ ಚಿಕನ್ ಬಿರಿಯಾನಿ ವಿತರಣೆ ಮಾಡಲಿದ್ದಾರೆ. ಸಂಜೆ 4 ಗಂಟೆಗೆ ಇದೇ ತಂಡ ಡಿ ಜೆ ಕಾರ್ಯಕ್ರಮವನ್ನು ಹಮ್ಮಿಕೊಂಡಿದೆ.

'ಜೇಮ್ಸ್' ತಂಡದಿಂದ ಹಿಂದೆಂದೂ ನೋಡಿರದ ಅಪ್ಪು ಲುಕ್ ರಿವೀಲ್: ಅಭಿಮಾನಿಗಳಿಂದಲೇ ಬಿಡುಗಡೆ

5 ಭಾಷೆಯಲ್ಲಿ ಜೇಮ್ಸ್ ರಿಲೀಸ್

ಪುನೀತ್ ರಾಜ್‌ಕುಮಾರ್ ಅಭಿನಯದ ಕೊನೆಯ ಸಿನಿಮಾ 'ಜೇಮ್ಸ್' 5 ಭಾಷೆಗಳಲ್ಲಿ ಅದ್ಧೂರಿಯಾಗಿ ಏಕಕಾಲಕ್ಕೆ ಬಿಡುಗಡೆಯಾಗಲಿದೆ. ಕನ್ನಡ, ತೆಲುಗು, ತಮಿಳು, ಮಲಯಾಳಂ ಹಾಗೂ ಹಿಂದಿ ಭಾಷೆಗಳಲ್ಲಿ ಅಪ್ಪು ಸಿನಿಮಾ ರಿಲೀಸ್ ಆಗುತ್ತಿದೆ. ಬೇರೆ ಭಾಷೆಗಳಲ್ಲಿ ಈ ಸಿನಿಮಾವನ್ನು ಹೇಗೆ ರಿಲೀಸ್ ಮಾಡುತ್ತಾರೆ? 'ಜೇಮ್ಸ್' ತಂಡದ ಪ್ಲ್ಯಾನ್ ಏನು? ಅನ್ನುವುದು ಇನ್ನೂ ರಿವೀಲ್ ಆಗಿಲ್ಲ. ಆದರೆ, ದಕ್ಷಿಣ ಭಾರತದಲ್ಲಿ 'ಜೇಮ್ಸ್' ಅದ್ದೂರಿಯಾಗಿ ಬಿಡುಗಡೆಯಾಗುವುದಂತೂ ಗ್ಯಾರಂಟಿ. ಕೆಲ ಮೂಲಗಳ ಪ್ರಕಾರ 'ಜೇಮ್ಸ್' ಅತೀ ಹೆಚ್ಚು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ.