Simbu Car Accident: ಸಿಂಬು ಕಾರು ಅಪಘಾತದಲ್ಲಿ 70 ವರ್ಷದ ವೃದ್ಧ ಸಾವು: ವಿಡಿಯೋ ವೈರಲ್

ಅಪಘಾತ ನಡೆದಿದ್ದು ಯಾವಾಗ?

ಸಿಂಬು ಕಾರು ಅಪಘಾತ ಒಂದು ವಾರದ ಹಿಂದನೇ ನಡೆದಿದೆ. ಮಾರ್ಚ್ 18ಕ್ಕೆ ಈ ಘಟನೆ ನಡೆದಿದೆ ಎನ್ನಲಾಗಿದೆ. ಆದರೆ, ಘಟನೆ ನಡೆದು ಐದಾರು ದಿನಗಳಾದ ಬಳಿಕ ಬೆಳಕಿಗೆ ಬಂದಿದ್ದು ತಮಿಳುನಾಡಿನಲ್ಲಿ ಬಿಸಿಬಿಸಿ ಚರ್ಚೆಯಾಗಿದೆ. ಸ್ಟಾರ್‌ಗಳು ಬಳಸುವ ಕಾರು ಅಪಘಾತ ಆಗುತ್ತಲೇ ಇರುತ್ತೆ. ಕೆಲವು ಚಿಕ್ಕ ಪುಟ್ಟ ಹಾನಿಯಾಗುತ್ತೆ. ಮತ್ತೆ ಕೆಲವೊಮ್ಮೆ ಜನಸಾಮಾನ್ಯರ ಪ್ರಾಣವೇ ಹೋಗುತ್ತೆ. ಈ ಬಾರಿ ಕೂಡ 70 ವರ್ಷದ ವೃದ್ಧನ ಪ್ರಾಣ ಕಳೆದುಕೊಂಡಿದ್ದಾರೆ.

ಮೃತಪಟ್ಟ ಮುನುಸ್ವಾಮಿ ಯಾರು?

70 ವರ್ಷದ ಮುನುಸ್ವಾಮಿ ರಸ್ತೆ ದಾಟುತ್ತಿದ್ದರು. ಈ ವೇಳೆ ಸಿಂಬು ಕಾರು ಈತನ ಮೇಲೆ ಹರಿದಿದೆ. ಸಿಂಬು ಒಡೆತನದ ಕಾರು ಅಪಘಾತದಲ್ಲಿ ಮೃತಪಟ್ಟ ಮುನುಸ್ವಾಮಿ ತಮಿಳುನಾಡಿನ ತೇನಂಪೇಟ್ ಎಂಬಲ್ಲಿ ಕೂಲಿ ಕೆಲಸ ಮಾಡಿಕೊಂಡಿದ್ದ. ಒಂದು ವಾರದ ಹಿಂದೆ ಕೊಳಚೆ ಚರಂಡಿ ದುರಸ್ಥಿ ಕೆಲಸ ಮಾಡುವಾಗ ಕಾಲಿಗೆ ಪೆಟ್ಟಾಗಿತ್ತು. ಹೀಗಾಗಿ ನಿಧಾನವಾಗಿ ರಸ್ತೆ ದಾಟುತ್ತಿದ್ದ. ಈ ವೇಳೆ ಕಾರು ಗುದ್ದಿದ್ದು, ಪರಿಣಾಮ ತೀವ್ರ ಗಾಯಕೊಂಡ ವ್ಯಕ್ತಿ ಆಸ್ಪತ್ರೆಯಲ್ಲಿ ಸಾವನ್ನಪ್ಪಿದ್ದಾನೆ.

ಕಾರಿನಲ್ಲಿ ಸಿಂಬು ಇದ್ರಾ?

ಸಿಂಬು ಹೆಸರಲ್ಲಿ ನೋಂದಣಿಯಾಗಿರುವ ಕಾರನ್ನು ಅವರ ತಂದೆ ಟಿ ರಾಜೇಂದ್ರ ಬಳಸುತ್ತಿದ್ದರು ಎನ್ನಲಾಗಿದೆ. ಹೀಗಾಗಿ ಅವರ ಚಾಲಕ ಸೆಲ್ವಂ ಅನ್ನು ತಮಿಳುನಾಡು ಪೊಲೀಸರು ಬಂಧಿಸಿದ್ದಾರೆ. ಆದರೆ, ಪೊಲೀಸರು ವಿಚಾರಣೆ ವೇಳೆ ಏನೇನು ಮಾಹಿತಿ ಕಲೆ ಹಾಕಿದ್ದಾರೆ ಎಂಬುದು ತಿಳಿದು ಬಂದಿಲ್ಲ. ಅಪಘಾತ ನಡೆದ ಸ್ಥಳದಲ್ಲಿ ಸಿಂಬು ಇದ್ದರಾ? ಆ ಕಾರಿನಲ್ಲಿ ಸಿಂಬು ಪ್ರಯಾಣ ಮಾಡುತ್ತಿದ್ದರಾ? ಇಲ್ವಾ? ಸಿಂಬು ತಂದೆ ಟಿ. ರಾಜೇಂದ್ರ ಪ್ರಯಾಣ ಮಾಡುತ್ತಿದ್ದರಾ? ಇವೆಲ್ಲವೂ ವಿಚಾರಣೆಯಲ್ಲಿ ಹೊರಬೀಳಬೇಕಿದೆ.

ಯಶಸ್ಸಿನ ಖುಷಿಯಲ್ಲಿದ್ದ ಸಿಂಬು

ಇತ್ತೀಚೆಗೆಷ್ಟೇ ಸಿಂಬು ಅಭಿನಯದ ಮನಾಡು ಸಿನಿಮಾ ಬಿಡುಗಡೆಯಾಗಿತ್ತು. ಬಾಕ್ಸಾಫೀಸ್‌ನಲ್ಲಿ ಈ ಸಿನಿಮಾ ಉತ್ತಮ ಪ್ರತಿಕ್ರಿಯೆ ಕೂಡ ವ್ಯಕ್ತವಾಗಿದೆ. ಸಿನಿಮಾ ಗೆದ್ದ ಖುಷಿಯಲ್ಲಿದ್ದ ಸಿಂಬುಗೆ ಈ ಕಾರು ಅಪಘಾತ ಹೊಸ ಸಂಕಷ್ಟಕ್ಕೆ ಸಿಲುಕಿಸಿದೆ. ತಮಿಳು ಚಿತ್ರರಂಗದಲ್ಲಿ ನಟನಾಗಿ, ನಿರ್ದೇಶಕನಾಗಿ ಸಿಂಬು ಹೆಸರು ಮಾಡಿದ್ದಾರೆ. ಇದರ ಜೊತೆಗೆ ಒಂದಿಷ್ಟು ವಿವಾದಗಳೂ ಕೂಡ ಇವರನ್ನು ಸುತ್ತಿಕೊಂಡಿದೆ. ಸದ್ಯ ಸಿಂಬು ಕೈಯಲ್ಲಿ ಹಲವು ಆಫರ್‌ಗಳಿವೆ.