ವಿಜಯ್ ದಳಪತಿಗೆ ವಿಜಯ್ ಸೇತುಪತಿ ಕಿಸ್: ವೈರಲ್ ಆಯ್ತು ಫೋಟೊ

ವಿಜಯ್ ಸೇತುಪತಿಯ ಟ್ರೇಟ್ ಮಾರ್ಕ್

ವಿಜಯ್ ಸೇತುಪತಿ ತಮ್ಮ ಅಭಿಮಾನಿಗಳು ಹಾಗೂ ಸ್ನೇಹಿತರ ಮೇಲಿನ ಪ್ರೀತಿಯನ್ನು ಮುಕ್ತವಾಗಿ ಪ್ರದರ್ಶಿಸುವುದರಲ್ಲಿ ಹೆಸರುವಾಸಿ. ಸ್ನೇಹಿತರೇ ಇರಲಿ, ಅಭಿಮಾನಿಗಳೇ ಇರಲಿ, ಅವರ ಕೆನ್ನೆಗೆ ಮುತ್ತುಕೊಟ್ಟು ಅವರಿಗೆ ಖುಷಿಪಡಿಸುತ್ತಾರೆ. ಈಗ ವಿಜಯ್ ದಳಪತಿ ಕೆನ್ನೆಗೂ ಮುತ್ತು ನೀಡಿ ಸುದ್ದಿಯಾಗಿದ್ದಾರೆ.

ಸ್ವತಃ ವಿಜಯ್ ಕೇಳಿದ್ದರು

ಕೆಲವು ವಾರಗಳ ಹಿಂದೆ ಚಿತ್ರೀಕರಣ ನಡೆಯುತ್ತಿದ್ದ ಸಂದರ್ಭದಲ್ಲಿ ವಿಜಯ್ ದಳಪತಿ, ನನ್ನೊಂದಿಗೆ ನಿಮ್ಮ 'ಟ್ರೇಡ್‌ಮಾರ್ಕ್' ಪೋಸ್ ನೀಡುತ್ತೀರಾ ಎಂದು ಕೇಳಿದ್ದರಂತೆ. ಸಿನಿಮಾದ ಚಿತ್ರೀಕರಣ ಮುಗಿದ ಬಳಿಕ 'ಮಾಸ್ಟರ್' ಚಿತ್ರತಂಡ ಈ ವಿಶಿಷ್ಟ ಫೋಟೊವನ್ನು ಬಿಡುಗಡೆ ಮಾಡಿದೆ.

ಖುಷಿ ಹಂಚಿಕೊಂಡ ಜಗದೀಶ್

ಈ ಇಬ್ಬರು ತಾರೆಯರ ಸ್ಮರಣೀಯ ಚಿತ್ರವನ್ನು 'ಮಾಸ್ಟರ್' ಸಿನಿಮಾದ ಎಕ್ಸಿಕ್ಯುಟಿವ್ ಪ್ರೊಡ್ಯೂಸರ್ ಜಗದೀಶ್, ಟ್ವಿಟ್ಟರ್‌ನಲ್ಲಿ ಹಂಚಿಕೊಂಡಿದ್ದಾರೆ. 'ಕೆಲವು ಅದ್ಭುತ ವಾರಗಳ ಬಳಿಕ ಅಂತ್ಯಗೊಳ್ಳುವ ಸಮಯ ಬಂದಿದೆ. ಮಾಸ್ಟರ್ ಶೂಟಿಂಗ್ ಮುಕ್ತಾಯಗೊಂಡಿದೆ. ದಳಪತಿ ವಿಜಯ್, ವಿಜಯ್ ಸೇತುಪತಿ ಹಾಗೂ ನಿರ್ದೇಶಕ ಲೋಕೇಶ್ ಅವರಿಗೆ ಹೃದಯಪೂರ್ವಕ ಧನ್ಯವಾದಗಳು. ಮಾಸ್ಟರ್ ಸಂಭ್ರಮಾಚರಣೆಗೆ ಕಾಯುತ್ತಿದ್ದೇನೆ' ಎಂದು ಅವರು ತಿಳಿಸಿದ್ದಾರೆ.

ಅಭಿಮಾನಿಗಳಲ್ಲಿ ರೋಮಾಂಚನ

ಮಾಸ್ಟರ್ ಸಿನಿಮಾದ ಚಿತ್ರೀಕರಣ ಸಂಪೂರ್ಣವಾಗಿ ಕೊನೆಗೊಂಡಿದ್ದು, ಪೋಸ್ಟ್ ಪ್ರೊಡಕ್ಷನ್ ಕೆಲಸ ಚುರುಕುಗೊಂಡಿದೆ. 'ಮಾಸ್ಟರ್' ಚಿತ್ರವು ತನ್ನ ಅಪರೂಪದ ಚಿತ್ರತಂಡದ ಕಾರಣದಿಂದಲೇ ಗಮನ ಸೆಳೆದಿದೆ. ವಿಜಯ್ ಸೇತುಪತಿ ಮತ್ತು ವಿಜಯ್ ದಳಪತಿ ಒಂದೇ ತೆರೆಯ ಮೇಲೆ ಕಾಣಿಸಿಕೊಳ್ಳುತ್ತಿರುವುದು ಅವರ ಅಭಿಮಾನಿಗಳಲ್ಲಿ ರೋಮಾಂಚನ ಮೂಡಿಸಿದೆ.

ಏಪ್ರಿಲ್ 9ರಂದು ಬಿಡುಗಡೆ

ಮಾಳವಿಕಾ ಮೋಹನನ್, ವಿಜಯ್ ಜತೆ ರೊಮ್ಯಾನ್ಸ್ ಮಾಡಿದ್ದಾರೆ. ಚಿತ್ರದಲ್ಲಿ ಶಂತನು ಭಾಗ್ಯರಾಜ್, ಅರ್ಜುನ್ ದಾಸ್ ಮತ್ತು ಆಂಡ್ರಿಯಾ ಜೆರೆಮಯ್ಯ, ಗೌರಿ ಕಿಶನ್, ಇತರೆ ಮುಖ್ಯ ಪಾತ್ರಗಳಲ್ಲಿ ನಟಿಸಿದ್ದಾರೆ. ಅನಿರುದ್ಧ್ ರವಿಚಂದರ್ ಸಂಗೀತ ನೀಡಿದ್ದಾರೆ. ಈ ಬಹು ನಿರೀಕ್ಷೆಯ ಸಿನಿಮಾ ಏಪ್ರಿಲ್ 9ರಂದು ತೆರೆಕಾಣಲಿದೆ.