'ಬೈರತಿ ರಣಗಲ್' ಶಿವಣ್ಣನ 125ನೇ ಸಿನಿಮಾ ಆಗಿಲ್ಲ ಯಾಕೆ? ಸಿನಿಮಾ ಸೆಟ್ಟೇರುತ್ತಾ ಇಲ್ವಾ?

'ಮಫ್ತಿ' ಬಳಿಕ 'ಬೈರತಿ ರಣಗಲ್?

'ಮಫ್ತಿ' ಸಿನಿಮಾ ಬಾಕ್ಸಾಫೀಸ್‌ನಲ್ಲಿ ಧೂಳೆಬ್ಬಿಸುತ್ತಿ. ಬೈರತಿ ರಣಗಲ್ ಅವತಾರದಲ್ಲಿ ಶಿವಣ್ಣನ ಮಾಸ್ ಎಂಟ್ರಿ ಪ್ರೇಕ್ಷಕರು ಫಿದಾ ಆಗಿದ್ದರು. ಬ್ಲ್ಯಾಕ್ ಶರ್ಟ್ ಹಾಗೂ ಪಂಚೆಯುಟ್ಟು ರಗಡ್ ಲುಕ್ ಕೊಟ್ಟಿದ್ದ ಶಿವಣ್ಣ ಜನರ ಮನಗೆದ್ದಿದ್ದರು. ಇದೇ ವೇಳೆ 'ಮಫ್ತಿ' ಸಿನಿಮಾದ ನಿರ್ದೇಶಕ ನರ್ತನ್ ಶಿವಣ್ಣನಿಗಾಗಿ 'ಬೈರತಿ ರಣಗಲ್' ಸಿನಿಮಾವನ್ನು ನಿರ್ದೇಶನ ಮಾಡುತ್ತಾರೆ ಅಂತ ಸುದ್ದಿಯಾಗಿತ್ತು. 'ವೇದ' ಸಿನಿಮಾದ ಬಳಿಕ ಮತ್ತೆ 'ಬೈರತಿ ರಣಗಲ್' ಬಗ್ಗೆ ಟಾಕ್ ಶುರುವಾಗಿದೆ.

'ಮಫ್ತಿ'ಯ ಪ್ರೀಕ್ವೆಲ್ 'ಬೈರತಿ ರಣಗಲ್'

'ವೇದ' ಸಿನಿಮಾ ಬಳಿಕ 'ಬೈರತಿ ರಣಗಲ್' ಬಗ್ಗೆ ಶಿವರಾಜ್‌ಕುಮಾರ್ ಪ್ರತಿಕ್ರಿಯೆ ನೀಡಿದ್ದಾರೆ. ಸಿನಿಬಜ್ ಜೊತೆ ಮಾತಾಡುವಾಗ, ಈ ಸಿನಿಮಾ ಯಾಕೆ ಸೆಟ್ಟೇರಿಲ್ಲ? ಯಾವಾಗ ಶುರುವಾಗುತ್ತೆ? ಅನ್ನೋ ಬಗ್ಗೆ ಮಾಹಿತಿ ನೀಡಿದ್ದಾರೆ. "ಡೈರೆಕ್ಟರ್ ನಾನು 'ಬೈರತಿ ರಣಗಲ್' ಸಿನಿಮಾ ಮಾಡಬೇಕಿತ್ತು. ಬೇರೆ ಯಾವುದರಲ್ಲೋ ಬ್ಯುಸಿಯಾಗಿದ್ದೀನಿ ಅಂತ ಹೇಳಿದ್ದರಿಂದ ಸ್ವಲ್ಪ ಪಿಕ್ಚರ್ ತಳ್ಳಿತು ಅಷ್ಡೇ. ಮತ್ತೆ ಈ ಸಿನಿಮಾ ಆರಂಭ ಆಗುತ್ತೆ. ಇದೂ ಒಂದು ಕಲ್ಟ್ ಸಿನಿಮಾ. ಪ್ರೀಕ್ವೆಲ್ ಅಂಡ್ ಸೀಕ್ವೆಲ್ ಆಗುತ್ತೆ." ಎಂದಿದ್ದಾರೆ ಶಿವಣ್ಣ.

ನಿರ್ದೇಶಕ ನರ್ತನ್ ಹೇಳಿದ್ದೇನೆ?

'ಬೈರತಿ ರಣಗಲ್' ಸಿನಿಮಾದ ಟೈಟಲ್ ಈಗಾಗಲೇ ರಿಜಿಸ್ಟರ್ ಆಗಿದೆ ಅನ್ನೋ ಮಾತು ಕೇಳಿ ಬರುತ್ತಿದೆ. ಆದರೆ, ಸಿನಿಮಾ ಯಾಕೆ ಸೆಟ್ಟೇರಿಲ್ಲ? ಅನ್ನೋ ಬಗ್ಗೆ ನರ್ತನ್ ಫಿಲ್ಮಿಬೀಟ್ ಬಗ್ಗೆ ಮಾಹಿತಿ ನೀಡಿದ್ದಾರೆ. "ಕಥೆ ಸಿದ್ಧ ಮಾಡಿ ಆಗಿದೆ. ಅದೂ ಆಗಿಲ್ಲ. ಯಾಕಂದ್ರೆ, ಶಿವಣ್ಣ ಬೇರೆ ಬೇರೆ ಸಿನಿಮಾದಲ್ಲಿ ಬ್ಯುಸಿಯಾಗಿದ್ದರು. 'ಬೈರತಿ ರಣಗಲ್' ಶಿವಣ್ಣ ಅವರ 125ನೇ ಸಿನಿಮಾ ಆಗಬೇಕಿತ್ತು. ಆದರೆ, ಅದ್ಯಾಕೋ ಆಗಲಿಲ್ಲ." ಎಂದು ಫಿಲ್ಮಿಬೀಟ್ ನರ್ತನ್ ಮಾಹಿತಿ ನೀಡಿದ್ದಾರೆ.

ಥಿಯೇಟರ್‌ನಲ್ಲಿ 'ವೇದ'ಗೆ ರೆಸ್ಪಾನ್ಸ್ ಹೇಗಿದೆ?

'ಬೈರತಿ ರಣಗಲ್' ಶಿವಣ್ಣನ 125ನೇ ಸಿನಿಮಾ ಆಗುತ್ತೆ ಅಂತ ಸುದ್ದಿ ಹಬ್ಬಿತ್ತು. ಆದರೆ, ಆ ಸಿನಿಮಾ ಸೆಟ್ಟೇರಲಿಲ್ಲ. ಅದೇ ಜಾಗದಲ್ಲಿ 125ನೇ ಸಿನಿಮಾ ಆಗಿ 'ವೇದ' ಸೆಟ್ಟೇರಿತ್ತು. ಥಿಯೇಟರ್‌ನಲ್ಲಿ ಈಗಾಗಲೇ ಎರಡನೇ ವಾರದತ್ತ ಮುನ್ನುಗ್ಗುತ್ತಿದೆ. ಬಾಕ್ಸಾಫೀಸ್‌ನಲ್ಲಿ ಸಖತ್ ಆಗಿಯೇ ಕಲೆಕ್ಷನ್ ಮಾಡುತ್ತಿದೆ ಎಂದು ವಿತರಕರು ಹೇಳುತ್ತಿದ್ದಾರೆ.