ಕನ್ನಡ ಚಿತ್ರರಂಗದ ಎವರಗ್ರೀನ್ ಖಳನಾಯಕರು - ಕನ್ನಡ ಚಿತ್ರರಂಗದ ಆದ್ಯ ಖಳನಾಯಕರು

ಚಿತ್ರಕ್ಕೆ ನಾಯಕ ಹೇಗೆ ಪ್ರಧಾನವೋ ಹಾಗೇ ಖಳನಾಯಕ ಕೂಡ. ಖಳನಾಯಕನ ಪಾತ್ರ ಪ್ರಬಲವಾದಷ್ಟು, ನಾಯಕನ ಪಾತ್ರಕ್ಕೆ ಆಳ ಹೆಚ್ಚುತ್ತದೆ. ಕಪ್ಪು- ಬಿಳುಪಿನ ಕಾಲದಲ್ಲಿ ಕೇಡಿ ನಾಗಪ್ಪ ಮತ್ತು ರಂಗರಿಂದ ಕನ್ನಡದ ಖಳ ನಟರ ಪರಂಪರೆ ಆರಂಭವಾಯಿತು. ನಂತರ ಬಂದ ಬಾಲಕೃಷ್ಣ ತಮ್ಮ ಹಾಸ್ಯ ಲೇಪಿತ ಖಳನಾಯಕನ ಪಾತ್ರದಿಂದ ಪ್ರಸಿದ್ದರಾದರು. ತಮಗೇ ಕಿವಿ ಕೇಳದೇ ಇದ್ದರೂ ನಾಯಕ ಮತ್ತು ಸಹಕಲಾವಿದರ ಹಾವಭಾವ ನೋಡಿಕೊಂಡು ಅಭಿನಯಿಸುತ್ತಿದ್ದ ಬಾಲಕೃಷ್ಣ ನಿಧಾನವಾಗಿ ಹಾಸ್ಯ ಮತ್ತು ಪೋಷಕ ಪಾತ್ರಗಳೆಡೆಗೆ ಸರಿಯತೊಡಗಿದರು. ಆಗ ಆರಂಭವಾದದ್ದು ನಟ ಭಯಂಕರ ವಜ್ರಮುನಿ ಯುಗ. ಖಳನ ಪಾತ್ರಗಳಿಗೆ ತಮ್ಮ ರೌದ್ರ ಅಭಿನಯ ಮತ್ತು ಕಂಚಿನ ಕಂಠದಿಂದ ಧೀಮಂತಿಕೆ ತಂದು ಕೊಟ್ಟು ಕನ್ನಡ ಕುಲಕೋಟಿಯನ್ನು ಬೆಚ್ಚಿ ಬೀಳಿಸಿದ ಖ್ಯಾತಿ ವಜ್ರಮುನಿಯವರದು. ನಂತರ ಕೆಲ ಕಾಲದಲ್ಲಿ ಸುದರ್ಶನ್, ತೂಗುದೀಪ ಶ್ರೀನಿವಾಸ, ಸುಂದರಕೃಷ್ಣ ಅರಸ್, ಟೈಗರ್ ಪ್ರಭಾಕರ್, ಸುಧೀರ್, ಶಕ್ತಿ ಪ್ರಸಾದ್ ಮುಂತಾದವರು ತಮ್ಮ ಖಳ ಪಾತ್ರಗಳಿಂದ ಗಮನ ಸೆಳೆದರು . ನಿರ್ಮಾಪಕ ಎಂ.ಪಿ.ಶಂಕರ್ ಕೂಡ ಕೆಲ ಚಿತ್ರಗಳಲ್ಲಿ ಖಳನಾಗಿ ನಟಿಸಿದರು. ಹಾಗೇ ಟೈಗರ್ ಪ್ರಭಾಕರ್, ಲೋಕೇಶ್ ಖಳನಾಯಕರಾಗಿ ಹಲವು ಚಿತ್ರಗಳಲ್ಲಿ ಮಿಂಚಿದ್ದರೂ, ನಾಯಕರಾಗಿ ಅಭಿಮಾನಿಗಳ ಮನದಲ್ಲಿ ನೆಲಸಿದ್ದಾರೆ. ಧೀರೇಂದ್ರಗೋಪಾಲ್, ಮುಸುರಿ ಕೃಷ್ಣಮೂರ್ತಿ, ದಿನೇಶ್, ಮುಖ್ಯಮಂತ್ರಿ ಚಂದ್ರು, ದೊಡ್ಡಣ್ಣ ಖಳನಾಯಕನಾಗಿ ಸಿನಿಪಯಣ ಆರಂಭಿಸಿದರೂ ಖ್ಯಾತಿ ಪಡೆದಿದ್ದು ತಮ್ಮ ಹಾಸಯ ನಟನೆಯ ಮೂಲಕ. ಇಲ್ಲಿ ಕೇವಲ 90 ದಶಕಕ್ಕಿಂತ ಮುಂಚಿನ ಖಳನಾಯಕರನ್ನು ಪಟ್ಟಿ ಮಾಡಲಾಗಿದೆ. 90 ರ ದಶಕದ ನಂತರದಲ್ಲಿ ಬಂದ ಶೋಭರಾಜ್, ಅವಿನಾಶ್, ಕೀರ್ತಿರಾಜ್‌ ಮುಂತಾದ ನಟರನ್ನು ಇನ್ನೊಂದು ಲಿಸ್ಟಿನಲ್ಲಿ ಪ್ರಸ್ತುತ ಪಡಿಸುತ್ತದೆ.